幹綫編號五十年

-五十年間,香港原來已經出現過三代幹綫編號。
-政府話上一代幹綫編號 1974 年實施,原來係流料?
-以前幹綫多而家好多,連山頂道都曾經有幹綫編號?
上集我哋講到政府早喺五十年代已經研究幫新界各條公路編幹綫編號,但最後以擱置收場。去到 1968 年,政府先正正式式採用幹綫編號,而當時所定嘅冧把好多都一直用到 2004 年先由而家套 system 取代。
喺搜集上一篇文嘅資料期間,我哋發現坊間唔少有關初代幹綫編號嘅資料不盡不實,相信係因爲政府手上嘅相關資料都唔準確,所以令市民大眾誤信權威。由細到大成日上嘅「香港地方」網站話 2004 年廢除嘅「第二代幹綫編號」係喺 1974 年推行¹,相信係信錯咗 2003 年環境運輸及工務局向立法會申請撥款嘅文件嘅一句「現有的幹線編號系統自一九七四年起沿用至今,已有九條幹線獲配編號」 。²
所以我哋決定用外篇嘅形式正本清源,理清香港幹綫編號演變嘅脈絡,順便賀下現代幹綫編號誕生五十週年(好似係)。
第一代幹綫編號(1968–c. 1989):長期道路研究嘅長期影響
六十年代尾香港政府銳意改善香港交通問題,除咗搵費爾文霍士施偉拔顧問工程師(Freeman, Fox, Wilbur Smith & Associates)做《香港集體運輸研究》(Hong Kong Mass Transport Study),提議香港起地鐵之外,同一組工程顧問亦都受政府所託做《香港長期道路研究》(Hong Kong Long Term Road Study)。
顧問公司喺報告裏面提出唔少興建新路同改善原有道路嘅建議,當中有好多已經按照顧問建議喺冇耐之後陸續實現,例如機場隧道(而家嘅啓德隧道)、西九龍走廊、獅子山隧道複綫化等等;有啲計劃用另一種方式實現,例如由大角咀經昂船洲同青洲落去摩星嶺嘅西區跨海大橋,算係今日西區海底隧道嘅前身,而由葵涌經城門水塘攀山到沙田嘅五號幹綫就變咗城門隧道;當然亦有部份流於紙上談兵,例如由黃竹坑經赤柱同大潭水塘去柴灣嘅 81 號幹綫公路。
81 號幹綫算係《香港長期道路研究》裏面未能實現但影響比較大嘅計劃,雖然最後都係落實唔到,但係如果計擱置嘅道路工程當中,佢嘅知名度都算係幾高,甚至呢一兩年南區區議會質詢運輸議題嘅時候,都有提及八一號幹綫。
但係講到《香港長期道路研究報告書》裏面影響最深遠嘅建議,除咗嗰一系列改善本港道路基建嘅計劃以外,就一定非幹綫編號莫屬。份報告按照道路嘅功用,將市區嘅公路分做三個等級(見表一),而最高嗰兩級就會有一位或者兩位數嘅幹綫編號。³


最初政府喺對外公布公路計劃嘅時候都會用呢啲冧把當項目名稱,所以報紙都會提到幹綫編號。譬如城門隧道工程最初係叫「第五號幹綫城門段」,後來先定名爲「城門隧道」。⁴而最遲喺 1978 年,政府已經喺路牌上用路盾標示一個位嘅幹綫編號。不過兩位數字嘅支綫編號,就重未搵到資料顯示政府有正式喺路牌上用過,加上政府係規劃道路網嘅時候都會用呢啲編號作溝通,但呢啲支綫因為多數唔係主要基建,而係本身已經非常出名嘅道路,所以根本唔需要用幹綫編號代稱。基於呢個原因,支綫編號嘅曝光率非常之低,以至為人所淡忘。
1974 年政府發表《香港交通政策建議書:歡迎各界人士提供意見》諮詢文件,就有三幅圖解釋當時嘅公路改善計劃,全部都用幹綫編號做識別,港島區更加有兩條冇係《長期道路研究》出現嘅新幹綫,分別係中環上山頂嘅 72 號幹綫,同埋橫貫半山區嘅 15 號幹綫。⁵呢兩條幹綫都只係曇花一現,暫時未喺之後出嘅其他文獻搵到佢哋。



至於呢套「初代」幹綫編號系統係幾時先被取代?我哋搵嚟兩本八十年代尾由路政署出版嘅《香港道路》刊物,由裏面嘅地圖去觀察幹綫編號嘅變遷。
正如我哋之前所講,政府官方嘅講法係 1974 年第一代幹綫編號由第二代編號取代,但由上表可見,呢個講法並唔正確。至少去到 1986 年之後,3 號幹綫先由紅磡去東九龍嘅公路,變成指西隧至大欖隧道嘅幹綫(原本叫「X幹綫」)。而雙位數字幹綫編號例如 23 號幹綫、42 號幹綫之類,去到 1989 年仍然有標示。
翻查舊報紙,1988 年 10 月報紙已經將原本嘅「X 幹綫」改叫「第三號幹綫」,由此可見當時第一代幹綫編號已經畀第二代取代。當時政府正係喺度籌備《第二次整體運輸研究》(Second Comprehensive Transport Study,CTS-2),考慮到第一代幹綫編號喺源於《香港長期道路研究》,唔知第二代幹綫編號嘅推出同呢次 CTS-2 研究又會唔會有關?
