本來一開始,呢個只係一個玩笑 (6)

Ellan Ou
Ellan Ou
Sep 2, 2018 · 16 min read
事不宜遲,小說繼續係Alan, Emma 同 Winnie 幾個人既大學追憶篇。恩恩怨怨都係由此而起。呢度其實都有唔少都係取材至真人真事... 所以睇起黎係幾有真實感(自誇中)。

Emma 諗,如果我都有個咁嘅男朋友都唔錯呀。

但係一秒過後,佢就拍咗自己一下。咪亂諗。

我依家眼前,剩係得讀書咋……

佢一口咬定,啱啱果種感覺,只係Statistics入面嘅error terms,係noise嚟,唔重要嘅。

不過,時間過下又一啲,過下又一啲,佢開始都唔係好清楚,究竟自己嘅諗法係點。

只係忽然間想著靚啲衫,同埋,多咗去Tutor 房問功課。雖然,每次唔係俾Winnie攔住答咗,就係Alan 根本唔喺度。

要搵到佢,實在太難。Emma 心想。

但係有時踏破鐵鞋無覓處,得來全不費功夫嘅。

有次上完Course 經過Building 嘅平台花園,已經差唔多夜晚。

Emma 記得果晚吹北風,有些少凍。

見到Alan 坐咗喺石凳,側邊有幾個啤酒罐。

「喂……你喺度做咩呀?」Emma 問。

「喺度飲酒囉。你飲唔飲?」Alan只係顧住望天地昏沉嘅景色。

Emma 搖搖頭,但係佢決定坐喺Alan 側邊。

今日Alan 著住嘅,係一件白色嘅長袖恤衫,黑色西褲,無束,再加一件長嘅黑色外套。好有學者Feel。

Emma 感覺臉上有少少發燒,不過夜喇,天色漸黑,Alan 應該睇唔到。

Emma 心諗,我都係第一次單獨同一個男仔坐埋一齊。好遜啊。

佢哋兩個良久都無講嘢。終於,Emma鼓起勇氣,開口。

「個Investment Game。」

Alan 諗咗一諗,先記得有個咁嘅Game:

「哦,係喎,Investment Game 喎,點呀最後?」

「我哋贏咗二十幾萬,贏咗啦。」

Emma 其實覺得Alan 都應該知道係咁。

Alan 又仰高頭,喝咗一大口啤酒:

「咁真係恭喜晒你啦。估唔到信個唔知咩人講嘢,你都會有收獲。」接住又馬上教導Emma,

「你呀,第時出到去千祈唔好人哋講咩你就去買添呀,做羊生羊太,一定會輸到痴線。」

Emma急急辯護:「點會呀,我都唔知幾穩陣呀,我……」佢幾乎要企起身。

Alan 打開雙手:「OK OK,唔駛咁緊張,我無話你會呀。只係提醒下你啫。但係都唔好用咩CAPM啦,無用嫁。最簡單,始終只係睇大市,睇隻股有無錢賺,講完。」

Emma 嚟,其實唔係要同佢講咩股票。佢根本一啲興趣都無。不過又唔知想講咩好,只好靜靜咁坐返低聽。

Alan奇怪:「點呀,做咩唔出聲?」

Emma 抬起頭:「吓……無呀,本身唔係好鍾意講嘢架咋嘛,我。」

Alan 笑笑,伸咗個懶腰:

「你真係特別。成個Department 真係好少你呢類女仔。又唔打扮,又唔去Wet,仲居然自己一個會去Tutor 房搵Tutor 問功課。Well,都唔係無嘅,不過係Mid-term Final 先嚟囉。你打算讀上去咩?」

Emma 都唔知Alan係讚緊佢定係點,但係都開心嘅。於是,佢就慢慢咁講:

