近排睇書嘅意欲不斷提升，一口氣睇完《宮前町九十番地》、《日本政治史》同《東印度公司與亞洲的海洋》，而家同步睇緊《反穀》同埋伊丹十三嘅《歐洲無聊日記》，希望呢種感覺唔好咁快比秋天嘅睡意蓋過。
睇書嘅意欲提升之餘，買書嘅意欲亦都提升咗唔少，尤其是好多好書都無買，加上咁耐冇得去日本，亦唔係好想係 AmazonJP 買，究竟幾時可以去神保町同 Book-off 掃書呀。
四方田犬彦出嘅好多本書都好好睇，呢幾年黑眼睛文化翻譯嘅幾本著作可以話惠及不少華文讀者，不過令我入坑嘅係四方田氏同也斯對談嘅《守望香港》。另一本《月島物語ふたたび》就為我哋提供一個作為從紐約歸日嘅批評家對於東京月島嘅各種描述，對於以前係築地行經過，以為只係普通住宅地嘅我，睇嘅時候係一種發掘新大陸嘅體驗。
而呢本《われらが〈無意識〉なる韓国》就係佢另一個經常提及嘅話題－－韓國。比起有一排日本好興嘅嫌韓論，呢本好明顯值得睇好多，講嘅係日韓併合百年、慰安婦、韓國電影的民族主義等等。無意識就是大他者嘅話語，呢本正正就是《われらが〈他者〉なる韓国》嘅延續，日本同韓國嘅關係猶如他者，亦即是無意識。而我，買咗上一本，幾年，都係未睇。
好鍾意睇有關阿嬤嘅題材，最有印象就係《字裡人間》同埋《戀戀銅鑼燒》裏邊嘅阿嬤。呢本《房東阿嬤與我》又係果種天派一個阿嬤嚟改變人嘅生活，有笑有淚，最平凡亦最令人窩心嘅題材。
睇得多八旗出版嘅書，對日=清、日=中關係漸濃，而家手上排咗嘅除咗《亦師亦友亦敵》，就係呢本《「漢文脈」在近代：中國清末與日本明治重疊的文學圈》，探討漢字、漢語、漢文之於日本有何意義，感覺上可以同柄谷行人名作《日本近代文學的起源》一齊讀。
之前睇咗筑摩新書嘅《日本思想全史》，雖然有啲悶，但仍然相當鍾意，近排先發現原來之後有《朝鮮思想全史》，比起日本思想更加一無所知，講朝鮮時代嘅儒教，同解放後的韓國、北朝鮮嘅意識形態，好吸引。
睇《日本政治史》時見到作者補章提到日本嘅幾個殖民地，自然唔夠喉，碰巧聯經推出呢本《「日本人」的界限：沖繩・愛努・台灣・朝鮮，從殖民地支配到復歸運動》就啱晒。呢本以日本對各殖民地的政策，反客為主去討論何謂日本、何謂日本人。要理解一個意義，不妨由佢嘅界限開始認識。之後應該會買埋佢近排嘅佳作《日本社会のしくみ 雇用・教育・福祉の歴史社会学》，從數據、歷史探討日本社會嘅各種習慣、固有構造、獨有的公司架構等等，亦希望往後有中文翻譯比多啲人睇到。
就咁，待續。
