寒蟬（二）
扶咗康叔返到佢屋企之後，我地就各自離開。
返到去，我叫阿媽醃起咗少少鹿肉，剩低嘅求其煮熟咗，就裝喺碗到，加多幾舊冬菇一齊食。
我偷偷地裝下個米缸，只係得返少量冬菇、風乾咗嘅漿果，都唔知夠唔夠食埋呢個禮拜。
食完飯，我同阿媽講：「阿媽，呢排啲獵物少咗好多。」
「係咩？係咪你唔識搵咋？」
「唔係呀，而家咁樣啲動物都死啦。」
「咁你之前又捉到嘅？」
「冬天繼續落去就會越嚟越難捉。而且因為村長要求上繳多咗，我地唯有捉多啲。呢個冬天唔知要幾時先完，獵物只會越捉越少。」
「咁村長祭祀就要有肉架喇嘛。同埋啲肉要嚟同出面城市做買賣架，我地啲廚具咪又係佢地喺出面買入嚟。」
「你望下佢地果身肥肉先啦。」
「佢地、咁、咁就算佢地自己要食都唔出奇啦。村長又抱孫喎，要食多啲唔出奇吖。」阿媽嘅聲線略顯動搖。
「咁都唔洗每人每個月加多隻鹿掛？今次輪到佢第二個新抱大肚喇，咁係咪又要我地比多隻鹿佢？」
阿媽惱羞成怒，拎住湯殼鬧我：「你咁樣話長輩架咩？我點教你架？你咁得閒就捉多兩隻返嚟啦！」
「唉。」
簡直蠻不講理，我放棄溝通。
當晚，我訓喺床上面，諗起康叔嘅事。相比康叔嘅苦衷，我更加在意嘅係，到底係邊個造成咗呢件悲劇。
第二日，我如常喺路口等阿樂一齊上山打獵。點知等咗大半日都唔見佢，就走咗去佢屋企搵佢。
嚟到阿樂屋企，我敲一敲門，無人應。
「阿樂呀，你喺唔喺度呀？我係阿健呀。」依然係無任何回應。
但係阿樂向來唔係一個會失約嘅人，我周身唔聚財，有種不好嘅預感。
我輕輕一推，大門就打開咗。
一陣燶味撲鼻而來。我掩住個鼻行入去，發現阿樂倒臥喺門後。
我即刻拍下佢膊頭，叫佢醒下。
「我未死……」
「你咩事呀？」
阿樂面容憔悴，強撐起眼皮，有氣無力咁答我：
「我今早起身已經有啲唔舒服，仲有啲餓，就想煮少少野嚟食。點知……煮煮下就覺得個頭好暈，然後就撻低咗。我想嚟搵你，但成身都無曬力……」
「好喇我知喇。」我摸一摸阿樂額頭，熱到辣手。
我扶佢返上床休息，再走去灶邊望下，發現個鑊裡面得返一堆黑炭咁嘅物體。好彩個火一早熄咗。
我清理好個鑊，打算親自煮啲野比佢食，點知發現佢個米缸空空如也，周圍都搵唔到糧食。
「阿樂，你啲野食去曬邊？」我去床邊問佢。
「我淨係留低咗今日果份……其餘比咗康叔喇。」
「你……你真係好蠢。」
阿樂乾笑幾聲，然後不停咁咳。
「阿健，唔知我係咪有餓瘟呢？」
「唔好亂講野。你可能凍親架啫。」
「我記得舊年老豆老母都係咁死架……」
我陷入沉默。
———餓瘟，係我地村裡面一種常見嘅病。
呢種病，通常發生喺捱餓嘅時候。起初，患者會發熱、乏力，就好似普通感冒咁。但慢慢，患者會開始嘔吐、無法進食，最後連說話都講唔出。不出幾日就會監生餓死，連求救都唔會有人聽到。
———被疾病榨乾，而且無任何人會聽到你嘅聲音，就咁樣寂寞咁死去。仲有更加恐怖嘅事咩？
我老豆、阿樂雙親，仲有聽講最近病死果幾個小朋友，都係咁樣死嘅。喺呢個冬天裡面，睇怕會有更加多人死。
我望住阿樂。佢塊面凹曬，往日嘅笑容消失無蹤。
「阿健，如果村民嘅生活方式唔變，呢條村唔會有得救。」
