別來無恙 之貳
睇番今年。
係 Medium 只係寫左三篇文，應該係有紀錄以黎既新低。
曾幾何時，試過係討論區連載超過十萬字既小說，亦都有係Social Media 日日寫好多長長短短既散文（最高記錄好似試過一日寫左十幾篇 Sosad），突然之間唔寫，之前都有解釋過，其實主要都係無咩心機。同埋亦都無咩動力。感覺到創作空間受限，感覺非常之唔良好。於是決定減產（當然 Medium 亦都俾唔到足夠既 Incentive 我 LOL）。有時啲野，諗左當寫左。都唔一定會有咩損失既。
得到新既時間，就盡情放空自己。
唔知大家呢一年又點呢。原來不經不覺 2021 年已經得番四個月左近。殘年急景啊。依家呢個時勢，唔係話要咒大家，但應該都未必會過得太開心啦（我估）。
除左個樓市都仲係唔知點解好好之外，其他都好似無咩特別好事發生。無力感繼續緊緊咁籠罩住每一吋空間，去到一個點開始連報紙都唔想睇，電視新聞都感到厭倦。空氣瀰漫住一種精神既真空，所以有得追星既追星，有得扮文青既繼續扮文青，因為至少呢啲活動，暫時仍然未至於犯法。好多身邊既朋友俾到我既感覺，都係努力死頂緊。如果頂唔順，就一係已經舉家離開左。大家都努力地討生活，扮若無其事咁過每一日。依家唯一可以做既野就係，努力地令到自己健康啲，長命一啲，做好自己，然後就係，漫長既等待。無人知道要等到幾時。但總之要等。
就算失收，總需要守。
By the way。
今日食完飯既時候，最近突然間諗到一樣野都幾有趣。一個國家無論係咩政治制度都好，一般共識都係反對貪污。因為貪污會令到民不聊生，最後政權倒台。所以無論咩人做領導，都會打貪。貪污大多數既法律入面都不被容許，但係另一個行為，例如不事生產之餘，不斷係一個組織入面透過擦鞋（獻媚）去上位，就仍然合法。究竟當一個社會既風氣唔鼓勵精益求精，鍛鍊自己既專業技術，反而推動更多人去鑽營投機取巧之術，對成個社會經濟發展會有幾大損害？
舊時會讀到一啲論文去講話貪污會令一個國家一年蒙受幾多經濟損失。雖然都唔知點計出黎，但感覺上都好似有啲根據。但點樣去理解人人擦鞋唔做野問題可以去到幾嚴重？其實從邏輯黎講，如果擦鞋會令到公司盈利下跌，擦鞋仔傍友自然會被炒，去到為世所不容既地步，咁樣佢地自然會消失。但係現實呢班人繼續有生存空間，證明就算證明到佢地係害群之馬，要搵到佢地出黎唔易，要量度佢地既損害就更困難。尤其是當擦鞋變成風氣，佢地又會成為一個個保護傘咁，一層袒護一層，甚至去到管理層都一樣會隻眼開隻眼閉，As long as 佢地唔係完全會搞串個 Party 就無問題喇……
當然好多人都會Argue 話有時擦鞋仔都會做到野，例如韋小寶就係其中一例。但感覺上呢種類型既天才知所進退型好似愈黎愈少。依家大多數見到既，都係單純好似明朝宦官果種既陷害忠良既奸佞小人……
Anyway，閒偈講完。大家未死既，不妨見到篇文係下面留言區打聲招呼。就快都又到中秋節喇。祝你在面油下平安。
Ellan 2-9-21
