我地都住係同一棟既公共屋村入面，有時，係搭升降機既時候，我會撞到佢。
佢既校服裙，我一眼認得出，係果間係附近半山上既傳統名校。
開初，我地有時我地係等Lift黎時候，可能因為大家都差唔多年紀，有時四目交投之後，都會傾一兩句偈。
有時，我講左啲我自己都唔明白自己講左啲咩既莫名其妙野，佢會笑。
佢果種淺淺而燦爛既陽光笑容，成日令我望到，都唔知自己果下身處係邊，甚至搞到連入左升降機入面，都一時唔記得左禁返自己層樓個掣。
之前，我曾經成日都希望可以係放學，返學時間撞到佢。
有時見到時間係幾時幾分，就希望下一次都係果個時間出現返係大堂門口之類。
但都唔係成日可以撞到佢。我暗暗認為，撞到佢果日，一定就係我既幸運日。
呢個一定係屬於我既戀愛。我咁樣同自己講。
如果唔係，佢既深咖啡色既馬尾，佢耳邊既果個淺黃色既髮夾，佢紅色書包拉鏈掛住既ＳＮＯＯＰＹ鎖匙扣，就一定唔會咁印象深刻。
我無辦法寫太多有關佢既面部描寫，係因為好多時，我都唔敢望佢。
又或者，我唔想俾佢知道，我係度暗暗咁偷望緊佢。
但係呢段戀愛，我好快發現，未曾開始，就已經無疾而終。
果日我全身漆黑，深色背囊，長遮，岩岩係黃昏時間，想出去行下。
但又咁岩撞到佢。
今次，佢只係掃左我一眼，就快速移走佢既視線。
我地一樣搭返同一步升降機。佢甚至一句野都無講。
升降機入面迴響住既，只係上面頂抽氣扇既嗡嗡聲。
我意識到空氣入面苗頭既不對，但係我決定早早自動棄權，選擇沉默。
果一刻，我索性承認自己既軟弱。
我只係腦海入面回想佢剛才果下好似死光一樣既眼神。就好似法官大人咁，似乎已經宣判晒所有野。
到左佢要既樓層。叮。佢即時快步奪門而出。
雖然感覺上無聲無息，但似迴避緊世紀流行既大瘟疫咁。
門之後關閉。殘舊既升降機，微微震動咁繼續落樓。今次仲聽到少少鋼索既拉扯聲。
其實咁樣，自己都預左。
我成日都問自己。點解呢個世界唔可以簡單啲。
點解我依家呢一刻唔可以普普通通咁做一個學生，學下書，偷下懶，撩下女仔。然後心滿意足咁大食一口檸檬。至少，起碼可以周圍同人講，正式宣告失戀。
點解要以一個咁樣既場面去令自己死心。我真係唔明白個天諗乜。
我揸一揸緊把遮，然後開始搵後門出去條街，並且戴上護目鏡。
果一晚，我同我既其他已經合作一排既隊友輾轉退到仕蘭街。
吹廢水時間，壯漢阿乙就安慰我話：
「無開始，好過遲啲開始先知。咁到時咪仲死。」
另一個叫神祇既女仔就簡單一句：「天涯何處無芳草。」
另一位叫做安東尼既高瘦男士，屌左一輪老母，但其實將句義濃縮，其實講既野亦都一樣：
「你會頂得順咩？如果佢係支持班狗既，你會頂得順咩？」
只有最後一個叫小白、由頭包到落腳幾乎連樣都見唔到既矮小女仔，無講任何野。佢只係向我做出一個單手出拳既手勢。
我明白佢既用意，就跟住做，叫做大家隔住隻勞工手套互相勉勵左下。
正當我地以為仲可以係防線前傾多一陣閒偈順便抖一抖既時候，突然前面有一班人大叫：
「屌你老母仆街。。。」
後尾先知，原來果陣係有人叫話「水炮車已經係前面全速駛緊過黎！」。
果陣突然之間一片混亂，根本唔知發生咩事。
我地都未曾意識到危險會突然之間近在眼前，對面全副武裝已經擎槍係四方百面蜂擁而出。而後面一陣強光，藍色既水龍已經向左另一邊擊中左一堆人。