「都有嫁,但係我資質有限……」

「唓,依家又唔係要拎諾貝爾獎,駛咩一定要資質?」

「你梗係講得口響啦,你本身已經咁勁。」

Alan 彈起身,開始踢啲啤酒罐:「咩你真係覺得我似係讀書嘅人咩。」

真係唔似。第一日已經覺得你唔似嫁啦。但係Emma 無講出口。

Alan 自己繼續講落去:「我其實成績都唔係咁好啫。」

「吓,咩唔係3.9咩?」

「咩3.9呀,你聽啲人亂咁講,3.8幾咋嘛。」(塔按:好憎呢種人~)

「有分別咩。」

「總有少少嘅。」Alan 又執返起啲啤酒罐,將佢哋一個一個咁疊高,「其實Undergrad啲嘢都唔駛點用腦,總之係咁背背背同操Past paper 咪得。唔係好難嫁咋喎。講真,講明,Winnie 明過我多多聲啦。」

「Winnie 仲叻過你?」Emma 覺得天外有天,人外有人,原來真係咁。但係佢覺得佢同Alan 之間已經有成九十幾萬公里咁遠。

「係呀,佢真係好叻。文理樣樣都掂,又識拉小提琴,不過。」

Alan 歎咗一口氣,無再講落去。

佢嘅神情,喺夜晚,都睇得出係有種說不出嘅悲苦。(塔按:俾女朋友虐待真係啲好錐心既經歷黎…)

Emma 呢個時候先醒起,只見佢從口袋拎出一對水晶耳環:「我揀咗好耐,我估應該啱Winnie戴,我留意到,佢有穿耳窿……」

Alan 詫異:「哦,你咁都知?其實,我講笑咋,你真係去咗搵?」

Emma 惱怒:「喂,你成日都講笑,我點知你,邊句真,邊句假?」

Alan 面帶歉意:「唔好意思,唔好意思。係我唔啱,我都知我衰……」

Alan 用手接過,一望,然後一掟。

「喂!你,你做咩呀!」Emma 急急向住佢掟嘅方向一蹤,但係黑喇已經,咩都睇唔到。

「算啦,唔駛睇,無用嫁啦。」Alan 用上比平板電腦更平板嘅聲線。

「吓,點解呀,你果日先仲好開心咁要諗送咩禮物俾佢。」Emma 氣急敗壞咁嘗試搵,但係邊會搵到。可能已經掟咗出去Building 以外嘅草叢入面。

「我哋啱啱炒完大鑊,以佢嘅性格,聽日生日睇嚟都唔駛預我。與其俾佢轟出門口,不如我自己出嚟。」

Emma 望住Alan,都唔知係應該嬲好,定唔嬲好:

「你,白費晒我一番心機。」

Alan 行返過嚟:「Emmazon,今次係我唔啱。我依家俾返錢你。幾錢?」

Emma賭氣,決定叫高個價差唔多一倍:「$2,300!」

「唔會係歐羅呀?」「我講緊港紙。」

Alan 打開銀包,搵咗三張金牛出嚟。Emma 呆咗,痴線,返學都帶咁多錢!

「另外剩返個七百蚊,就當補償你行嚟行去啦。」Alan 都總算有返啲人性。

Emma 本來想俾返零錢,不過算,根本無咁多錢喺身。

只好接過,繼續唔出聲。

「你呢個人雖然唔講嘢,但係幾好玩。」Alan 忽然之間好似回復返平時咁。

「咩……咩喎。」Emma 覺得自己今日一直被兜著走,好無奈。於是佢提起腳,踩咗Alan 一下。

「喂,你咩事呀!!!」Alan 痛到彈彈下。

Emma 覺得自己係重腳咗,但係佢忍住無流露一絲關心嘅神態:

