戰神末路———文鴦之少年時代（九）
夏侯玄睇唔過眼司馬家弄權，密謀刺殺司馬師，事敗下獄。
司馬師嚟到獄中，摒退左右，想同夏侯玄促膝長談。
夏侯玄一方面係名門出身嘅文人，一方面係清談玄學嘅頭號人物，以氣節清高聞名。見到司馬師嚟到，即刻擰轉面，粒聲唔出。
司馬師望住遍體鱗傷嘅夏侯玄，就話：「聽講太初你受咗一日嚴刑拷問，哼都無哼一聲喎。」
夏侯玄無語。
司馬師又問：「點解要咁做呢？你又唔係唔知反抗只係死路一條。而家我以謀逆之罪將你處死，天下萬民都只會認為你係逆賊，司馬家先係忠臣。點解唔好好為我效力，助我完成大業呢？」
夏侯玄繼續唔出聲，司馬師嘆咗一口氣。
「聽日你就會被押去東市處斬，事到如今，我都唔怕同你講：令妹係我毒死嘅。」
夏侯玄打咗個突，隨即慢慢吐出字句：「我隱約估到，只不過無諗過子元你真係做得出。」
「浮華案改變咗好多野。我地都係肉血之軀，若果唔係身份尊貴，同鄉野草民無分別。喺權力面前，人命與草芥無異，如果唔係咁做，我地一家可能一早死無葬身之地。」
「呵呵，無錯。所以我亦與草芥無異。」
「無錯。」
「子元，最後我以朋友身份贈你一句。子上（司馬昭）才能遠在你之上，必成大器。你真心為司馬家好嘅，就記住呢句說話啦。」
（點解同阿爹臨終講嘅一樣嘅？佢真係咁有能耐？）司馬師暗生疑竇，不發一語，起身離去。
夏侯玄望住司馬師遠去嘅背影，獨自低吟：「太初所望者，浮華一夢也......」
翌日，夏侯玄於東市受斬，至死亦面不改容，神態自若，觀者為之動容。
人生五十年，如夢又似幻。一度得生者，豈有不滅乎？
「你話有野同我講，你想講咩？」
文家兄弟同華姐姐成日去玩嘅果座山頭上面，春雪己散，但仍有幾分寒意。
文鴦深深咁吸咗一口氣，再徐徐呼出，喺空中形成一團白色嘅霧氣。「有人向華姐姐父母提親，佢地準備應承。」
文鴛低頭望住自己腳邊，細細聲同自己講：「太快喇.......太快喇......」
「醒下啦。《女子十有五年而嫁，笄而字》，女仔人家十七、八出嫁有咩咁出奇？你自己都十八、九喇。」
「你點知呢件事？」
「佢琴日嚟同我講架。」
文鴛扯住自己後腦嘅頭髮，面容扭曲，唔願意相信文鴦嘅說話。
「雖然已經遲咗好多，但而家係你最後機會。同阿爹講，去提親啦。」
文鴛踎喺地下，將個頭埋喺雙臂之間。「唔得…唔得...二十而冠，等多兩年。等多兩年，等我行冠禮之後就可以娶佢。」
「......我從來見過你咁架。係咪真係咁驚呀？最多咪逐出家門，到時你咪同華姐姐私奔囉。以你武藝力氣，就算窮到極，江湖賣藝都可以維生啦。等等等，唔通等到二十你就真係夠膽咩？懦夫。」
「你識啲咩！」文鴛突然間跳起身，扯住文鴦件衫。「你咩都唔知！你唔知我付出咗幾多！」
望住文鴛兩行眼淚，文鴦呆咗。
「你唔知！你唔知我每日練武練到筋疲力盡，雙手流過幾多次血！你睇下！你睇下我手上面嘅枕幾厚！你呢？每次你都放水！你根本無將我放在眼內！」
「兄長你喺度講緊乜......」
「你有當我係兄長咩？你只係當我練功道具！兄長？阿爹將最好嘅野都比曬你！最寵你！出陣殺敵都淨係讚你！你係難得一見嘅將材，我只係你嘅陪襯！」
「我從來無咁諗過......」
講下講下，文鴦都跟住流下兩行眼淚。
「你知唔知......每次睇到你望華姐姐嘅眼神，我都會覺得好恐怖。鴦，你最唔叻講大話，雖然你無講出口，但我知你對佢都有啲意思，係咪？」
文鴦講唔出口。
「點解佢淨係同你講唔同我講？你係佢邊個？我又係佢邊個？你地係係咪從來無將我放在眼內？哈哈。連我愛嘅女人你都想搶走，你到底仲想喺我身上搶走啲咩？哈哈、哈哈......唔會、唔會......我唔會比你咁做！」
話音方落，文鴛就將文鴦推落地下，騎喺佢身上，不斷揮拳，重重咁打喺佢身上。
文鴦只係雙手護頭，完全無還手。
「兄長......」文鴦想講啲野為自己辯護，但又諗唔到可以講啲咩。
就係咁，文鴛不停咁打咗足足五分鐘，抖曬大氣，拳眼上面每一節都已經紅腫流血。文鴦雙臂都一樣紅腫到慘不忍睹。
「咳！」文鴦吐出一啖鮮血。文鴛嘅拳頭，除咗打喺佢雙臂上面之外，仲有好多打喺佢嘅胸腹上面。
「兄長，而家你滿足啦？」
文鴦想坐起身，但無諗到仲留有好多力氣嘅自己，一郁就將已經脫力嘅文鴛彈開。文鴛跌埋一邊，個頭撼到側跟嘅石頭，當堂流血。
「兄長！無事嘛？」
「哼哼......我明喇，我明喇......你搶走曬我啲野之後，就想殺咗我。」文鴦過去扶佢起身，點知佢喺懷中摸中一把短刀，揮向文鴦。文鴦側頭一閃，左邊面頰中咗一刀，血流如注。
「記唔記得果年我地喺到玩？果時我掟雪球，你側一側頭就避開咗。」文鴛慢慢咁企咗起身，「你而家避唔到喇。」
文鴛撲咗上嚟，文鴦捉實佢手臂，但個肚都係捱咗一刀。文鴦出盡力都控制唔到佢，不禁驚訝原來文鴛都可以有力量同自己對抗。
兩人爭執之際，離遠有兩個人行緊過嚟。
「華姐姐，佢地肯定喺到架喇。」
「係囉，好彩阿虎你醒目，我居然諗唔起添。」
「話口未完就見到......喇。」
來者正係文虎同華姐姐。
文鴛轉頭一望，見到華姐姐，即刻好似五雷轟頂咁，完全唔識反應。
就喺佢呆住果一瞬間，手上勁力忽然一鬆，收唔切掣嘅文鴦，無意中一刀插咗入佢體內。
———好不幸，呢一刀正正插中心口，刀刃完全沒入文鴛體內。文鴛應聲倒地。
「阿鴛！」華姐姐飛奔而嚟，撲倒喺文鴛身旁。
「華...」
「鴛！」華姐姐緊握文鴛雙手，放聲大哭。
「我知你就嚟...出嫁。我無面目干預你地，但我想...想同你講，我...我愛你。」
一聽到呢句，華姐姐喊聲更加淒厲，呼天搶地，幾乎成個山頭都聽到。
文鴛用最後嘅力氣擠出一句：「...你呢？」
華姐姐講唔出說話，只係搏曬命咁點頭。
文鴛微笑，合埋對眼。過咗無耐，就斷咗氣。文鴛曾經許願要永遠停留喺呢段日子裡面，而家佢似乎做到喇。
三人、一屍，就咁樣喺山丘上面定格。