「我會諗方法，唔會再比村長搶走我地嘅獵物。」
阿樂望住天花，嘆咗一口氣。
「你仲記唔記我地細個一齊捉蟬呀？」
「記得。」記憶中嘅綠草如茵、碧波蕩漾，一一浮現眼前。
「好想聽返果啲好煩嘅蟬叫聲。」
「一定會聽到。係喇，我返去拎返琴日啲鹿肉嚟煮比你食。」
「多謝……明明你都好艱難。」
我擰轉身就走 ———我唔想比佢見到我呢刻嘅表情。
行返屋企嘅時候，我終於都忍唔住喊起上嚟。滾燙嘅眼淚啱啱流出嚟，就比寒風吹到好似雪咁凍。
捱唔過寒冬而死嘅小朋友、哭喪嘅家人、走投無路嘅康叔、危在旦夕嘅阿樂———你以為我無感覺架咩？
我返到屋企拎咗幾舊琴日阿媽醃好嘅鹿肉，煮比阿樂食。阿媽鬧我「敗家仔」，話我自己無得食仲比人，我一概唔理。
第二日再去睇阿樂嘅時候，佢落唔到床。第三日，我睇見佢將食落去嘅野嘔返出嚟。
我下定決心，要推翻村長決定。
我搵咗一班一樣不滿村長苛政嘅後生仔，走去村長屋企門口，拍門叫佢出嚟對質。
村長龜縮喺屋企裡面，完全當我地透明。但我地大吵大鬧，有啲本來唔敢出聲嘅人都行埋嚟一齊叫村長出嚟。
搞咗半日，口水都乾埋。
「不如我地直接衝入去啦。」
「咁點得呀。」
「佢地依家當我地無到呀！」
「陣間打架咁點呀？」
眾人議論紛紛，不得要領。主張衝入村長屋企嘅只係少數人，眼見眾人極力抗拒，都無曬辦法。
我雖然唔反對衝入去，但心知勝算唔高，講唔出啲咩意氣激昂嘅說話，唯有企埋一邊。
忽然間唔知邊個講咗一句：「不如我地聽日再嚟過啦。」之後眾人好似得到「睿智」嘅正解咁，一邊口噏噏「係囉再嚟過啦」一邊各自散去。
啱先主張衝入去嘅幾個人垂頭喪氣，我唯有安慰佢地，話村民一定會明白佢地嘅。
如是者，聽日再聽日，一個禮拜過去喇，參加嘅人都少咗一半。大家都覺得無希望。
直到有一日我地喺河邊發現康叔嘅屍體。
康叔伏屍喺結冰嘅河邊，雙手僵直咁伸向河面上。屍身瘦骨嶙峋，慘不忍睹。
斷咗雙手同一隻腳嘅佢，喺裡面冬天，同判死刑無異。佢生前應該係食曬存糧，又無能力打獵，慌不擇路之下想挖開河面捉魚。
呢件事一傳開去，即刻多咗一倍嘅村民嚟到村長屋企大吵大鬧，要求開門出嚟對質。先前主張衝入去嘅幾個後生仔，仲拎咗鋤頭過嚟，殺氣騰騰。
我心知正面衡突勝算好低，就拎咗弓箭，喺遠處草叢裡面埋伏。最壞嘅打算係殺死一兩個人之後潛逃。
「出嚟呀縮頭烏龜！你仲想害死幾多人呀？」幾個後生仔大力拍門，拍到道門都就嚟爛。
屋內依然鴉雀無聲。
「當我地無到？」一個村民執起路邊一粒拳頭咁大嘅石頭，掟上屋頂，「卜」一聲，屋頂嘅瓦片應聲碎裂。
眾人有樣學樣，一時「噼噼卜卜」之聲不絕於耳。
於是，大門打開咗。門前嘅幾個後生仔退後一步。
村長嘅兩個仔行咗出嚟。佢地嘅老婆就喺門邊裝下裝下，露出半個頭。
「咩事呀？邊個整爛我地間屋呀？」村長嘅大仔行前一步，大聲喝罵眾人。
「係我呀，咁點呀？」一個後生仔行前一步，「鐺」一聲將鋤頭棟落地下。「係你地害死康叔架！」
村長大仔勃然大怒。「下？咁係佢自己搵唔夠食餓死咋！關我咩事呀？」
「你知唔知個個都捱緊餓呀？你地仲要我地交咁多野食出嚟，係咪想我地死呀？」