「你……你依家知道啦,我都唔係好惹嫁。」

「你呀,你比任何人都『好嘢』好多。」Alan 望實Emma。

Emma 無講嘢。其實佢塊面,已經好紅好紅。

佢一直都無俾一個咁樣嘅男仔喺咁短嘅距離近望過。

小學,中學,都讀女校。之前做暑期工,側邊嘅Friend又唔會特別親近,直至嚟到大學,先有一個咁嘅男仔,同自己居然單獨一齊。

唔知幾時開始,Alan 個樣竟然順眼咗。佢唔再似係果啲蒲精啦。

Emma 有一下覺得自己個心會裂開。佢吸一口氣,想轉換話題,但係Alan 仲快過佢:「Emmazon,咁我想問你,你幾時生日?」

「過咗啦,你知道嚟做咩。」Emma 無佢咁好氣。

「知下都無壞呀,我鍾意關心我嘅學生。」佢就係咁口花花。

「你無必要知道。」Emma 覺得,唔好俾佢覺得我想佢送嘢俾我。

成件事好似太危險喇。

但係Emma 都有一瞬間,係心頭有啲竊喜嘅。

不過人哋始終有女朋友。無謂搞太多誤會呀。

「咁呀,你咁堅持,我都無謂迫你啦。」

終於,Alan 將所有啤酒罐放入去回收箱。

Emma 多講咗一句:「仲有,我覺得慶祝生日嚟,都無咩意思,呀。」

「點解?」

「人人都有生日嫁啦,有咩好慶祝。反而死先值得慶祝。對地球污染,又可以減一分。」

「哈哈哈,講得好。咁呀,今日就係你生日啦,Emmazon。」

Alan 手舞足蹈,癲起上嚟,真係唔係人咁品。

「咩呀…發生咩事呀……」Emma一時唔識反應。

「Happy Birthday!Happy birthday to you!Happy birthday to you!Happy birthday to Em-ma-zon,Happy birthday to you!好嘢!」

Alan 唱完歌,仲識得用力拍手掌。

Emma見既然係咁,都索性同佢玩到底:「我今日生日,咁禮物呢。」

「有,啱啱好有。」Alan 手一打開,竟然係Emma 買嘅果對水晶耳環。

「咦……咦??」

「嗱,呢個好似你啱啲喎,不過你無耳窿,就Keep 住先,遲啲再用啦。」Alan 放返對耳環入Emma手。

一切都好似變緊魔術咁。Emma 已經唔知關於呢個人嘅事,有幾多係真,有幾多係假。

Emma 低頭,覺得心頭有啲亂,但又有啲欣喜:

「你,你俾返錢,就當送俾我嫁啦?」

Alan一愕,一眨眼:「吓,對耳環原本1200蚊,我記得sales同我講仲有95折,都係1140咋嘛。依家我俾三千你,仲唔係送俾你咩?」

原來佢咩都知。唔通佢一早已經去買禮物果陣,格咗價?

Emma 慘叫:「好衰嫁你。」Alan 只顧大笑。

夜晚,大學入面,每一晚都有好多呢啲動人嘅時刻發生。

但係亦都好多令人心碎嘅時刻同時會出現。

Emma 果晚,唔知點解,輾轉反側,竟然瞓唔著。

「Tutor,我想問……點解我呢題無分嘅。」

有日,Emma上去Office到問返個Midterm果題嘅分。

果日得一個Tutor,就係Winnie。而Alan 就唔知喺邊。

果陣,兩個人既穿著,都比依家唔知要樸素幾多倍。幾乎就係有領Tee對有領Tee,短裙對短裙。一個短髮,電鬈;一個中長嘅直髮,深啡色。但係唔駛認真去聞,都感覺到佢哋中間嘅火藥味。

「哦?呢個,你答唔到Marking 嘅Point,咪無分囉?」Winnie 答得乾脆。

Emma 憤憤不平:「有無搞錯呀,就算真係唔中Marking,但係大學學嘢,就係會有正反兩邊Argument架啦,我言之成理,點解唔可以俾分我呀?」

Winnie 企起身,睥實Emma,一副「無你咁好氣」嘅語氣:「總之,我對所有人都一視同仁,你咁樣答,就係無分。我唔會加返分俾你,就咁。」

Emma講起分,真係名符其實嘅一分都不能少,語調即刻變得堅決:

