【捷克。布拉格】文青手信指南
係時候敗家啦 — — 多圖，慎入。
有睇我上篇交換生月記（二）（係，呢個係植入式廣告）都知道數字妹去左布拉格打波。咁當然啦，打波以外都有啲自由時間周圍走下嘅。我上次黎無做好資料搜集，只係跟朋友帶路去左唔少旅遊熱點，無咩時間慢慢感受呢個城市。今次唔使打卡，可以點行都得!
呢篇文章嘅重點係曬下自己又做水貨佬嘅輝煌戰績（返瑞典個行李好似重左2.5kg），順便記錄下唔同文具店，不過就無咩旅遊攻略，用店名google map應該方便過我寫地址比你地，大家啱用就bookmark啦哇哈哈哈哈～
註：大家都同我講Prague好平好正，結果我用嘅錢比喺倫敦更多…
註2：應該無時間（而且無咩特別內容去寫）額外一篇純遊記，大家想知啲咩就直接留言問啦唔好等～
我寫文具嗰啲部分比較認真，如果太長嘅話skip住黎睇啦～
藝伎咖啡豆
Cukrárna Alchymistan, Prague 7
除左手工啤酒之外，布拉格嘅咖啡都係好出名。佢哋旅遊局好識吸引鍾意唔同旅遊風格嘅旅客，連咖啡店都有特別一本指南。每一間店都有幾句說明，等你知道想飲手沖/espresso/影相放instagram/食埋甜品/自家烘培豆/想用bitcoin找數應該去邊間cafe，唔係就咁google map就做到嘅功夫黎。
即使係咁，我今次去嘅呢間咖啡店其實唔係我行程計劃之內。我本來只係想去附近手製筆記簿文具店，順便睇下Coffee Museum究竟係咩來頭。
【結果太遲去，兩樣都去唔到】
其實我對復古風同花園無特別感覺，入去只係取下暖試下唔同咖啡。不過個花園竟然有鴨仔，好可愛。我見v60手沖唔算貴（CZK 65–75,先港幣25蚊！）就打算試試佢，點知店員反而介紹我飲再平啲嘅batch brew，話都係用同樣嘅豆，不過係mechanical drip而唔係hand drip。既然佢介紹仲要平啲，就試試佢啦。
臨走同佢哋講，杯啡好黑但無我想像中咁苦，幾好飲，佢先話我知佢哋係用Geisha豆沖（！！！）佢哋喺洪都拉斯有自己一塊田，出產嘅豆就自己喺布拉格33公里外嘅地方烘培。天啊…我喺唔知情嘅情況下飲左人生第一杯geisha咖啡…
結果我念念不忘，幾日後返去買豆試下自己沖。咖啡師認得我，繼續同我分享佢喺中國表演武術嘅點滴。
一包70g嘅豆，盛惠89蚊。sorry，係89捷克幣，姐係港紙31蚊。買左三包，其中一包送比同樣喺外地exchange嘅朋友，不過郵費仲貴過包豆double價錢……………………
橡筋帶書籤
Papelote, Prague 1
呢間文具店標榜人手製作、將廢棄物料循環再造，有啲紙質堅挺嘅信封後面都係用舊卡紙打底，想支持環保嘅話都係個唔錯嘅選擇。不過筆記簿紙質唔算特別好，數字妹要用鋼筆就不了。
用得筆記簿嘅多數都要帶埋支筆去用，但就唔係每本簿都有位放。本來有唸過買多少少返黎，好似做代購咁，不過最後怕煩，都係買自己想要嘅算數。我之前喺香港都有買過類似嘅皮革書籤，刻埋字大約六十蚊。
A4 CZK 89、A5 CZK 95、A6 CZK 89，折合港幣三十到三十五左右。如果本身用開筆記簿而無筆夾、或者睇書想帶支筆做紀錄就啱曬啦。（不過仲有幾多人會拎書出街睇？）
水彩筆
美術用品店 Zlata Lod, Prague 1
Self-explanatory，純粹買咗支水彩筆（CZK34）打個卡，可能拎黎整水彩背景寫字，數字妹唔識畫畫架。不過畫紙講究嘅話真係可以好貴，呢疊cold press製作嘅卡紙仔要$110二十張（數字妹淨係識cold press果汁）。
高級紙、信封
Grand Papir, Prague 1
行完美術店見到有個牌寫住Grand Papir，可能同紙有關掛。轉角行入去，見到成個櫃都係紙，試問數字妹又點會抵擋到敗家嘅誘惑呢。
一邊放信封，其他都係紙。唔同顏色、厚度、質感、透明度等等嘅紙。自己揀夠就擺低比佢哋數，最後磅水就可以。有啲櫃係唔入得嘅，應該要等店員幫你拎。
如果你會喺log on買letter set寫嘢嘅話，極度推薦你喺呢度掃貨，通常一set總有啲顏色、花款係無咁靚但你又要局住用埋佢…
亂買一輪之後，臨走比我見到呢叠畫紙card block，又係20蚊，買埋。
木顏色筆、2mm鉛芯筆
Koh-i-noor
最近唔知做咩重投木顏色筆嘅懷抱，每次見到文具品牌都買一兩支單色筆做留念。Koh-i-noor係捷克本地文具品牌，走可愛、兒童路線多過功能性。上年買過兩支鉛筆，寫感唔太順，被紐倫堡嘅Faber Castell比下去。今次呢幾支都係見佢夠平，貪得意試玩下。
不過佢嘅多色筆有好多色系，平時寫手帳或者多色背景嘅時候就好啱用。不過最好買之前試試色，混色效果有時候無你想像中咁靚。
Sarasa Clip早幾個月出嘅Marble色系列有異曲同工之效，買邊隻就睇你想用黎寫字定畫畫啦。
明信片
Mucha museum
其實我無入到去參觀真跡，但就去咗紀念品店買postcard。呢位師兄睇嚟幾鐘意𥄫女同畫女，而畫中嘅女仔好多都好有自信。不過之後發現唔少地方都有呢位畫家嘅postcard，唔一定要到Museum先買到～
註3：布拉格郵票係好靚，但上年寄左三張無一張收到T.T，所以唔再丟錢同心機落海喇…
早餐🥣
Lidl
我明白大家食muesli或者粟米片多數都係為健康，不過加朱古力粒真係好好食！好食到我要專登去布拉格走水貨！
無辦法啦，瑞典真係搵唔到有朱古力粒啊嘛…我唔要coco嗰啲朱古力味嘅粟米片啊！唔同架！
小結
物價越低，使錢就越豪爽，結果花費同英國、奧斯陸差不多。不過係值得嘅～買一大堆嘢返瑞典慢慢搣，之後又可以使少啲！
附上卡片同單據：
P.S.同場加映 H Fung 掃貨嘅Palladium商場，建築美感我就無咩意見喇，但入面wifi係唔錯嘅~而且外面有個復活節小市場，無old town square咁繁忙，可以一戰！
無啦...自己都覺得呢篇嘢無咩內容，唔放收費文章喇。
不過如果你有興趣支（資）持下我玩文具嘅話，樓下隨緣樂助啦！為表答謝，你可以留一段你鍾意嘅歌詞/quote，中英皆可，我會用brush pen寫完放喺instagram：）【真係optional，唔使見我打咁多嘢覺得我好慘，你就咁inbox我都會寫俾你架:D】