一剎那，慘叫聲，槍聲，求助聲，久久不絕。
「走，走呀！」
都唔知講果把男人聲，究竟係阿乙定係安東尼黎，定還是係其他唔識既同路人。
但係好快，呢個似乎係最後既求生信號，已經俾無情既盾牌聲，長棍聲，通通蓋過。
無情既黑夜。但係有時有啲野，看不見摸不著，比黑夜更黑。
無時間諗任何野，我正以為我都會一鑊熟，有人捉住我，就直接逃奔入一條無任何燈光既後巷。
我地咁岩就企係條巷隔離，所以果一下閃身，似乎無人發現。
跑左有無幾百米，自己都唔清楚。終於，我地停低。
大家都喘住氣，有時間望一望對方，先知道原來果個係小白。
「我地要返去救佢地。」
「無用。我諗，應該只係得番我地兩個，仲未俾人拉。」
無言而對。其實都預左會變成咁。
但係，無諗過咁突然，同埋，無諗過咁快。
其實每一次都會有一種心存僥倖既感覺。但強弱始終懸殊。我地都明白，呢個只係最後關頭既拚死一搏。無人會到最後真係支持我地。大家甚至會忘記我地，過番佢地普通既生活。絕望就好似黑洞咁樣，吸晒所有野入去，最後一點不剩。
可能如果後尾有人將呢啲事拍成咩戲劇，可以好精彩。但現實往往平版得殘酷。一個畫面，咩背景音樂都無。所有人就已經陣亡。
我心入面有強烈想喊既感覺。但係始終，我喊唔出。
小白笠晒頭，所以根本睇唔到佢依家係咩表情，但聽聲就聽得出，佢仲好冷靜。
佢隔左一陣，就話：「我地未安全。要走只能夠分開走。而且，好大機會一係我地都陣亡埋。又或者，兩個只能活一個。」
我惘然。我有知道自己最後既下場係點。但細節方面，從來都無思考。我亦都唔知可以點樣同屋企人交代。尤其是，其實佢地對我做既野，似乎一概不知。
「咁啦。」小白既聲音似乎好似做緊新聞報導一樣咁平常。
「我係前面出番去，睇下有無狗，引開佢地。你繼續沿住後面穿出去。之後上山，兜上大學，開始掉野換衫，或者安全。」
「痴線。。。」
「我無咩所謂。屋企人一早已經當我死左。我相信我無你咁大負擔。」小白最後仲有輕輕既一句：「依家你仲有要想念既人。我無。」
之前有幾次，小白有同我講過佢屋企大致既情況。我明白佢所指既係咩。之但係。
「已經無時間考慮。就咁決定。」
小白岩岩講完，就已經第一時間起步開始跑出去。睇住佢慢慢消失矮小既身影，佢有啲開始同我一直諗緊既果個人既背影重疊。
我即刻亦都跟住沿路跑番出去。
一出去，就已經見到有兩個全副武裝既人，追緊小白，其中一個人，已經拎起長槍，開始瞄住小白既背脊，準備射擊。
小白就算無左屋企人，佢自己唔係都係一個血肉之軀咩。
我都係血肉之軀啦。但係如果小白都係我眼前，活生生俾人打中的話。
咁我唔係都係一樣見死不救咩？咁我仲算係咩？
我憑咩要其他人為我犧牲？仲要一個女仔，為我呢個咁既垃圾犧牲？
我呢個連表白都唔敢既垃圾。我呢個鍾意埋一個本來一開始就唔應該鍾意既垃圾。
可能到最後大家都想搶住為大家犧牲，希望自己可以活係自己既悲劇世界，生於最前，死在最後，為自己既壯烈既歡呼。
砰。砰。砰砰。
果年既夏天，同以往都係一樣咁熱。
有人話夏天係年輕人戀愛既季節，但係，我點可以同意呢。
因為我甚至唔能夠對住我既心上人告白。而即使，佢依家訓左係我面前。
（完。故事純屬虛構。如有雷同，實屬仆擇。）
