辭職定轉工，我想講嘅係
適合喺工作中迷茫，係辭職同轉工分岔口徘徊嘅你
某日下午，喺傳媒業打滾左幾年嘅朋友A打比我，想問下轉工既意見。
可能因為天生八卦，又可能因為身兼人力資源工作。過去兩三個月，斷斷續續同唔少朋友探討「轉工／辭職」呢個題目。
朋友A：喂，你覺得XYZ公司好唔好？佢地想我過去幫手。
咩野令你想轉工— 「推拉」因素
我：（省略一段對XYZ公司嘅意見）點解你想轉工先？新公司有咩吸引你過去？舊公司又有咩地方你唔滿意？
借用「人口遷移」概念，人口流動喺兩地「推拉」因素角力嘅結果：
「推」因素 — 不利因素／缺點，例如：人工低、工時長、同上司或同事不合、缺乏晉升機會、沒有學習／發揮機會等等；
「拉」因素 — 有利因素／優點，例如：公司牌頭、人工較高、工時較短或穩定、完善晉升機制、更多學習／發揮機會等。
舊愛有咩令你反感，自然會推你離開；而呢個時候新候選人出現，條件又比前度優秀，轉投他人懷抱，似乎都係人之常情（單身狗單純理解）。
「轉工」喺一件事，「辭職」喺另一件事
朋友A：你都知傳媒業咩景況，我望著公司三十幾歲果班「前輩」，日日如是，技能思維已經追唔上出面。我好驚，驚自己將來成為佢地嘅一份子，咁就一世。而家有機會，條件又唔差，我想試下。
我：明白嘅。不過，我想指出一點：你辭唔辭工，同去唔去XYZ公司，係無直接關係。
我：你同舊愛分手，唔等於即刻有拖拍嫁嘛？同樣道理，你辭職亦唔代表你要去XYZ公司。事實上，仲有好多選擇，仲有好多好男仔等緊你（例如我，唔知醜）。如果列出所有條件，而XYZ公司亦完全符合，或者比其他公司適合，咁咪揀XYZ公司，趁呢個機會轉行囉。
無論你能力幾高，性格幾好，每一次轉工都係「被動」果個，選擇嘅就只有主動獵頭你嘅某某；調返轉，如果知道自己想要咩，市場裡面符合條件嘅你都可以揀。就算可選擇數目差唔多，「主動出擊」，可以省更多時間，搵到啱心水工作。
但係，記著「條路自己揀，仆街唔好喊」。
咩為之「好工」？我認為有三個條件
Sorry，唔係，呢三個先係：
- 待遇：工作基本考慮，包括：人工、職位、年假、福利、公司品牌等（最準確應該用Package呢個字眼）；
- 發揮：發揮到自己所長／強項，或者有能力發展既工作；
- 滿足：工作當中尋找到滿足感，有正面感覺。
如果你現在工作符合以上三個條件，我真係恭喜你呀；
如果符合三分之二，其實係常態；
如果剩係中一個，奉勸你係時候搵一份新工；
如果咁唔好彩一個都唔中，我好好奇，你捱左幾耐？
當然，以上三個條件嘅符合性並非一成不變。隨著時間流逝，個人需要，能力，心態都會改變。今日你認為嘅「筍工」，一年後可能已經睇唔起。
朋友A：好，我諗諗先。從此，朋友A無搵過我了（哭哭）
如果你覺得好睇既，請給我1個掌聲作為鼓勵；
如果你會去食既，請給我2–5個掌聲作為鼓勵；