「你……你根本就係有心唔俾分我。」

「你講咩呀!」Winnie好似好理直氣壯,但係佢跟住講嘅嘢又的確幾會令人懷疑:

「我點解要咁做?你覺得我公報私仇?我先唔駛。你以為你痴住Alan就得喇咩,我成日都叫你哋死咗條心。Alan 只係要鍾意同我一齊,你哋全部都要行開。」

Emma雖然內向,但係佢都係一個唔見棺材唔流眼淚嘅硬頸女仔嚟。

所以,佢一字一頓回敬返Winnie:

「我唔會屈服。你同Alan 點係你哋嘅事,我完全無興趣。但係依家我講緊份卷,入面嘅分,我係唔會罷休。我問到去Professor度,大家都無癮。」

「OK fine,你咪去Professor度乞囉,我都懶得睬你。」

Winnie 拎粒Extra出嚟,放入口趙趙趙,怙惡不悛咁,繼續坐低做嘢,唔理Emma。

點解Alan 會鍾意啲咁嘅女仔?純係單佢有才,有貌?性格唔重要咩?

Emma 諗唔明。但係佢有少少戥Alan 唔值。

如果,如果係我……嘅話。一定會對Alan好好。

Oh no,我喺度諗緊咩。Emma 一醒悟,正想就正題繼續據理力爭,就喺呢個時候,Alan 返到嚟Office。

「Emmazon?你喺度做咩?」

Winnie 即刻企起身,有啲不安:「Alan,我同你去食個Tea。」

Alan 推開Winnie :

「咩呀,你傻咗咩,Office hour呀依家。而且都有學生喺度。」

Winnie 叫:「我叫你走就走啦。你依家做咩唔聽我講?」

Alan 望望Winnie,索性唔理佢,逕自同Emma講:

「你有咩問題?」

「Alan!」

Emma 把握機會,同Alan 講出佢對於份卷改成咁低分嘅不滿。

Alan 皺皺眉,望咗個答案十幾次後,終於都講:「不如你放低份卷,我同Winnie 再討論下先。下堂,我哋下堂再交代返呢樣嘢。」

Emma 沉默良久,終於說一聲:「好。咁我無嘢喇,返去先。」

Emma 離開Office,正想去搭升降機走。

但就聽到Winnie 同Alan 都出咗Tutor房。

「你搞咩嘢理佢啫?我唔鍾意你同佢喺埋一齊!」

「你講咩啫,根本我就同佢無嘢。我對所有學生都係一樣。」

「係鬼,我聽Peter同King Sir講,呢個陳宜成日搵你。仲要全部係我唔喺度嘅時間先嚟。我唔信佢對你無嘢。」

「你咪發神經。就算要嘈都唔好喺度嘈,跟我嚟。」

聽到腳步聲,佢哋行咗去中間嘅樓梯口。

「做咩啫,你放手!」

「我唔放,你究竟聽唔聽得明我講咩?Winnie?」

「我聽唔明!我唔要聽!我唔要知。」

「咁好,我唔講囉!」Alan 大聲一喝。

之後,忽然間,靜晒。

吓,做咩呢?Emma 一時好奇,行返近啲,想聽清楚發生咩事。點知。

兩個嘴唇互相交錯果種柔軟聲,就好似蚊咁,細細聲,但喺度齒咬Emma個心。

Emma 唔敢再行近一步,但係佢知道佢哋依家大概喺某個樓梯角落到攬埋一舊,胸貼住胸,腳疊住腳,交纏緊……

Emma 想走,但係又聽到佢哋兩個嘅對話聲,又忍唔住只好聽埋落去。

Winnie喘咗一喘氣:「你……我唔准你再係咁呀。唔係,我唔理你喇……」聲音忽然變得嬌滴滴之極。呢個係Winnie嚟?

