大時大節,大家少不免喺各式各樣嘅派對三兩杯落肚。可惜偶爾發生飲酒猝死事件,令人關注飲酒對健康嘅影響。史兄借此機會講解一下,等大家飲酒飲得健康啲,好玩之餘又留得住條命仔。留得青山在,那怕無柴燒?沒有國,哪有家?
問:點解喜慶節日要飲酒?飲可樂(或其他飲品)唔得㗎咩?
答:人類可以係短時間內飲得最多嘅,一定係酒,多過可樂雪碧,多過好立克,多過利賓納,多過水。你有冇見過人一次過飲十幾罐可樂?偏偏有人會飲十幾罐啤酒。三兩知己一晚可以開四五支紅酒,邊有人開兩三支葡萄適?我試過溝女同人猜好立克,一局一杯,玩到五局,對方已經投降啦仆街。保礦力廣告話佢最接近人體體液,其實酒精先係真命天子!其他飲品代替酒,非不為,實不能也。