「你地啲日常用品係經邊個買架，下？無我地同出面啲城市人做生意你地連飯碗都無呀！」
「你睇下我地個個都得棚骨，你地就成身都係肉，過意得去咩！」
村長嘅大仔一時語塞，滿面通紅。
「阿華，去叫果班人嚟。」於是村長嘅二仔跑走咗。
兩方繼續互相指罵，過咗無耐，另一班揸住鋤頭嘅村民衝咗過嚟，圍住向村長抗議嘅人。
新嚟果班村民，個個都容光煥發，明顯係好食好住。
帶頭嘅「好食好住派」村民話：「咁多位，你地咁樣唔啱架，打爛曬村長啲野喎。」
「康叔死咗又唔見你地話唔啱？」
「你地再係咁就趕你地走架喇。」
「你試下呀。」
「好食好住派」村民扭扭擰擰，好似唔想郁手咁。
村長大仔沉唔住氣，就向「好食好住派」村民問：「平叔，邊個幫你個仔出城讀書架？」
「但係……」
「真係良心當狗肺呀，村長見你地幫得手，先至分啲糧食比你地。而家呢，村長比人拆屋，你地居然翹埋對手睇戲？呢啲係陳家村嘅敗類嚟架，你地要對佢地手軟呀？」
村長大仔搖頭嘆息，扮到成個受害者咁款。
「但係......佢地又無傷人，要打佢地好似唔係好啱村規咁喎......」「好食好住派」村民越講越細聲。
村長嘅大仔「嘖」一聲，講咗句「無撚用嘅」，就一拳將面前嘅後生仔打到訓低，成面都係血。
另外幾個後生仔圍咗上去，但係村長果兩個仔牛高馬大，佢地邊係對手呀，鋤頭都比人搶埋，全部比人打到訓喺地下。村長啲新抱喺屋裡面見到村民不堪一擊，呵呵聲咁指住村民嚟笑。
「邊個再搞我地就係同成條村作對！」村長嘅兩個仔大腳大腳咁踢向倒地嘅後生仔，然後環視四周，睇下仲有邊個唔滿意。
「陳家村嘅敗類，躝！比我再見到你地一定村規侍候。」村長大仔將幾個後生仔掟咗出去，其他村民見狀，都紛紛散去。
我輕輕咁喺箭筒拎出兩枝箭，搭喺弦上面，慢慢咁拉弓———村長大仔同二仔嘅位置啱啱好，我絕對可以同時射殺佢地。
就喺呢個時候，一個憔悴嘅人影棟住拐杖，趷下趷下咁行咗過嚟，膊頭上面仲揹住弓箭。
我定睛一睇，果個分明就係阿樂。
佢吃力咁樣將箭上弦，拉行咗弓。村民全部都呆曬，未理解到發生咩事。
「啪！」
一枝箭插喺村長大仔嘅膊頭上面。
佢望住鮮血沿住手臂流落嚟，不禁呆咗。
「好！射得好！」果幾個比人打到成面血嘅後生仔大聲喝采，但係我心知不妙。
先唔講佢射藝本身就唔夠我好，以佢嘅身體，行出嚟已經好勉強，仲要攻擊對方？
「死仆街，快啲放低你把弓！」村長大仔暴跳如雷。
阿樂舉起蒼白嘅手臂，由箭筒拎出一枝箭，搭喺獵弓上面。即使距離好遠，仍然睇得出佢對手喺到震。
村長大仔伸隻手入去外套裡面。我有不祥嘅預感。
我想出手相救，但偏偏阿樂企咗喺我嘅射線裡面，我一箭都射唔出。
「唔好呀阿樂！」
阿樂鬆開右手 — — —
「啪！」
「砰！」
村長大仔手中嘅係一把手槍。
如果係有喺呢個窮鄉僻壤同出面城市做生意嘅手段嘅話，買入武器都唔係無可能嘅。所以我先至唔主張同佢地正面搏鬥。
阿樂手中獵弓跌落地下，佢揞住心口，撻低咗。佢嘅箭命中咗村長屋企嘅大門。鐵造嘅大門，無情咁彈開咗軟弱嘅飛矢。
我拋低弓箭，跑去阿樂身邊。
「阿樂！」
「阿健……最後可以、可以見到你就好喇。咳！」阿樂捉住我。
