＊＊＊警告＊＊＊
此文含大量廣東話粗口，完全沒有任何教育意義。
呢個系列係講一個三十幾歲麻甩佬嘅一啲嗜好同中意嘅嘢，包括食煙、飲酒、講粗口（呢篇）、儲唐老鴨、睇AV，同林嘉欣……嗜好應該得咁多。嗜好，唔使諗得咁複雜，三十幾歲人，想做咪去做、想寫乜咪寫乜。
＊＊＊警告＊＊＊
廣東話粗口－最常用嘅屌、撚、鳩、柒、閪－當中四個同男性生殖器官有關，唔係男性生殖器官、就係描述男性性行為，淨低嗰個係女人生殖器官。粗口係透過侮辱對方或對方嘅親人（當中以老母為頭號受害者，lead by a distant margin），以發洩不滿同取得心靈上嘅快慰。毫無疑問，粗口係一種古代父權、充滿性暴力、好撚封建古板嘅一種語體。
對我嚟講，粗口反而係我同老竇自小建立嘅獨特連繫：我啲粗口，全部都係老竇身上學返嚟，仲要喺未夠小學三年班之前已經學識晒。要用「喺老竇身上學返嚟」，而唔用「老竇教我」，係因為偷學返嚟，唔係佢開班教，就好似《風雲》中步驚雲咁偷望無名教劍晨莫名劍法跟住自己暗啞底學咗一樣，話係無師自通又得、名師出高徒又得。而我同老竇性格、處事方式、對世事嘅睇法都南轅北轍，身形同個樣更加唔似有任何血源關係嘅背景下，粗口就成為我從佢身上得到絕無僅有嘅「遺傳」。
老竇好中意講粗口。可能佢係孤兒，細個無讀過書，無朋友同佢玩，大個咗唔識發洩自己嘅情緒，結果無論佢開心同唔開心，一概以「屌你老母」嚟表達：
佢開心嗰陣，會笑笑口講：「屌～～你老母個臭閪。」
佢唔開心嗰陣，會好嬲好快咁講：「屌你老母個臭閪，屌你個冚家剷。」
聽老竇講嘢，係件好撚過癮嘅事，因為同樣嘅三幾組詞語，可以單靠語氣同音速嚟表達喜怒哀樂唔同嘅情緒。真係來來去去嗰幾組字，佢唔會用柒、撚同鳩，只會用「屌」、「屌你老母」、「臭閪」同「冚家剷」。
老竇仲會喺《成報》上面瘋狂咁寫粗口，包括好多「屌你老母！」、「屌你！」、「含家剷」、「仆街」、「臭閪」。唔知點解零零舍舍「屌你老母！」、「屌你！」先有感嘆號！小時候有報紙就睇，結果我小一小二唔止識講，仲識寫廣東話粗口。
我試過偷偷學寫粗口，跟住老竇啲字喺《成報》上面寫「屌你老母！」連個感嘆號都偷學埋。阿媽發現，畀佢話好學唔學，學老竇講粗口，等我大個啲先去學同講。後嚟我繼續寫，點知畀老竇見到，今次係藤條炆豬肉……呢啲咪叫只許州官放火囉。
「等你大個啲」，萬能key嚟。
屋企有個粗口大師，我小學嗰陣對於最常用廣東話粗口，即係「屌」同「閪」，嘅認知同運用已運珠掌上，易於反掌。老竇偶爾有講「撚」，但好少用「柒」同「鳩」－我幾肯定「柒」同「鳩」係高登文化出現後，先開始多人用。有個教師朋友講，而家啲細路原來唔知「硬膠」、「膠膠哋」嘅「膠」字，其實係來自「鳩」……細細個學好粗口係幾重要呢，唔係自己講咗都唔撚知。喺偷雞摸狗嘅學習環境下，我對於粗口已經好了解，如果當年老竇肯認認真真教粗口，我已經快過村上春樹拎撚咗諾貝爾文學奬。
學識講同練習寫粗口都好一段日子，到真正第一次喺公開場合講粗口，唔係喺立法會議事廳，係小三嗰陣喺學校。有次同同學嘈交，我對住佢大聲講：