「你聽我講,唔關事呢。你要信我先得嫁。」

Alan 輕聲講,極盡溫柔之能事。

然後忽然間,傳來一陣悉悉聲。又有金屬嘅噹噹聲,係除皮帶……嘅聲音?

「唔得啦,唔准呀。」點解講嘅係Alan。

「點解呀。」點解問嘅係Winnie。

「你痴線咩,仲係Office Hour呀。啲學生隨時都會嚟搵我哋。」

點解講呢句嘅都係Alan。

「但係我好肚餓啦……我個嘴又好乾……」

Winnie 講嘅嘢,已經完全超出咗底線。

Emma全身好熱,佢估唔到會發生咁嘅事。佢真係有衝動想打九九九報警。

賤格……Emma 覺得好憤怒。

Alan急急話:「咪啦,今晚先,好唔好,乖。」

Winnie 順從咁答:「哦,你話嫁……」說罷,又係一陣嬉笑聲。(塔按:呢一段既情節好似果陣俾高登仔屌左好耐因為太多人因為除左褲而凍親。)

理所當然地,Emma 果晚唔單止覺得心口鬱悶疼痛,而且全身發燙。

結果,成晚都瞓唔著。終於,史無前例地,佢聽日同後日都走咗主修課嘅堂。

已經確定咗,要努力讀書嫁啦,明明。

終於,捱下捱下,頭一年,兩個Sem完咗。

時間好快去到五月嘅長長Sem break。

Emma 無打算出去搵暑期工,反而去敲Department office 嘅門,要求跟任何一位Professor做Research assistant。

Research assistant 即係廉價勞工,Professor 通常好歡迎,如果本身Teaching Assistant已經忙緊啲 Paper,無時間幫佢哋做下剪報,搵下Data,就會搵RA幫手。人工當然唔係多啦,但都夠Cover 車馬費同埋食飯錢嘅。

Emma 嘅成績唔算太好,GPA都未過3.5,但係勝在少說話,多做事。所以Professor見完佢之後,決定請佢。

Emma 好開心,從此就會一三五返Computer laboratory 到返工。而就喺返工嘅某一日,Emma 竟然喺個Lab 到撞到Alan。

Emma 果刻,感覺唔係好自然。

「哦,Emmazon!」

「Hello。」

Emma 仍然未忘記佢果日喺樓梯嘅所見所聞。

所以佢決定對Alan冷淡一啲,以保持距離。

「你喺度做咩呀?」

「無,我跟Prof. KF做RA咋嘛。」

「哦!咁啱嘅,KF係我師傅!」Alan 興高采烈。

師傳,即係佢跟寫畢業論文嘅導師。Emma 一聽,立即覺得自己真係唔好彩。

「哦,咁呀。」

「係呀。你有咩可以隨便問我,因為你分分鐘其實係幫緊我做嘢!」Alan 繼續維持住高漲嘅情緒。

「我只係知道幫Professor,其他嘢……」Emma 有意無意盯咗Alan 一眼,「我唔會理會太多。有咩我都會自己搵Professor。」

「唓,」Alan 有啲失望,「咁嫁。一完咗個Course唔駛再靠我,就變晒臉啦。我仲以為你唔係啲咁嘅人嚟添。」

Emma 一急,但係佢知道自己唔能夠輕舉妄動,因為Winnie 隨時會衝殺出嚟。

「唔係。我不嬲……都係咁。而且呢度冷氣好凍,咪講少啲嘢暖下肚。」

Emma 隨便搵個無咩說服力嘅理由。

Alan 仔細望住Emma ,終於佢話:

