作品究竟係乜？
作為IT狗嘅我，經常接觸嘅作品，自然就係軟件。一個能夠作為作品嘅軟件，首先就係能夠比人用，亦都即係有一定嘅完整程度。每個IT狗經常都會認為，啲code 可以寫得更好，個structure 可以改得更好。但係時間就係得咁多，可以用嘅資金都係得咁多，個軟件要出街見人，就係有終結、收尾嘅時候，哪怕之後有ver 1.1、ver 2，已經係第二件事。
庵野秀明同松本人志兩位都係我好鐘意嘅創作人，EVA 又好，年終嘅唔准笑系列都好，都係細細個睇到大嘅作品。最近睇咗Amazon Prime Video 策畫佢哋兩個嘅對談，又知多咗佢哋嘅一啲創作上嘅諗法。
電影同動畫製作嘅分別，我哋可能會認為係製作時間控制上嘅差距。電影製作主要都係即場嘅拍攝，牽涉好多演員同工作人員，所以好多時電影監督都唔能夠有無窮盡嘅時間，時間夠了，就不得不妥協完結，進行下一步。當然，如果係杜琪峰同王家衛嘅話，似乎就有唔同嘅講法，但即使如佢哋拍攝《三人行》同《東邪西毒》，佢哋都有資金上，亦即時間上嘅界限。
係NHK記錄「新·福音戰士劇場版:終」製作過程嘅「庵野秀明スペシャル」裡頭，觀眾好似見到動畫製作，好似能夠有比電影長得多嘅研究時間，庵野氏能夠不斷同埋團隊研究創作、表現嘅方法，懸置，再重新開始。松本氏在對談裏頭亦都認為，電影電視嘅製作往往有就算未能滿意亦都要接受嘅時候，看到記錄片嘅庵野氏可以話相當羨慕。
庵野氏就話，其實係一樣嘅。的確，係某個意義下，比起即場拍攝要幾秒內決定得定唔得，動畫係有多一定程度嘅空間。動畫製作可以聽日做決定，可以下星期先決定，但要決定嘅時間始終會有。
「監督の仕事は基本的に諦めるってことですから」
監督嘅工作，基本上就係放手呢一回事。究竟幾時要堅持落去，幾時要放手，就係最主要嘅事。睇「新·福音戰士劇場版:終」嘅時候，都有呢種感覺。作品要有完結嘅一日，呢個唔單止係對作者本身，對同你共事、共同創作嘅人，還是最重要嘅觀眾、使用者都好，即使個結果有幾普通都好。完結唔到，就連作品都稱唔上，只係未完成嘅混沌，呢樣對於創作者黎講，係最為失格嘅表現。
庵野氏咁樣講：當佢三十歲左右嘅時候，創作咗「新世紀福音戰士」，當時作為導演嘅佢開始承擔起監督嘅角色，而呢一刻，就係開始成為大人，能夠成長嘅時刻。
學會放手，先至可以將事件完成，先至可以有下一步，先至可以成長落去。