「（你條）仆街呀！」
然後一手推低佢，再一腳踩落去佢個肚度，可惜唔夠力踩死個同學。老師聽到有人講粗口，過嚟大聲問：「邊個講粗口？」
我無認，因為……
仆街根本唔係粗口。
仆街係粗口，死人頭、食屎都係粗口啦。
點知老師又無追查落去，事情就不了了之。
平時阿媽千叮萬囑，阿爸點爆粗，作為細路都唔可以跟住做，「等你大個啲先」。好啦，今次講完粗口無後果，好撚爽。小朋友中意挑戰權威，自此就開始爆粗，由仆街進化到小五六嘅頂你個肺、你老母，再去到中學狂講屌你、冚家剷、鳩閪柒撚乜都講。嗰陣粗口係口頭蟬，尤其打波嗰陣，要畀下馬威對方等佢唔會foul鳩你，一定要扮惡。一講粗口，啲有潔癖嘅人就覺得你好惡（唔信問下翠如啤啤）。越打得波多，粗口講得越勁。
雖然平時對住同學波友爆粗爆得好勁，但對住學校阿蛇miss大概忍得住口。唔係唔想挑戰權威，而係你好哋哋屌佢做乜？你平時屌開佢，到你真係想開佢拖爆佢樽嗰陣，又點算？我對住長輩老師，曉自動自覺轉去無粗口頻道。
可惜，有次終於唔覺意爆咗粗，破咗童子金身。
中五開學，中文阿蛇叫交暑期作業。佢話：「之前叫你哋做第一至第十章……」
我明明記得佢暑假前只係話做第一至五章。做少咗一半，應該要畀人罰；心有不甘，喺位對住佢大叫：
「屌你又話做第一至五章嘅。」
講完，坐附近班滋事份子就大叫：
「嘩，史兄條粉腸講粗口！罰佢啦！！」
我大聲講：
「下？乜我講咗粗口咩？」
班友以為我講笑，哄堂大笑。我一臉疑惑同無辜咁望住阿蛇，擰擰頭，用口形講「我無講粗口呀～～～」。
阿蛇望住我，我望番佢。傾刻間四周靜寂，漆黑一片，四野無人，兩把大光燈打落我同阿蛇度，兩人互相對望咗五秒，四隻眼作出非常深入嘅交流同接觸……好在我係男仔，唔係告佢性騷擾。
突然，阿蛇大聲呼喝周邊班花生友「你哋唔好嘈」，轉身就走。我居然無記過、無收家長信，乜事都冇。人生兩次當眾喺學校講粗口，都全身而退，真夠運。
落堂問返同學我講乜粗口，班友仲以為我玩嘢，死唔肯講我知。思考咗幾年，我諗嗰陣個屌字唔係啦長嚟講（唔係「屌～～～～你」），而家縮咗半咗音跳咗落去個你字度。所以除非好專注咁聽，否則好容易聽漏第一個「屌」字。講粗口講到講嗰個又唔知、聽嗰個又聽唔到，似乎我講粗口好似冧女啲甜言蜜語咁咁順耳、咁sweet。哈哈哈哈哈。記住呀！冧女唔可以講「屌你」－「屌你」係要做出嚟嫁。
你問，講唔講得粗口？講得，但要睇場合。如果你有仔女，我唔會叫你喺仔女面前唔好講粗口：粗口只係發洩情緒用，唔係乜嘢十惡不赦嘅事。要教識啲仔女知道乜嘢係粗口；仲要越早越好，廢事佢畀人鬧都戇鳩鳩唔知道，仲周圍問人「屌你老母個臭閪」點解。你亦唔使話佢知幾時應該或者幾時唔應該講粗口。要教嘅，唔係純粹嘅do and don’t－呢啲好低層次；你要令仔女學識同應用判斷力，自己去思考乜嘢係do and don’t－呢個更加重要。
上段有句「屌你老母個臭閪」。我曾經為呢句粗口，同老竇狠狠咁隻揪過一鑊。
