一家其實係五口。仲有一口未提，就係我地隻心肝寶貝白柴。
當決定搬去美國，亦即係個仔都要跟埋一齊走。一刻都冇諗過留低佢，而佢本身有敏感令皮膚好易紅同痕，去乾爽啲嘅地方住可能對佢仲好。
狗隻移民可以揀寵物移民公司或者自己一手一腳做手續。係準備嘅過程，我地去左幾個寵物移民講座，聽下專業人士點做、有咩手續、注意事項咁，最後梗係想佢地sell services 啦。寵物移民公司價錢由一萬到兩萬不等，視乎佢地嘅服務包啲咩，價錢貴嘅會包埋機票、符合規格嘅籠同埋車送去機場等，有啲仲有模擬機艙練習，所以貴平睇下個人需要。聽左一輪，以下係我地覺得比較有用嘅資料：
-狗狗坐飛機時唔建議用藥令佢瞓著，要清醒狀態確保佢呼吸到同自己可以調節氣壓 （未聽時我成日諗係咪要畀安眠藥等佢十幾個鐘安安靜靜，原來係錯的！）
-飛嘅前一個月開始做困籠練習，由短時間每日一、兩小時開始，一路增加等佢熟習個籠
-幫狗狗打國際晶片，等入境可以scan到資料。呢樣我地冇做到，入境嘅時候都冇人掃佢（黑人問號）
揀唔揀寵物移民公司，另一個考慮因素係要睇落腳地規管嚴唔嚴格，如果係複雜嘅文件同流程，當然會考慮搵人幫手。狗隻移民美國算係容易，所以我地決定自己做資料搜隻，自己搞手續～
呢三樣係最重要嘅事：
1. 狗牌
2. 臨出發前7–10日健康證明再加漁護署加簽
3. 訂機位
1.狗牌
狗牌等如狗狗身份證，例明品種同主人資料。通常開始養狗狗時，都會做好狗牌，所以不用多說。未有牌可以參考政府資料。但要留意番狗牌上嘅瘋狗症針有冇過期。
2. 臨出發前7–10日健康證明再加漁護署加簽
首先分享咗我地經驗先。前後打左4–5間獸醫話想做移民健康證明同埋問健康證明會有咩項目。但姑娘會話健康證明係視乎你想包括咩項目，獸醫唔會知道移民當地有咩身體檢查要求，所以要主人例出有咩項目要寫明係健康證明。嚟到呢個位就有啲疑惑喇～重點係要知道你將會入境嘅地方有咩要求。咁我去搵加州Animal control 方面嘅資料，睇下狗隻入境有咩要求。
搵左一輪，以下兩個官方網都有例出動物入口資料，我再Send Email寫明我有隻狗要帶到美國加州，有咩文件需要～大致上就話需要健康證明同打左Rabies (瘋狗症)，同埋叫你參考果度同呢度…. 睇到呢度係咪覺得畀一萬幾千寵物移民公司搞好過，但唔好放棄呀香港人。
之後，朝爸上網搵左啲網友問亦有人樂意同我地分享佢果張健康證明畀我地就reference，其實都係寫身高體重咩品種、幾時打左咩針咁、係咪適合travel咁。(如果有需要都可以PM我)當健康證明完成左之後，一定要拎去漁護署加簽。我地就去左深水埗政府合署整，walk-in入去簽埋30分鐘內完成。
3. 訂機位
訂機票方面我冇特別去搵邊間航空公司，我地坐CX就訂埋寵物機票。我係先訂左大人票過一、兩個成期先去追加寵物機票。寵物坐飛機可以揀跟人坐同寄艙，但跟人坐係有限制，呢度要睇下自己心儀嘅航空公司嘅policy。我地揀寄艙，寵物坐嘅艙叫活體艙，會有空氣同暖氣，同機要寄艙嘅寵物都會放埋一齊。打去航空公司訂票時要講出品種、大小、重量，同佢確定飛機籠嘅大小、check-in流程。出發前，我有再打去double confirm一次booking，確定可以成行。
到出發要帶佢check-in，照正常程序跟人去counter check-in，同地勤表示有狗狗要寄艙佢地就會做手續，記得狗牌同加簽左嘅健康證明要跟身，可以隨時出示。如果check-in時間早左，狗狗可以跟番主人，又或者係check-in counter乾等時間到畀人推去寄艙。見住個仔畀推走，係擔心嘅….
十幾個鐘之後…… 大人完成入境手續(我係LA port)，去到拎行理我地就諗邊度接番飯仔，因為COVID成個機場真係得好少人、好少人，乘客同職員都少，少到連搵人問都難，左望右望一輪先捉到個職員問，佢都係指個地方叫我地等。等呀等呀，期間遇到同機另一位寄艙主人，係外國人，但識講廣東話，而佢係搵寵物移民公司做手續的～交流左一陣，人質出嚟喇，個樣似瞓到蒙左咁，但目測都冇問題。
重頭戲嚟喇，入境！推住行理車，帶佢過關….排梗隊時好緊張，手拎好晒啲文件，怕有咩唔得呀麻～到我地就遞上文件，狗牌、健康證明，職員望左兩望就放行～YEAH！一切比我地想像來得簡單～感恩感恩～
以上就係我地經歷，大家可以當作參考～但都要講多句，手續同文件每個地方都唔同，要因應落腳地而作準～
