《中國俗語故事》顧名思義就係講一啲中國俗語嘅來源，有見錢開眼、馬馬虎虎、千金小姐、臨急抱佛腳等等。點解我會話佢狗噏，就係因為我最有印象嘅一個「故事」：南無阿彌陀佛。
首先「南無阿彌陀佛」而家睇返竟然定義為俗語，都真係打咗個突。二來「南無阿彌陀佛」相信大家都知其實係來自梵語嘅音譯 Namo Amitābha （नमोऽमिताभा），其文字本身係無字面意義嘅。
不過，呢本《中國俗語故事》就犀利喇，佢話原來中國南方以前就有一座南無山（係咪即係香港嘉頓山／喃嘸山）就有座廟，就特別多小和尚，其中有個就叫阿彌！
呢位阿彌小和尚為人認真、待人誠懇，即使其他和尚做錯事屈落佢到，佢都粒聲唔出當無事。廟裡邊個老和尚就覺得點解呢個小和尚咁奇怪，甚至試吓自己打爛個壺故意問下個小和尚係咪佢做，阿彌小和尚都話係。而家睇返咁樣裝人都真係幾衰。
有次有個乞兒嚟咗間廟乞食，啲小和尚嫌佢爛身爛勢就叫佢躝開，阿彌小和尚當然就係對佢好好比嘢佢食啦。突然個乞兒全身抽筋，死埋，啲小和尚就話呢個阿彌攞嚟賤，條友死左係廟唔該負責。
阿彌小和尚繼續唔計較，二話不説就孭起條屍走咗出去。老和尚跟咗出去，發現條屍發光，大叫原來條乞兒係佛祖化身，都係因為阿彌平時唔計較，所以先至得到佛祖引導上天咋。於是，其他和尚聽到阿彌嘅事蹟，就日唸夜唸「南無阿彌陀佛」，就係為咗學南無山上邊嘅阿彌陀住佛祖，第時有得升天。
我想問，究竟作呢個故仔條友對咗幾多草先至可以作個咁嘅故仔，而啲細路睇完個咁嘅故仔，又學到啲乜？學到比人屈都要忍就係美德？
我好細個信呢個故仔都信咗幾年，好彩之後接觸多咗佛教先知呢個故仔有啲奇怪，唔係我可能以為佛教嘅教義就係教人食死貓。各位家長真係引以為鑑，買呢啲書真係睇下本書，唔好係啲100蚊4本嘅書檔求其買幾本不明來歷嘅童書比啲仔女睇。
呀屌，而家啲細路都唔太睇書，當我冇講過。
PS: 呢度特登scan 呢個故仔上嚟，冇老屈，比大家觀摩一下：