中一嗰陣，老竇老母仲未離婚。有日佢哋兩公婆又為芝麻綠豆嘅嘢鬧交（btw，如果係為啲好重要、影響好深遠嘅嘢而嘈交，嗰啲叫「外交」）。阿媽好勁，一路喺廚房洗碗，一路同喺廳嘅老竇拗交，仲要一嘈個幾鐘。
拗得面紅耳熱之際，老竇走去廚房門口，對住老母講咗句：
「屌你老母個臭閪。」
問心，老竇用呢句嘢鬧老母（同阿婆）鬧足十年，我一早應該慣咗，慣常程度等同樓下看更嗰句「史生你出去呀？」。但嗰排可能係阿婆生日，我見佢屌阿婆（aka我老母個老母），忍住唔就加咗句：
「臭閪關你撚事？你舐過呀？」
呢句嘢，好似後嚟小巴上一對情侶「臭閪你又舐？」嘅笑話。
「屌你呀！何止閪臭，連佢邊邊波大波細我都知！」
老竇火遮眼，九唔撚搭八回我。問佢有冇舐過我阿婆個閪……點知佢答咗我阿媽對嘢……你話係咪九唔撚搭八先。
當年我梗係無咁樂觀、風趣同阿Ｑ，識得自我安慰。一聽呢句「連佢邊邊波大波細我都知」，半秒就上火，變撚咗超級撒雅人。喂，你啲無老母嘅，咁撚侮辱嘅嘢，都講得出口？（其實我唔妥老竇好多年。應該唔妥咗佢12年……當年只係得12歲。）
一直以嚟嘅不安同不滿，即刻喺腦海湧晒出嚟。
───
咁多年嚟，老竇完全控制唔到自己嘅情緒，郁下就為小事發脾氣，亂講嘢、亂掉嘢。小五嗰陣，阿媽溝枝利賓納，畀我帶返學飲。某次老竇同阿媽因為食飯時間嘅早遲而發撚咗癲（話咗佢哋會為小事而嘈交），不自控咁喺屋企亂掃嘢，掃呀掃，最後一嘢掃咗我枝1.25公升濃縮利賓納落地。
到今日，我依然記得枝利賓納跌落地嘅情境。我化身變種特工嘅Quicksilver，世界好似開咗慢鏡，我眼中枝玻璃利賓納首先由電視機機頂慢慢跌落去組合櫃櫃面，玻璃樽中間位置接觸到櫃面、抵不受住反動力而裂開；好似漿糊咁杰嘅利賓納沿破裂嘅位置爆出嚟，一櫃面、一地都係。地下好似有灘血咁……
細個好中意飲利賓納，對於嗰枝濃縮版利賓納，珍而重之。沖到最後，會再倒啲熱水落個樽度飲到一乾二淨，好似啲阿爸叫個仔飲咳藥水咁，明明飲撚晒都要倒啲水去再飲埋佢。
更重要係乜？枝利賓納係前兩日阿媽先買！！！我老竇一發癲，成枝利賓納就冇咗！！！對於呢件事我一直記喺心裏面，搵機會復仇。
───
「連佢邊邊波大波細我都知！」
一聽呢句即刻上撚晒火。
我一手推開老竇，跟住同佢打起上嚟，扭作一團。
但與其話係隻揪，倒不如話我係畀佢打。嗰陣中一，未發育、唔夠一百磅、完全無肌肉，身形似非洲嘅飢民；而老竇係一個水電技工，幾鋼條下，又好撚好力水。結果我完全無還手之力，只有不斷食拳同弱雞哋呼叫「哎呀」嘅份兒……
喺就嚟畀人打死之際，眼尾望到牆角有把長鐵呎。
唔拎武器同呢個水電技工打，等同送死。我向牆角且戰且退，感覺到夠手長拎把鐵尺，諗都唔諗，即刻用右手拉把呎出嚟，轉身由高向下，打斜劈落我老竇左邊面。
「啪！！！！！！！！！！！」
我劈中咗老竇副眼鏡，玻璃應聲爆破。
喺我仲想追擊劈第二下嗰陣，老母已經無聲無息企咗喺我隔離。佢一手托住我右手手肘，止住鐵刀嘅去勢，講咗句：「你仲劈？想劈死佢呀？」
.
.
.
.
.
.
.
.
.
.
.
