為真愛加持

24+1，正是過氣少女準備步入中女之齡。睇相婆話過筆者要求過高、自信爆棚。然而，所謂既擇偶條件只不過係1x歲時作FF之用。回望過去，有幾多前度/心儀的人仔會係自己想像中的模樣？身邊既單身少女們都開始用交友app結識異性，當然成功例子不乏，但失敗甚至出事的例子也屢見不鮮。交友app的文化使筆者這幾年不斷思考真愛的定義。不想站在道德高地去看人性，只想以塵世角度深切剖析現代人的愛。

首先，係愛情，定係感情？求學時期既愛係最真，身邊有不少都係中學時期既愛情長跑跑到黎而家。當中經歷既野，就算呢一世搵到下一個更錫自己既都冇可能take two – 校園裏的小風波、四分五裂的死黨、被公開試既蹂躪、畢業前後的忐忑和彼此處世的初衷。係校園裏既愛係最真最純，最初既愛情如果經歷過以上種種階段都屹立不倒，那就大概昇華至感情。然而，很多東西彷佛變了習慣，習慣一起吃飯、習慣逢下班致電給他、習慣為他買衣裳、習慣了愛、習慣了被愛……這種愛，還算不算是真的？一起了十年的他和她為了事業和未來而爭吵，他因不想被權力和責任綑綁而拒絕升職；但她卻想彼此賺多個錢而快些買樓繼而組織家庭，最後他妥協了，升了職，翌年也買了樓、結了婚。愛情長跑的確令人羨慕，但亦存在妥協。筆者認為真愛係應該由愛情昇華至感情，但如果因為一段感情而改變自己，甚至失去自我，那這段愛可能變質了。

有穩固基石既愛情長跑都會由真愛變錯愛，那交友app情緣呢？交友app，顧名思義係用作交友；不過現代人生活繁忙、經濟產業結構又一面倒、鍾意電話多過人等等等等既原因造就左交友app既興起。真愛，真係愛？女孩子往往會好興高彩烈咁囉住個電話同隔離既閨蜜講 「 唔得囉個樣」「咁悶架呢個」「點解佢仲未覆我呀？」「佢約我聽日出去呀！」etc. 其實，有冇諗過男仔玩交友app又係點諗？講到呢到，筆者要澄清而家唔係上緊sex education，唔想將交友app同覓食畫上等號。只係想帶出一個問題，點解你/妳/您會上交友app？想拍拖？想搵終生伴侶？想覓食（sp囉）？不甘寂寞？有人話交友app係一個渠道，去到邊都有壞人架喇，就咁label左交友app係覓食app係好唔fair。扣緊番今日主題，真愛。玩交友app，通常都會草埋一堆「貨源」，儘管del app，都唔會斷到，因為已經儲到一班裙下之臣，可以係不久將來慢慢篩選。有人話，愛情係盲目。但交友app係令人係愛情中變得計算和不理性的理性。隔空傳情，使人對人觀察力（e.g. body gesture of communication) 逐漸降低，你以為自己盤算著對方，其實可能對方比你高招（玩app經驗）。一個失敗，便next。你沒有時間了解一個「人」，所謂的交友app，不是覓食，也是速食文化的一種。在這快來快去的文化裏，如何讓人學懂建立、維繫、付出和堅持？交友成功 ->速配成功->談下兩日心->（may)見面-> 開post on ig/fb/….->……其實當中，你有愛過嗎？一起，未必是愛；相愛，又未必可以走在一起。

現代人，係愛呀！但又幾多係真愛？究竟人是從失敗裏感恩地愛，還是因寂寞而愛？無論點都好，所有的真愛都經過時間洗禮。無論男男女女、3歲定80歲，希望我們多一點情，多一點同理心，多一點愛人和愛自己 – 愛人如己。