「我知道點解啦。」

Emma 一震。「因為我用咗新髮泥,靚仔得滯,你怕羞呢?」Alan 仲要好誇張咁,好似小丸子入面花輪同學咁撥一撥佢啲死人硬直晒嘅頭髮。

Emma 真係唔想再理呢個人。於是佢決定閂電腦,去圖書館避一避先。

「我走啦。」

「哦,拜拜。」

而正當Emma 嘟完智能卡,想行出去門口之際,點知冷不防Alan一句:

「對耳環,好襯你喎。」

佢發現咗。

Emma 停咗一停,終於回頭,講一句:

「多謝你。我都係費事徙咗佢啫。」

「點會徙呢。送咗出去嘅嘢,就唔會係徙。最緊要有人肯賞面。」

Alan 微微一笑。

聽佢咁講,Emma 願意將自己嘅不快,去除一大半。

但係,Emma 始終都想講多幾句掩飾返自己。正當佢想說明自己其實對對耳環嘅喜惡程度只係一般,叫Alan唔好誤會之際。佢身後忽然一聲大喝,猶如春雷:

「歐尚文,你都對得我住。」

係施頌馨。今鋪唔通真係會六國大封相?

Emma 見勢色唔對,想即刻就喺Winnie斜邊一側閃過,但係Winnie 一捉,就捉住佢隻手。

Winnie 今日著住一襲火紅色嘅點點長紗裙,一睇就知戰鬥格,完全唔好惹。

但係Emma 始終還是失算。因為人算不如天算,佢嘅命運,一早已經被安排。

「咪駛旨意走。」

「你做咩嘢……放開我……」Emma雪雪呼痛。

「Winnie!你冷靜啲。」

Winnie 不由分說,兜巴星埋去。但係Alan 比佢更快,一下子避開咗。

「你竟然敢避開?」Winnie 嘅兇悍表情,好似隨時會殺人。

Alan 平靜:「你要打我,都講過理由俾我聽先。」

「你依家趁我唔知,搵個第二個,仲要送埋禮物俾人!」

「呢件事唔係咁。本來我拜託佢幫我買啲嘢,後來唔需要,所以我俾返錢佢,樣嘢其實同佢自己買無分別。我無送過。」

Emma 想講,其實係有分別嘅……不過佢忍住將句話吞返落喉嚨。反正Winnie 都係一樣話:

「我先唔會信。點解唔可以係第二個?偏偏又係呢個女仔?」Winnie 果然無將Alan 嘅說話放在心內。

「你……放…放手……」Emma 繼續痛極掙扎。

「我唔放,我唔會放。Alan 你同我講清楚,你今日就要同我講清楚。」

「講咩?」Alan 已經唔係好耐煩。

「我要你同Lab 到嘅人宣布,你唔係鍾意呢個女仔,你只係鍾意我一個。」

所有人都已經一早望實劇情發展,成地花生殼。

Alan 歎一口氣,終於,佢話:「就係咁?」

Winnie再加多一錢肉緊,靚靚嘅臉容此刻為之扭曲:「仲要打多佢一巴。」

Alan 問:「無啦嘛?」Winnie答:「仲要除埋對耳環落嚟,踩爛佢,快。」

Emma 此刻,尤如風中嘅殘葉,彷彿真係會隨時被人一下子踐踏至死。

Alan 個樣亦陰晴不定,一步一步咁行埋去。

Emma 合埋上眼,決定接受命運殘酷嘅安排。佢知道,佢一早就唔應該對Alan有咩非份之想……

拍,拍。清脆兩聲。

完了。

(待續)

燈塔的小說系列

其實我同你,甚麼也沒發生

Ellan Ou

Written by

Ellan Ou

A normal worker from Hong Kong | 香港人。筆名:鵝鑾鼻燈塔 (塔巴),人稱「文字生成器」。著有小說、散文若干,散落於網絡世界。開OT同跪玻璃係終身興趣。想用 Medium 開拓粵文寫作空間。

燈塔的小說系列

其實我同你,甚麼也沒發生

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade