劍士寓言三則

.

［天下第一］

有位劍士，擊敗咗各方高手，成為天下第一。

某一日，有班官兵嚟捉佢。

一個官兵搶先衝過嚟，一劍兜頭斬落劍士度。劍士將手中寶劍高舉過頂，準備卸走勁力再圖反擊。

點知「框」一聲，把劍一分為二。

劍士重整旗鼓，浴血奮戰，但係始終寡不敵眾，戰死咗。

一個官兵話：「我地用嘅劍全部都係出自高級匠人之手，鍛造精良，又硬又利，佢果啲鄉間鄙夫造出嚟嘅劍，技術落後，邊有得比吖。」

另一個官兵又話：「係囉。真係淨係好打就夠咩。裝備技術、人數、組織性，先係決勝關鍵。

揸住粗製濫造嘅劍、天下第一嘅劍士，都打唔嬴全副武裝、人多勢眾嘅我地。

就算打得嬴我地幾個，天下間仲有千千萬萬個官兵；就算打得嬴千千萬萬個官兵，我地都可以半夜趁你訓教破門而入捉你；就算咁都打唔嬴你，我地都可以日日過嚟騷擾你，搞到你寢食難安、不事生產、無人敢同你來往。」

另一個官兵笑住咁講：「無錯，精進武藝係無用架！」

［止戈為武］

某個地方官，不學無術，成日講埋曬啲治國理論，但係政事就搞到一pat屎咁。

有個男人，自命俠士，負劍雲遊四海，周圍抱打不平。呢日佢嚟到呢個地方，發現百姓對地方官怨氣甚重。

聽過地方官嘅事跡之後，百姓問佢點評價地方官，俠士就話：「紙上談兵。」

百姓大喜，認為俠士企喺自己一邊，於是奉佢為上客。但係之後百姓多次請俠士幫佢地誅殺禍國殃民嘅狗官，俠士都拒絕咗，同啲百姓講：「止戈為武」。

地方官開始捉拿啲辱罵佢嘅平民，百姓又請俠士出手，俠士都只係話：「止戈為武」。

地方官開始要求平民無論喺邊度見到佢都要下跪，並且捉拿跪姿唔夠端正嘅平民。百姓又請俠士出手，俠士都只係話：「止戈為武」。

百姓拎嚟鋤頭起義，請俠士加入，俠士就話：「止戈為武，你地咁樣係唔啱嘅，應該大家有商有量。」

一個平民問佢：「咁你背上嘅劍有咩用？」

俠士話：「在下嘅劍係活人劍，唔會殺生。在下雲遊四海，未嘗試過對話係解決唔到問題嘅。」

平民向佢吐咗一啖口水，拋低一句：「紙上談兵。」然後拎起鋤頭前進。

［葉公好劍］

又有位劍士，人稱葉公，細細個就中意舞刀弄劍，同人比試都係輸少嬴多，大家都好尊重佢。

葉公聽一啲長輩講，好耐以前村裡面都有一位劍士，武藝高強，直頭型到一刀了結敵人之後，頭都唔回，fing一fing把劍揮走血跡就收劍入鞘，然後背後嘅敵人噴血而死果種。葉公好羨慕，所以佢先會成為劍士。

有日村落受到強盜洗劫，葉公挺身而出。

葉公一劍殺咗一個強盜，強盜傷口噴出嘅鮮血濺落到葉公嘅面上。再望下把劍，痴喺上面嘅血跡，fing極都fing唔走，上面仲痴住少少肉碎，同埋一啲黃色野 — — — 係人類嘅脂肪。

葉公當堂嘔咗出嚟。佢無諗過原來真正嘅戰鬥係咁噁心嘅。