自從香港不再香港，好多人都諗移民，林林總總嘅移民講座同討論Whatsapp谷即刻出現…
一直都冇諗過「移民」，但就係2018年抽中美國綠卡，事情就咁發生…
網上好少抽中綠卡嘅分享，大多數資料都係內地或台灣，所以決定用偉大嘅母語 — 廣東話記底，畀大家參考。
首先講下咩係「抽綠卡」？
美國每年都提供以抽籤形式派發綠卡，英文叫Diversity Visa Lottery，亦有大抽獎之稱。 以大抽獎綠卡移民算係多種移民美國方法中最簡單同低成本。(其它係投資移民、依親移民等等)
而且！一對夫妻只要其中一人中，就可以幫對方申請埋，子女都係。所以，建議兩公婆分開報名，就有兩個機會抽。以我為例，我一人中，老公、呀女、呀仔都有份拎卡。
抽籤人數有一個總限額，再分配到不同地區。而亞洲地區中國係不能參加的。 參加抽籤好容易，每年10月至11月份上 https://dvprogram.state.gov/ 遞表，費用全免，只係網上填表同埋要交合符規格嘅證件相。
2019年10月果期見好多人話submit唔到、又話要用不同browser試，但我果時(2017年)交表冇咩特別問題。而公佈結果就係翌年5月份。想知多啲背景，建議大家多爬文多爬文，而當年我就參考：
〈如何申請樂透綠卡抽籤 — 抽中綠卡的秘密〉
https://usalivingguide.com/how-to-apply-dv-lottery/
但老實講，抽綠卡係當年老公無心提起，「你去整下啦！」
當時連抽綠卡具體玩法係咩我都唔知，中左我都仲係懵盛盛：「下，即係點？」
一切就咁開始。
— — — — — — — — — — — — — — — — — —
本人抽綠卡嘅時間線
2017年10至11月遞表
2018年5月網上查看結果： 中咗 (黑人問號）
2018年9月跟指示遞DS-260 Form (填得好慢，因為無諗住會成事)
2018年12月已經遞Form一段時間都冇回應，Email問大概幾時會Interview
2019年2月收到Email要交文件
2019年4月Email回覆交文件(交得文件幾乎去意已決)
2019年6月Email問大概幾時會Interview，即日收到回覆7月頭
2019年7月頭前往香港美國大使館Interview，Verify所有文件
2019年8月15日收到移民簽證
以上係大約嘅流程，但每個case需時都唔一定，大使館無規定幾時填表同交文件，所以我行動比較慢(再加上未決定走唔走呢..)
另外，我亦識得有網友抽中2020嘅Program，話遞Form同交文件同時進行，有啲改變。
一直申請，自己都係摸石過河，Google大神嘅資料都好零碎，不能盡信，所以真心提醒大家給如果有疑問的話，一定要上 https://dvselectee.state.gov/ 多爬文同直接向大使館舉手發問。
— — — — — — — — — — — — — — — — — —
中籤嘅通知信
呢信封最重要當然係通知你中左，仲有一個「Case Number」，其實佢代表左中籤嘅排名，而之後嘅填表、查詢都係用呢個號碼。
收到封信，佢就叫你自己上 https://dvselectee.state.gov/ 睇，跟佢指示一步一步咁做。
填DS-260 Form
呢張網上form 無規定一日填晒，可以中途save再返轉頭填。大概記得裡面都係填個人資料，但包括埋父母基本個人資料，所以未必可以一日填晒。
跟住張Form 指示直到完成，Screen Cap啲重要資料。
填完Form 等佢出信交文件
所有申請人嘅出世紙、身份證、Passport 、無犯罪紀錄
拎無犯罪紀錄要帶住大使館所發嘅信向警署申請，手續不難
但如果你有曾經出國留學/居住超過半年，就要拎當地嘅無犯罪紀錄
個人認為幾麻煩，因為要飛番當地整或預一筆錢畀律師行代辦
交完文件，等schedule interview 通知你去interview
去Interview前會要求你去指定地方做身體檢查，抽血、度高磅重驗視力同照X-ray內容唔複雜。但我當時有咗BB，就變左特殊情況，我地一家係未做身體檢查就去interview。
到大使館Interview
首先去美國大使館係幾麻煩的，有一系列攜帶物品限制，強烈建議大家去前一定要睇清楚instruction！因為我去整working visa時瀨過野，所以今次一家三口去就醒好多。入到去過安檢、報到，畀人沒收電話，上樓等….
我地約見時間係9點左右，但都等左一段時間…
輪到我地，有位Chinese Officer叫我地將正本文件交畀佢Verify …
正常程序係佢verify晒，齊文件交Interview fee，見官，即日就知批唔批
而我因為大肚未做身體檢查(照X-ray需要寫信)，所以Interview時就變左特殊情況。
當時佢話，「你而家無做身體檢查，今日點都唔會批到VISA，但你可以選擇照交interview fee今日見左大使先。不過最後批唔批畀係未知之數。」
我地心諗請晒假大老遠走到出嚟，唔爭左交埋錢見埋官..
每人$330美金，交完再坐低等…
叫到我地個名時都有啲緊張，因為唔知個官會唔會查家宅、問到篤
一家三口整齊企係個小窗前面等候發落，不過佢只係問咗我同老公叫咩名、做咩工作就完左，仲叫呀女行埋一邊玩住等。 短到我都有啲驚訝。
最後，再見Officer，佢話見完大使無咩問題，去做身體檢查再補交，就會再process我嘅case。要留意嘅係Interview時係7月份，每年DV program會係9月30號完又或者有可能係9月30號前派完該地區嘅移民quota，所以我要盡安排身體檢查。
最最後，8月頭我地完成左驗身再補交報告，移民VISA就兩三日批出。
過程中，我多次同果位Officer 電話溝通，佢都多次提水話，其實抽中綠卡只要家庭背景唔複雜係好易批。VISA批左後，就要半年內到美國報到。
以上係我嘅經驗分享，好讓大家有個概念。
但利申，每個人嘅Background 都唔一樣，手續/情況都可以唔一樣，我自己上網爬文都有不同說法，所以大家參考參考就好。
Follow FB Page 發問
https://www.facebook.com/Family.ChiuTong/