嘩！阿媽你患撚咗斯德哥爾摩症候群？你條死左膠！我幫緊你，你仲話返我轉頭！
但阿媽呢幾句，我先從暴走中冷靜過嚟睇返老竇。
好在佢有副眼鏡，鏡片又夠厚，我一嘢劈落去，只係玻璃外面爆咗（唔排除係我皮包骨所以根本無力水揮刀）。老竇無受傷……如果唔係副眼鏡擋一擋，阻住我嘅聚龍一擊，老竇輕則變石黑龍、重則變聶風；我就輕則守行為，重則入男童院畀人玩菊花……
［圖：左為石黑龍、右為聶風］
隻揪之後，同老竇有好幾個月無任何對話；後嚟大學搬去同老竇住，二人關係跌至冰點（但唔好問點解又會一齊住）。直到多年後投身社會、佢搬去公屋住，大家少見面少磨擦，更加珍惜相處時間，關係先大幅改善。我聽唔少人講過，同屋企人分開住、少啲見，關係反而好咗。人同人之間嘅相處，真係好撚奧妙。
我亦無再同老竇隻揪……唔係因為打唔贏佢，而係佢糖尿病（報應呀！報應呀！等你成日屌人老母呀咧！），體力同視力大不如前（用得太多寫輪眼之故），打贏佢都勝之不武。
所以，粗口要揀啱地點、時間、情況同對象。揀錯、講咗，有啲嘢返唔到轉頭。
鏡頭一轉，去到現代。啲人話我寫文好有風格（我知呀！唔係點出幾本書？），最有特色嘅係文中好多粗口。雖然無人問，但點解會喺文度寫粗口呢……
－用廣東話寫作，我手寫我心。咁我有講粗口，文章有粗口，好正常。
－文章題材多數仆街賤格，加入適當嘅粗口可加強語氣，風格嚟。如果我問自己（自我吹噓出沒），史兄嘅文字有乜風格，我會答你：廣東話、粗口、史兄體、笑話、錯別字（究竟一個人有幾無恥先可以話寫文有錯別字係自己嘅風格）。（註）
－我計算埋「一般人都覺得粗口好可怕」呢個睇法。我無咁得閒留意有冇人抄我文，唯有用啲防守策略。我就從xanga年代就發現，只要你喺啲文度加粗口，好多網上嘅賊仔－特別係針對大眾市場嘅網站，都唔會偷你啲文。佢怕貼粗口，所以偷你文，要由頭到尾睇一次，再刪走啲粗口。咁麻煩，自己寫一篇或者去偷其他無粗口嘅文章仲好。採取呢個保護自己嘅策略，令我咁多年嚟好少畀人偷文抄文（當然有啲仆街真係可以無撚恥到連粗口都copy埋）。相反，粗口又唔會影響真正睇文嘅人。整體嚟講，粗口對於防止畀人偷文真係有百利而無一害。
我承認有粗口，但絕對稱唔上係「好多」。記得做過統計，粗口入文嘅比率只係大概1%，即一百個字得一個粗口。再者，我同人講嘢嗰陣好少講粗口。
原因有兩個：
第一，我真係好少講粗口。起碼，比我寫嘅文少。嬲同發脾氣嗰陣，爆粗爆得好勁，但同朋友食飯吹水，開心事嚟，好哋哋爆咩粗？粗口係一種情感嘅表達，唔係陳奕迅啲歌，話唱就唱，隨時隨地拎出嚟表演。
第二，我講粗口講得好順口，分分鐘講咗你都唔知。無錯，講粗口有順耳同唔順耳之分。有啲人講粗口，好撚梗耳，即使佢哋啲屌鳩柒撚閪放啱位，講出嚟都仲係好梗耳。相反我講咗接近三十年粗口，殿堂級人馬，有信心講得好順耳，講完你都唔覺我講咗。
經過咗咁多年，我發覺粗口已經唔算係種侮辱。要侮辱你唔使講粗口，講粗口亦可以好有禮貌，兩件事係無關係。我同老竇溝通，搭句粗口，就好似再興嘅燒味飯點都要加條老油菜一樣。
粗口，係一樣工具。唔好同我講乜嘢道德、講粗口唔禮貌，呢啲嘢留返拜山先講。水能載舟，亦能覆舟，只係太多人講粗口講得太難聽、用得唔啱，搞到粗口低級晒。
雖然我咁中意寫粗口，但我唔會推廣「人人齊愛屌鳩柒」之類嘅愛惜廣東話粗口運動。最好你聽到廣東粗口會四肢無力身體發軟腦袋抽筋，我就可以盡情用粗口恐嚇你，做到我想做嘅事，或者喺你身上拎我要嘅嘢。好多好多年前，公司要炒人，每個部門嘅主管要放兩個人頭上去……問題係我個（小）部門只係得我同老闆，即係我哋要自盡自剔。去同人事部嘈，對面坐住一班師奶。
