好多年前。我仲讀緊小學五六年班。
屋企仲有慣常買報紙既習慣。而果陣仲係打機搵攻略（當然仲未有網上），要自己去買攻略書，或者睇副刊專講打機欄目既年代。有日得閒無野做，扮大人攤開報紙揭黎揭去既果陣，發現果日報紙岩岩推介緊一隻 Game 既密技，果隻 Game 我有打開，就係暴風雪既魔獸爭霸。而果啲所謂既密技，依家 Google 一下幾秒已經俾到你，果陣時可以放係報紙度，你可想而知我地細個果陣其實資訊都唔係仲係好流通 — —
然後我一睇之下，仲要發覺，堆密技有啲地方係錯左既。
舉個例，例如某個 Code 輸入左會全身無敵，篇文就話會無限資源，咁樣真係唔通喎。果陣愈諗愈覺得唔妥：如果個個試完啲 Cheat code 之後發覺唔 Work ，咪會好唔開心囉。於是思前想後，膽粗粗之下，我決定寫封短信（果陣當然無電腦，要用紙筆手寫，非常 Old school），將正確既密技重新講一次，然後知道屋企果陣仲有個傳真機，就係取得家人既同意之後，我就好 Q 多事咁樣，將呢封信傳真左出去。
果陣都唔覺得出左之後，會有咩回音。可能編輯睇完就好似依家啲老闆咁照例『哦』一聲就會丟落垃圾桶。同埋係依家既角度，編採排版出錯左，So what？根本不值一哂。但驚人既事就係幾個禮拜後發生。照樣睇日報既時候，去到同樣副刊講打機既頁，突然間多左一個欄目，果度竟然用左差唔多成版紙既十份一，去講番佢地之前講度某某遊戲既密技原來錯左，但好彩有讀者某某指正返，所以依家特別引返佢既文章出黎供讀者分享。然後，執筆者仲話，有見及此，以後所有既讀者都歡迎來信分享佢地打機既心得，呢個欄目以後會作為讀者園地招稿，來稿一旦錄取刊登，會有稿費幾百元正。
我果下真係呆L左。其實有玩個文字既人都知，投稿去報館，傳統報館既門檻係幾 L 高。首先命中率奇低，而且就算真係應承登你篇文，都唔一定會出你個名；就算真係咁皇恩浩蕩出你個名，都唔一定會有稿費。但係呢間報館果陣做事手法之開明、出手之闊綽，真係非常之誇張，尤其是對一個完全未入世既小朋友黎講。可能因為呢件咁無聊既事，先至會令我係過去有一絲憧憬，可能揸筆都會搵到食掛。
我相信我已經唔駛提個名，你已經會估到係邊一間報館。仲未需要明槍明刀既年代，總係會令人覺得好似係美好啲。而幾年前，老牌泛民不斷鋪天蓋地攻擊新派本土，呢份報紙一樣都有做埋一份，我曾經對此感到非常失望。但係當底線思維一推再推，直到依家所有野已經去到無分彼此，一律壓碎，所有野已經唔再重要。呢一個滂沱雨天，又一次標誌香港人失去左另一樣無比重要既野。
是否無奈，是否灰心，是否無力之類，答案已經全在心中，亦都無用再提。無論點，我地都一樣要繼續生存落去。大家只能繼續留有用之軀，繼續做好自己。