綜合以上資料,我哋可以推斷幹綫編號由第一代變成第二代,係 1989 年前後幾年間嘅事,而唔係一直流傳嘅 1974 年。1991 年大老山隧道通車嘅時候,已經係孭住 6 號幹綫嘅身份,原本嘅 6 幹(青山公路—荃灣及葵涌段)已經降格做非幹綫。

第二代幹綫編號(c. 1988–2004):小修小補
八十年代尾推出嘅第二代幹綫編號,其實好大程度上係基於第一代編號修改而成。兩者嘅分別在於:
- 喺 1989 年後,取消所有兩位數字嘅次要幹綫編號,唯一剩低嘅兩位數幹綫係後來追加嘅 10 號幹綫(陰澳經大嶼山港口同青洲填海區至堅尼地城);
- 原本嘅 3 號幹綫(紅磡至油塘高超道)由紅磡至牛頭角同埋由牛頭角至鯉魚門道近將軍澳道嘅路段,分別併入 2 號幹綫同 4 號幹綫,令 2 幹成爲由落馬洲經元朗、屯門、荃灣、西九龍走廊、加士居道、東九龍走廊、機場隧道去到觀塘嘅超長途幹綫,而 4 號幹綫就接收埋 41 號幹綫將軍澳道同將軍澳隧道一段,由牛頭角延長到將軍澳;
- 3 號幹綫呢個冧把改爲用喺元朗去西營盤嘅「X 幹綫」,以配合機場核心計劃(玫瑰園計劃);
- 原 6 號幹綫(青山公路柴灣角至蝴蝶谷)取消幹綫身份,將 6 號幹綫呢個冧把騰出嚟,用喺新起嘅大老山公路、大老山隧道、觀塘繞道同東隧。


以下摘錄 1997 年特區政府年報《香港—邁進新紀元》對當時幹綫網絡(正式名稱係「主要道路網」 Strategic Road Network)嘅描述:
主要道路網的骨幹是一號幹線,由港島南岸的香港仔開始伸展,穿過香港仔隧道、海底隧道、九龍半島、獅子山隧道、吐露港公路、粉嶺公路和新田公路,直達新界北部的落馬洲邊境管制站。
港島的八號幹線由海底隧道沿著北岸伸展,經過東區走廊,直達東部的筲箕灣和柴灣。七號幹線則由海底隧道沿著北岸向西伸展,經過告士打道、夏愨道和干諾道,直達堅尼地城的山道。
九龍的二號幹線由九龍灣填海區伸展,穿過機場隧道,沿著東九龍走廊和西九龍走廊、荃灣路、屯門公路和元朗公路,直達新田公路和新深公路的交界處。四號幹線則沿著呈祥道、龍翔道和觀塘道伸展,穿過將軍澳隧道直達將軍澳。
五號幹線是另一條主要道路,長 7公里;這條雙程主幹路經象鼻山路和城門隧道,連接沙田與荃灣,是新界環迴公路系統的一部分。六號幹線包括東區海底隧道、觀塘繞道、大老山隧道,以及連接大老山隧道與吐露港公路的接駁道路。⁶
呢次幹綫編號改革,畀人嘅感覺某程度上係爲咗讓兩個冧把畀兩條新幹綫,所以夾硬將一啲幹綫溝埋做瀨尿牛丸(尤其係將 2、3 號幹綫夾埋做超長嘅 新 2 號幹綫,而家睇返實在過份),結果幹綫編號失去 wayfinding 嘅功用。

第三代幹綫編號(2004–)
現有的幹線編號系統自一九七四年起沿用至今,已有九條幹線獲配編號。由於編配這些幹線的號碼並無邏輯規律,市民記認這些路線和號碼或有困難。現有的幹線編號系統應作出重整,使駕車人士使用和記認時更為方便。
—立法會交通事務委員會文件《改善方向指示標誌》⁷
第三代幹綫編號推行嘅契機,係 2002 年運輸署請顧問公司做嘅「香港方向指示標誌綜合檢討」研究。顧問公司其中一項建議就係重整幹綫編號,同時仿傚外國引入出口編號,合稱「 香港主要幹綫、出口編號及里程標誌系統」。有別於第一代幹綫編號由工程角度出發,呢次顧問公司大執幹綫編號,出發點終於係爲咗方便認路,甚至有個講法話駕駛者出發前事先記住要用到嘅幹綫同出口冧把,揸車嘅時候就唔會分心搵路,亦唔會出現臨急轉綫嘅情況,所以新嘅幹綫同出口編號可以改善道路安全喎。⁸
