【英國遊記】Maze Grill商業午餐 朝聖Gordon Ramsey

原文寫於2017–7–30，當年第一次去英國，醒起呢篇食記係因為Gordon Ramsey香港3間餐廳宣布結業。

其實成個trip都好free冇乜點plan，出發之前mark低過想食既野反而冇去，直至trip期間某一日突然間醒起黎到英國冇理由唔試下Gordon Ramsey既餐廳(利申冇睇過佢d節目🙈)其實最想食既菜式係Wellington Beef，不過窮等人家食唔起都係算😆

Google完一輪之後決定去係Mayfair既Maze Grill by Gordon Ramsey，重點係呢間價錢算親民仲有扒鋸，set lunch 2-course £23、3-course £27，我同細佬去到既時候好似都差唔多2pm (因為去到英國適應左之後跟返自己生理時鐘勁夜訓)，餐廳入面冇幾多枱人，有都係行政人員，我地2個「細路」勁causal，不過職員都冇好詫異，我地兩個就盡量behave唔想好似大鄉里，結果係冇乜影到餐廳環境，anyway冇咩特別靚裝修，因為唔算好高級。

一坐低waiter問我地要sparkling water or tap water，呀細佬好「自然」地答要sparkling，我當場😱😨😱😰，心諗今次gg啦樽水一定好貴，但佢都叫左，雖然係照飲但忍唔住擔心左半餐飯。

我地兩個main course都揀左American flat iron steak，因為得呢款扒揀哈哈，我appetizer就揀左buffalo chicken fillets，細佬揀湯(唔記得咩湯&冇影🌚)，記得佢話好飲，咁我個小食都係好食既，但無咩好驚豔既感覺，始終重點係個扒。

雖然我地都叫medium rare，但明顯兩件扒既熟度一定唔一樣，細佬個件一定熟過頭，我個件叫做好少少既🤷🏻‍♀️American style唔興有汁所以對香港人口味黎講係偏乾，配埋d蕃茄仔食係好食d同開胃d，不過個mustard係超好食！完全幫個扒狂加分！

之後食飽飽waiter就埋黎問食唔食甜品，咁我覺得一場黎到無理由唔試埋，就揀左blackberry eton mess，第一次食呢款甜品，其實d蛋白餅係幾好食，不過超甜，食食下就好漏(前面又食得飽)，最後太大兜食唔晒，細佬好似食青檸奶凍之類(冇影)，佢個甜品超酸！

食飽飲夠就埋單啦(其實係趕時間去景點)，話說我最欣賞係英國埋單係夠先進，佢地會拎埋個卡機黎，一般人都係比卡多過比cash，而且比卡都可以AA，完全唔使你夾錢埋單咁麻煩，佢仲會幫你計埋！真係好心香港學下d好野啦唉

p.s. 埋單支水都係£4，我覺得呢d定價好有良心，係香港勁細支Perrier/ Evian係餐廳都可能收你$2x-4x啦，最後連埋service charge ~£34/person🤘🏻