劣食有兩種，一種是即使係唔太好食都好，因為細個嘅時候同阿爸阿媽、中學同學食過，再食唔係因為好味，而係因為果種味道，能夠重新喚起返記憶中嘅感覺；另一種係仲未食過，但因為未知而誘發好奇心，即使難食都好，果種新奇感覺嘅觸碰，係無辦法喺人生之中再一次遇上。
香港有所謂「豉油西餐」，有一部分始源於一班由於俄國十月革命而逃亡到上海嘅貴族，佢哋響上海發展出平價嘅俄式西餐，亦即後來嘅海派西餐。豉油西餐一開波叫嘅紅白湯之一羅宋湯，同埋俄國牛柳絲飯，就係出自佢哋手。1940年代中共建立前後，上海嘅洋人自然走夾唔抖，結果有啲逃難落到嚟香港，就開咗「皇后飯店」、「新寧餐廳」呢一類西餐。至於另一部分，就係真係咸豐年開嘅廣州「太平館」，創辦人本身學過洋行嘅西餐，之後改良煮法，用豉油代替鹽去醃牛扒、乳鴿，岩晒華人合尺。後來日本仔打到嚟，邊度都冇得避，就避咗嚟香港啦。
紅白湯除咗羅宋湯之外，又點少得白湯嘅忌廉湯。平時去啲茶記，啲忌廉湯通常都係水溜溜，好嘅會有幾粒粟米、杰杰地，無咁好嘅都真係平白一碗忌廉水。點為之好呢，波士頓餐廳第三代嘅負責人就咁講：
「好喝的忌廉湯要香口、忌廉味重，才是真材實料，稀的一定是（用湯膏）開」。
餐廳每周會以牛油和麵粉做兩次大型麵撈，作忌廉湯及醬汁的基礎，「由零開始打麵撈要很細心，起粒粒，湯便不滑」。
麵撈加入上湯、忌廉及鮮奶，煮成忌廉湯後，每天會配搭不同湯料登場，如周一是粟米蘑菇，周二放海鮮成為周打魚湯，下周再重複配搭，變化相當多元。
不過我遇過最L 難飲嘅忌廉湯唔係無料稀勻勻嘅，而係杰L到仆街，而呢一碗忌廉湯記足我十幾年。話說當日夜晚成家人諗唔到食乜，結果走咗去樓下一間從未幫襯過嘅茶餐廳。佢呢就中西餐都好，都可以揀中湯或者西湯嘅，咁我細個就咁係想飲西湯啦。結果個侍擺碗湯上嚟，我就知奶奶地嘢，點解碗忌廉湯係灰色嘅？而且唔係無料，係勁多料，又章魚又瓜，屌你我仲以為你係攞啲中湯啲湯渣嚟煲忌廉湯。一隻羹畢落去，杰到麥皮咁，究竟師傅你有幾善心，先可以加咁多麵撈落去開到咁？
當然我就有試下食嘅，放入口，又鹹，又漿，又有章魚嘅咬口，比到我嘅，係一種混沌嘅感覺，一種黑暗料理嘅感覺。呢碗湯，成功令我之後啲小菜都唔想食，亦成功令我知道平時去茶記啲罐頭湯開水都唔係咁差，要感恩。
而家行過仲係見到間嘢未執，我就唔知係啲街坊咁無要求，定我唔慣食屎。建議大家有幸可以試下，我就唔講邊間，總之就係某某某火車站附近，有興趣都真係唔好搵。我只係建議呀政府立返個「反忌廉湯罪」，快啲再教育下啲忌廉湯都煮唔好嘅廚，好嘛？
