寫開真係有癮，不如寫多篇
今日機緣巧合底下，終於寫左佢出黎。
點解日本依家輕小說 / ACG 系仲係咁興「穿越風」？
其實用「依家」呢個詞黎形容實在係有啲唔恰當。因為所謂「穿越風」、「穿越系」既創作，我相信已經係日本次文化度流行左相當耐既時間，保守估計隨時有三五七年以上。我並唔係研究呢方面既專家，不過所謂既「穿越系」既故事展開，大多數都離不開主角由現實世界，因為意外（可能係被一個術式召喚、可能係因事故死亡）穿越到另一個平行世界，可能係魔幻既國度，甚至係好似 RPG 一樣既中古世紀，主角可能要從新投入一個職業（例如劍士、魔法師之類）去識新既朋友，用番現代既頭腦同智慧去解決另一個世界既問題之類。
老實講，作為一個曾經都幾業餘既文字創作者黎講，對於呢種穿越題材一開始並唔反感。甚至可以話都覺得幾有諗頭同新鮮。其實穿越本來就唔係咩新酒，你隨便講一啲所有牽涉到回到未來（例如殘酷過一夜情既尋泰記）又或者因為係一個月台上面誤打誤撞而進入既魔法世界（例如曾經世界為一紙而曾經瘋狂既Harry Potter），都可以叫做穿越既戲碼。穿越之所以好睇，係因為大家係唔同世界既價值觀激撞之下，多數都會產生非常有趣既化學作用，令人想睇下作者究竟想玩邊個。當然一講到呢度，其中一樣決定成功既因素就係設定，設定同設定：
世界觀有幾宏大同有趣呀，主角有咩特殊能力同威能呀，身邊又有幾多妹頭因為主角而墮入愛河於是變左後宮大愛呀，最近仲興起一啲變態既虐待 Play 環節等。我自己已經無追新番好耐，不過過往有聽聞過例如Re:Zero 呀、 Overlord 呀、Konosuba呀，都係穿越情節而都幾受歡迎而累積到一定知名度既。但係近年真係愈黎愈多，甚至已經可以去到用氾濫成災黎形容。依家日本既動畫，可能一季入面，有一半已經係穿越既。我真係想問日本人一句：
生活真係枯燥乏味到咁想穿越呀？你地班友究竟有幾想逃避現實呀？
你穿越起黎故事完整同埋人物描繪生動有趣，咁都叫做有啲睇頭。你都唔好為穿越而穿越呀。我諗唔係真係好好此道既人永遠都樂在其中的話，真係會睇到人有啲攰囉。我只能夠話日本人有時都好長情呀，一條橋唔好話舊可以照受，腐化成屍都可以直入博物館日夜再祭祀供奉呀。雖然已經放低左寫小說好一排，但都忍唔住諗到壞主意：
一係唔寫，要寫就講主角一心想穿越，以為成功，點知純粹去左同樣屬於自己世界既一個精神病院。無人相信佢神志正常，一直都囚禁住佢。入面既病人一日同佢玩勇者鬥惡龍遊戲，話佢係救世主。到最後主角差啲迫到癲，要撼頭埋牆自殺 — — 咁樣荒誕既黑色幽默，相信會好玩好多。
（Btw 香港人依家已經不斷瘋狂穿越緊逃出魔幻紀啦，不過佢地既做法只係比較Primitive 唶。）
完！