根據官方講法,第 1 至 3 號幹綫係三條南北向幹綫,按照各自嘅過海隧道路段嘅通車次序編號碼;4 至 8 號幹綫就係將四條東西向幹綫連埋日後嘅中九龍幹綫,跟地理位置由南至北順序排;而 9 號幹綫就係新界環迴公路。新系統亦都爲當時起緊,後來喺 2007 年啟用嘅港深西部通道預留 10 號幹綫呢個號碼。
呢次幹綫編號轉換可以話係翻天覆地,新嘅 1 至 9 號幹綫當中,只有 3 號幹綫係順利由上一代平穩過渡到第三代幹綫系統而完全冇任何改變,有傳係因爲大欖隧道嘅專營公司叫「三號幹線(郊野公園段)有限公司」,如果改第二個冧把會牽涉到不必要嘅行政麻煩,所以就搵辦法 keep 住 3 幹呢個號碼。另外,昔日「主要道路網的骨幹」1 號幹綫,亦都喺新一代幹綫系統中保留到大概一半嘅路段,另一半就割咗畀 9 號仔。其餘咁多條幹綫,喺實施新一代編號之後,基本上冇任何一段可以 keep 到之前嘅冧把。
呢套新嘅幹綫編號喺 2003 年正式對外公佈 ⁹,2004 年初開始實行,同年 5 月政府當局完成更換幹綫路牌嘅程序 ¹⁰。同上兩代幹綫編號一樣,新一代編號喺路牌上用黃色路盾顯示,分別在於路盾裏面冧把嘅顏色—以往個號數用色會跟返路牌底色用藍色或者綠色,而家就改成全部統一用晒黑色。
跋
現行嘅幹綫編號系統可能同前兩代幹綫編號一樣,或者冇乜人會刻意去記,日常都未必有人會學似政府宣傳咁,記三個數字就去到目的地;但呢代幹綫編號比起過往兩代更有規律、更容易理解,係不爭嘅事實。
前年施政報告又提出重啟北大嶼山至元朗公路嘅新公路可行性研究,但就將佢納入 11 號幹綫。其實 10 號仔同 11 號仔喺第二代幹綫編號系統裏面都係屬於 10 號仔,不過直到嗰代編號廢除一刻,全條舊 10 號仔都仍然係一條紙上幹綫。將其中分拆做 11 號幹綫,睇落好似破壞咗當年設計者嘅一番心意咁。政府話「當深港西部通道(現稱為深圳灣公路大橋)及后海灣幹線 (現稱為港深西部公路)啟用後,運輸署按道路編制將深圳灣口岸至藍地的幹道編訂為十號幹線,而北大嶼山至元朗的連接路則改稱為十一號幹線」。¹¹
幾個月後(hopefully)中環及灣仔繞道通車,會取代夏慤道、告士打道同維園道,成爲 4 號幹綫嘅主要部份;而同樣應該會喺呢兩年內啟用嘅屯門赤鱲角連接路,通車後將會歸入 10 號幹綫(多謝讀者提醒),令到 10 號幹綫未來會出現兩段互不相通嘅路段(亦都解釋到點解要將青龍大橋拆做 11 幹),直至尚在研究階段嘅屯門西繞道起好爲止。
但係大體而言,除咗可能加多一條 11 幹之外,今套幹綫編號系統相信喺可見嘅將來都唔會有大變動。
註釋
¹ 香港地方:道路及鐵路 — 第二代幹線編號 http://www.hk-place.com/view.php?id=346
² 環境運輸及工務局,〈改善方向指示標誌〉[討論文件],立法會交通事務委員會文件 CB(1)2049/02–03(01),2003 年 6 月 23 日。http://www.legco.gov.hk/yr02-03/chinese/panels/tp/papers/tp0627cb1-2049-1c.pdf。亦都喺網上見過一個講法,話1974年係政府開始喺路牌上顯示幹綫編號路盾嘅年份。搵到最舊嘅路盾圖片係1978年屯門公路通車初期所攝,見 http://www.library.ln.edu.hk/include/images/eresources/heritage/TuenMun162.jpg。
