【德國遊記】一窺柏林被封印的地底世界

寫於2019–01–17，原題為《通往地獄之門？》

首先為本人惡劣既攝影技術致歉！因為急急入左呢度門之後全程唔可以影相。

今朝參加左由Berlin Underworld舉辦既地底Tour，主題係二戰既防空洞(bunkers，應該冇錯掛)，前兩日去左好幾個博物館，就算明唔晒都叫睇左輪二戰歷史，今日就去親身感受一下歷史痕跡，我諗如果我冇黎呢個tour我會後悔，冇野深刻得過親自去行一次。

一入門口已經有種回到過去既感覺，呢個空間入面所有野都幾乎不能觸碰。(因為禁止拍攝，照片取自官網。Photo Credit:Berlin Underworld)

其實戰後絕大部分既防空洞都被破壞晒，以防止德國仲有機會搞WWIII，呢個僅餘既防空洞之所以冇被拆，係因為佢位處地鐵站同地面之間，郁佢等如拆地鐵。90年代開始有組織放資源去保育同研究，入面維護得好好，開放得比人參觀既空間已經係重新執過晒，仲有「展品」幫助了解，由廁所開始走訪十間八間唔同既房，感覺唔係話好震撼，但係個個空間入面，好似可以想像當時裡面發生過啲咩事。導賞員真心介紹得非常好，可能打左(歷史)底，我諗接近個半鐘既內容我都明到八成。

有啲房間牆身塗滿吸光嘅熒光物質，真係好難想像長期係無光嘅空間生活，仲要唔係人人都有機會入到黎。為咗活命，可以點？(Photo Credit:Berlin Underworld)

你唔會想像到當時一間房要迫幾多人入去住。(Photo Credit:Berlin Underworld)

有興趣既黎柏林真係要參加下，柏林地底既歷史除左WWII時期，仲有Cold War，而且冬天夏天開放既tour都唔同，有機會的話我都真係要再黎。加加埋埋我呢幾日真係上左太多堂，資訊疲勞了😂😂😂但又係時候去下一個博物館(鬼叫我買左3 day pass!!!)

Berliner Unterwelten (Tour 1) €12
https://www.berliner-unterwelten.de/en.html
(冇得預早訂飛，只可以tour當日早啲去現場買飛)