開頭我哋都好聲好氣，解釋呢樣嘢有幾唔合埋（大佬點樣得兩個人炒兩個人呀？），同埋點解決（其實無得解決，總之我哋賴皮就係）。對面班阿嬸只係好似林瑞麟咁，不斷重複話呢個係公司政策，無得檢討。講咗足足一個鐘，成件事就不斷喺「我哋解釋有乜問題」=>「阿嬸話係公司政策」=>「我哋再解釋有乜問題」=>「阿嬸話係公司政策」輪迴千轉。
講下講下，忍唔住（其實係因為就嚟收市自己啲股票走唔切），用食指中指嘅指骨敲敲枱，然後壓低把聲講：
「八婆，我屌你個老母臭閪。我哋得兩個人，要炒兩個人，四則運算，唔撚掂。二減二等於零呀，屌•你•老•母。
如果你要炒起成個部門，咁你就賠撚埋遣散費、長期服務金、禮金、帛金，全撚部都要。你唔好撚再坐喺度浪費時間，我唔係好似你哋咁食飽飯無屎屙嫁，冚•家•剷。」
講嘅時候無怒意，完全係恐嚇。對面班師奶好似見到外星人咁，面都青埋，個個唔敢再正視我。
係，炒人唔關人事部事，但你唔好浪費時間不斷重複又重複。我講粗口侮辱你，實情係你唔講粗口都喺度侮辱緊所有人，大家打平手。我講完轉身就走－情況最差都係畀人炒，咁佢賠晒錢畀我就由撚得你。
結果，我同老闆都冇事。唔知同嗰段粗口恐嚇有冇關，但自此之後，打去人事部有乜要求，都冇被拒絕過。我唔係成日投訴呢樣、投訴嗰樣嘅人，但遇到啲情況真係離撚晒譜，你唔爆粗係唔會得到應有嘅回應。
粗口好使好用，我完全唔覺得需要戒粗口（點戒？有冇人成功戒過？），亦唔需要避忌。早排有人分享咗一張圖，建議地盤佬如何禮貌地推絕別人：
試下講「這個很有意思」
唔好講「呢個乜撚嘢嚟嫁？」
諸如此類。呢類說話政治正確，但好撚虛偽。資訊越發達，越小越普通嘅事反而可以畀人拎嚟大造文章。港姐講粗口有乜嘢好報導，書有粗口點解要包膠，議員有紋身都可以上報紙，呢啲嘢我點諗都唔明。
所謂中產對呢種對公共空間潔癖嘅追求，令好多人－特別係公眾人物－講嘢越嚟越保守，永遠要政治正確（呢度講嘅唔係政治立場嗰種政治），講錯少少嘢又怕畀人非議、解釋多兩句又恐怕畀人話歧視。於是社會越進步、科技越發達，民智越低落、立場越保守。當呢種風氣同虛偽去到極致，就會有反彈－action force = reaction force。點解美國嘅特朗普(Donald Trump)會咁受歡迎，咁reckless嘅人可以去選美國總統仲要唔係陪跑？可能係美國人對於政治正確嘅語言藝術已經生厭，佢哋寧願揀個口沒遮攔嘅人去做總統。
我唔介意呢種潔癖。無呢種潔癖，嗰陣可能已經畀人炒咗？而家我又識屌人（不論用口、用文字或者真屌），知道幾時要屌人；畀人用粗口問候又唔怕，聽到粗口嗰陣會識還擊，唔係淨係一碌木咁好驚好淆底。
諗返轉頭，好感謝老竇喺我幾歲嗰陣已經教識晒我粗口，仲對住我不停咁講。Practice, really makes perfect.
───
註：呢幾年好努力學習寫作，啲分段、標點符號、用字、句字結構真係諗過度過先寫。寫完仲會改好多次先出街，為求文學性唔好太低同埋讀落去通順啲。無天份、細個嗰陣又唔努力，唯有而家花多啲時間囉！至於錯別字多，係咁嫁咧！未執嗰陣，嚇撚死你呀！
───
【自己廣告：有錢派，有錢派！】
「Medium付費會員回贈計劃」https://medium.com/@relgitsjg/memberrebate-fa5386a67ea4
歡迎大家加入 Medium，follow史兄：
https://medium.com/@relgitsjg
Facebook page：https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
