[粵] 話說以前慣起上黎，一日廢寫四五篇文。依家突然放棄左 Facebook ，無左個地方散貨，日常生活又多野搞，結果完全停筆，幾個月落黎，原來又唔覺會無左忽肉，亦無周身出現紅疹，坐立不安。Medium 我仲有搭車果陣睇，不過真係少寫左好多，由日記，變成週記，又由週記，變成月記。少到一個點可以破左成年以來生涯紀錄 — —
希望唔好搞搞下直頭好似上高登連登開 post 咁，主題要率先寫上「年經」兩個字啦。LOL
天下太平既日子，見到人打招呼，問句你好嗎或者 How are you ，不外乎係禮數。你逢人見面一聲不出，自顧自玩手機，最多人地都只係以為你有性格或者無乜禮貌，其實都無咩野。但到天下不再太平，甚至係日子日益困頓，係今日唔知聽日事既時候，原來問好真係有佢既實質意義。點知邊個突然之間又唔知染左武肺又或者係條街同一棟樓隔離左右中左，依家唔知俾人拖左去隔離；一係，就因為唔知咩原因，直頭俾警察拉左。做人有時都好化學架渣，依家邊個夠膽講自己出街，唔會突然犯法？哈哈。答一句I am fine ，依家突然可以包番好多意思係入面。
（當然我唔能夠排除，遲啲問候既方式會以：喂你係咪愛國者去取代。識唔識得問好，同愛唔愛國，我亦都唔知有無直接關係。）
當然，有呢個諗法，或多或少，同年紀增長亦都有關係，以前後生細細個，精力彷似無窮無盡，時間根本就係攞黎徙，病都只係當小事一樁，鍾意三日唔埋兩日又通頂一兩次，好似身體會自己調節復原，依家？唔好話有無咩599F 咩野限聚令，一出街去到十點，頭自動劇痛起上黎，響起既唔單止係歸家既信號，甚至係警號。又怕病毒，又怕人，又怕頭上有一把刀，咩都怕，結果索性唔出門，與世隔絕，悶聲發大財。問候別人，真係多返一個藉口，可以知道下朋友近況，當然熟既，直頭可以一句「點呀死得未」飛埋去，但人可以置生死於道外既真係屬於少數，如果唔係真係玩得係多年深交既，勸你呢啲野都唔好立亂講，唔係後果自負。
講返寫野，最緊要都係自由自在。如果本身都唔覺得有呢一片天空的話，樣樣野都要諗過度過，豈不是徒添痛苦。一係就寫寫寫不斷係咁寫，一係就索性完全唔寫。就好似迴響老總，果陣一創刊邀請我寫稿，最後出與不出，佢地編輯部自行決定。我完全無所謂。依家出左成年，本野內容愈黎愈好，更加唔駛糖水滾糖魚。我幾個月前（好似已經係農曆年前）就同老總講，我話之前寫啲稿，遲啲我係 Medium 貼番就算，佢都無反對。不過我又一直搵唔到時間，成日話貼話貼，結果貼極都未布。
（當然捐稿費呢樣野亦都係一樣。不過我見佢都未叫救命，應該都未破產既。LOL 到時再算。）
話題講遠左，收筆返黎，總之都係果句：寫野有枷鎖，就唔得痛快，唔得痛快，又要夾硬去寫，咁同我平時返工果個感覺有咩分別。總而言之，以後仲寫唔寫，寫幾多，真係隨緣啦。呢篇文其他最主要目的都係返番去開頭：希望大家仍然過得好。別來無恙。就咁先啦。