阿樂心口不停湧出鮮血，我無辦法塞住傷口。
「阿樂！做咩咁傻呀？」
「我、我無其他辦法.....咳......唯有、趁、住迴光返照，仲行得郁嘅時候......」
「好喇我知喇，你唔好再講野住！」
「阿賢，你、你聽唔聽到呀？」阿樂望住天空。「嗞…嗞…嗞…係蟬，咳！係蟬嘅叫聲呀……」
阿樂瘦削嘅面上，重現久違嘅笑容。
「嗯！我聽到！」我抹一抹眼淚，強顏歡笑。
「夏天嚟到喇……」
講完，阿樂雙手脫力撻落地下。
佢依然係一面滿足嘅表情。我諗佢一定係聽到令人煩躁嘅蟬叫聲。
我精神愰惚，企起身嘅時候眼前一黑。之後發生咩事我唔知道。
後來再無村民夠膽提起呢件事，問佢地到底我暈低之後其他人點樣，佢地都只係搖搖頭，就急急腳走開。至於當日果幾個一馬當先嘅後生仔，我再無見過佢地。
「嗞嗞嗞嗞嗞……」朝早嘅蟬叫聲特別令人煩厭。
綠草如茵、生機勃勃。河面上波光粼粼，肥美嘅河魚游嚟游去。刺眼嘅太陽射到人打唔開雙眼，太陽底下耕作嘅我汗流浹背。
「喂阿健！過嚟呀！」
我轉頭一望，一個人企喺河邊向我揮手，佢背住光，我睇唔清楚佢係邊個。
「過嚟呀！」
我放低鋤頭，行咗過去。
識笑嘅雙眼，熟悉嘅笑容———
「阿健，多謝你，我終於等到夏天喇。」
「！！」
我成個人彈起身，眼前係屋企嘅床舖。
我抹走額上嘅汗珠，落床食早餐。
「阿媽，到底果日…..發生咗咩事？」
阿媽坐喺對面，嘆咗一口氣。
「你唔好再諗喇。正正經經諗下點捉多啲獵物返嚟啦，就嚟唔夠食喇。」
我唔甘心。我唔甘心。
「點解果時你地唔幫我？」
「幫咩啫？人地村長嚟架嘛，我地啲日用品都係經佢買架咋。你地唔好搞人地屋企咪唔會有事囉。後生仔咩都唔識，不如跟人學下點同城市人做生意好過啦。村尾阿六嬸都話係你地唔啱啦！不聽老人言，吃虧在眼前呀。喇飲湯啦。」阿媽潷咗一碗湯比我。
碗湯傳嚟一陣未聞過嘅香氣，我問阿媽：「呢碗係咩湯嚟架？」
「金蟬花煲湯呀！滋補呀！村長喺出面買返嚟嘅靚貨嚟架！」
我望住碗湯，過咗好耐都講唔出說話。
窗外又吹起大雪，耳邊得返寒風滲入嘅呼呼聲，夢中嘅蟬叫聲已經消失無蹤。
後記
盛夏嘅一個中午，街上面人來人往，唔少都係著住西裝嘅打工仔。
一間簡陋陰暗嘅住房裡面，一個中年男人跨坐喺一個小朋友身上。
小朋友捉住男人雙手，搏命掙扎。小朋友幼細嘅雙手就好似隨時會折斷嘅枯枝咁，無辦法撼動男人粗壯嘅雙臂。
窗外傳嚟令人煩躁嘅蟬鳴，嗞嗞作響。小朋友嘅喉嚨擠出嘶啞嘅嗓音，同蟬鳴組成輕快嘅合奏。
「對唔住、對唔住……」
聽到小朋友嘅道歉，男人更加激動，雙手加倍用力，好似唔想再聽到佢嘅聲線咁。
「去死啦、去死啦。」男人一邊辱罵，一邊將全身嘅氣力都貫注喺手臂上面。
小朋友面色發紫，雙眼上翻；男人依然無鬆手，十指深深陷入佢嘅皮肉裡面。
蟬鳴戛然而止，小朋友嘅雙手都停咗落嚟，僵直咁放喺床上。
「噠。」
世界如此安靜，以致聽得見男人滴汗嘅聲音。
溫熱嘅汗水滴落喺小朋友嘅面上，然而已經無辦法比到溫暖任何人。男人就咁樣坐喺小朋友身上，鬆咗一口氣。
「死得好、死得好……搞搞震，生舊叉燒都好過生你。」
———看似兩種殺人，其實別無二致。
