家有兩歲女兒,活潑好動,經常跑跑跳跳,係典型嘅「好動派」。正值幼兒學習嘅黃金時期,你唱一首歌、講一句、做一個動作,佢好似一塊鏡咁完全反射出嚟。相信為人父母都知道、都明白,而最緊張果個一定係呀媽,同另一半定各式各樣嘅規則,「唔準係仔女面前睇手機!」,更係First Rule,之後可能仲有好多好多…
其實要白紙一張嘅小朋友守規則唔難,視乎父母如何解釋同協調,可惜小朋友守到規則,但大人往往都會自己親手破壞…
「小朋友要有禮貌呀!」,你會叫佢同陌生人打招呼,但自己一個嘅時候永遠都係目無表情行過…
「小朋友要自己做呀!」,你會叫佢自己執野、收碗,但自己就等偉大嘅姐姐…
「小朋友唔可以講呢啲!」,稍為粗俗嘅說話你都唔會畀佢講,但偏偏你講電話或火山爆發時,佢就完全聽到晒。
「小朋友唔可以睇電話呀!」,你唔畀佢睇,但自己就 “不自覺”係佢面前篤篤篤…
有人話,我都唔想… 之後十萬個理由…
仔女同你講唔想,再畀十萬個理由…你應該一早教訓左佢。
教養小朋友從來都唔易,教朝瞳更令我呢個後生呀媽感受好深。經常係佢角度諗,令自己都會守規則,我真係成長咗。亦覺得人不斷長大,認為理所當然嘅道理就唔會再去反思,習以為常嘅壞習慣就唔會再去反省。
付出金錢去畀小朋友學習,但身教卻遺忘了…為什麼?
後記: 身教有時可能非父母問題,而係身邊親人影響,呢個課題我都未諗通,有待研習,但要我始終覺得嚴人也先要律己都可以感染身邊嘅人!
寫於2017年。