以下文章，宜重複閱讀。
深明此理，保一生受用。
問一：愛情嘅問題，即係乜嘢問題？
答一：概括嚟講，愛情嘅問題來來去去只係兩個問題－
「有」嘅問題
「冇」嘅問題
問二：乜嘢係「有」嘅問題？
答二：「有」嘅問題，就係你本身已經「有」伴侶，而你唔滿意呢個伴侶。你有人追、伴侶有第三者、伴侶唔夠上進/身材唔夠好/每個月搵唔夠六位數（小數點前）/無打算結婚等等，通通係你唔滿意呢個伴侶嘅原因。
問三：乜嘢係「冇」嘅問題？
答三：「冇」嘅問題，就係你「冇」伴侶，而又想有。追唔到男/女神、自己太毒、掛住前度，全部都係「冇」嘅原因－問題，只係你「冇」。
問四：咁其實愛情嘅問題，即係乜嘢嘅問題？
答四：愛情嘅問題－「有」嘅問題好、「冇」嘅問題好－只係滿足需求(satisfy wants)嘅問題。無錯，愛情嘅問題，其實係經濟學問題：what to produce, how to produce and for whom to produce.
自吹自擂一下：我由一條問題（愛情嘅問題），變咗兩條問題（「有」同「冇」嘅問題），再進化至三條問題（what to produce, how to produce and for whom to produce），簡單複雜化。如果我去壹週刊做，保證期期黃頁咁厚，而家兩本壹仔疊埋都仲薄過一塊大喜屋啲三文魚刺身。
問五：咁點解決愛情嘅問題？
答五：雖然話愛情嘅問題＝經濟學問題，但你唔使請教專家，更加唔好請教經濟學家（因為信咗就死梗。例如，當年蘇聯搞共產死咗好多人，佢旗下計劃經濟就係根據幾個經濟學家用乜嘢dynamic control幾條方程式整出嚟）。
解決愛情嘅問題，記住以下六字口訣：
「照鏡啦」
「算數罷」
一照鏡（或作出相同嘅自我檢視、自我反省，例如睇睇銀行結餘、驗DNA睇下阿爸係咪李嘉誠/劉鑾雄），你發覺現狀（即獨身）已經係最好，最合理；
一講「算數罷」，除咗自己安慰，仲可以解讀呢句為「分手吧」/「放棄吧」或者「我已經好幸福，唔好咁貪心」，大包圍，無得輸。好似某個足球旁述員嘅名言咁：「十二碼，一係入、一係唔入。」
問六：解決愛情問題，真係以上六個字就夠？
答六：絕對夠用。複雜嘅問題，答案從來係簡單。
你有冇睇過電視台嘅股票節目？涉及幾百萬嘅投資，小股民都只係求個主持畀一個最多四位數字嘅股票號碼，不求甚解就倒錢落去；好多老人家只係望住一張其他人畀佢嘅掌心雷，就入票站投票照炒上面嘅數字，然後決定同解決咗香港嘅未來（btw, 香港個投票制度好公平，地區直選你一票嘅重要性等於老人家嘅一票，不過佢人數多好多之嘛！）
愛情、股票、香港嘅未來，邊樣重要？「生命誠可貴，愛情價更高，但為自由故，兩者皆可拋」，政治自由同財政自由，當然比愛情重要。當前兩者都只係憑幾個號碼去決定，而家憑幾個中文字去解決愛情呢個次要嘅問題，完全正確。我而家畀夠六個字，仲要係文字、唔係數字，肯定夠用。唔夠，恐怕只係你六根（或五肢）不淨，凡心未了，色心又起。寫多恒河沙之數嘅文字，畀你那由他數目嘅解決方法，又有可用？
問七：上面篇文，好似有啲道理，但又有啲講唔出嘅奇怪之處……
答七：篇文，係由一個大學修經濟嘅人寫嘅。見問答五。