³ 將呢兩級嘅公路編號都叫做「幹綫編號」其實唔太準確,因爲技術上「幹綫」應該只係指最高級嘅「主要幹道」。如果套用《香港交通政策建議書:歡迎各界人士提供意見》嘅講法,一位數字嘅公路係叫做「主幹路綫」(Trunk route),而兩位數字嗰啲應該叫「次要路綫」(Major secondary route)。不過爲咗方便敘述,呢篇文將會將兩種公路都統稱做「幹綫」,以免讀者混淆。
⁴ 香港政府路政署,《第五號幹綫—沙田至荃灣:城門段》(香港:該署,日期缺)。
⁵ 民政署,《香港交通政策建議書:歡迎各界人士提供意見》(香港:香港政府新聞處,1974年),第 6 頁。
⁶ 〈主要道路網〉,《香港—邁進新紀元》(香港:香港特別行政區政府,1998 年)。https://www.yearbook.gov.hk/1997/ch15/c15d1.htm
⁷ 同註 2。
⁸ 〈新幹線編號系統方便駕駛者〉,香港政府新聞公報,2004 年 6 月 3日。http://www.info.gov.hk/gia/general/brandhk/030604c6.htm
⁹ 〈九條幹線明年初重整編號〉,《蘋果日報》,2003 年 7 月 26 日。https://hk.news.appledaily.com/local/daily/article/20030726/3434729
¹⁰〈支路出口編 300 號碼 易記易認方便駕駛〉,《蘋果日報》,2004 年 6 月 4 日。https://hk.news.appledaily.com/local/daily/article/20040604/4089513
¹¹ 運輸及房屋局,〈870TH-十一號幹線 (北大嶼山至元朗 )的可行性研究〉[討論文件],立法會財務委員會工務小組委員會文件 PWSC(2017–18)23,2017 年 10 月。 https://www.legco.gov.hk/yr17-118/chinese/fc/pwsc/papers/p17-23c.pdf
參考文獻
Freeman, Fox, Wilbur, Smith and Associates, Hong Kong Long Term Road Study Final Report: Report Prepared for the Hong Kong Government (Hong Kong: The Government Printer, 1968). 中文譯名:香港長期道路研究報告書。
香港政府路政署,《第五號幹綫 — 沙田至荃灣:城門段》(香港:該署,日期缺)。
路政署,《香港道路 Hong Kong’s Highways》(香港:政府印務局,1986年)。
路政署,《香港道路 Hong Kong’s Highways》(香港:政府印務局,1989年)。
民政署,《香港交通政策建議書:歡迎各界人士提供意見》(香港:香港政府新聞處,1974年)。英文版:Transport in Hong Kong: A Paper for Public Information and Discussion.
Wilbur Smith and Associates, Hong Kong Comprehensive Transport Study: Prepared for the Hong Kong Government (Hong Kong: The Government Printer, 1976). “CTS-2”
鳴謝
雖然「香港地方」網站呢次信錯政府,但佢始終都係我哋研究香港道路網發展嘅啟蒙網站,我哋都希望喺度向佢哋致敬。

