無論你鍾意唔鍾意、甚至好似有啲人咁超憎都好，鬼滅票房係經濟冰封期入面，仍然大收係事實，甚至可以話係創造左奇跡。
於是，又有唔少事後分析開始去講到似層層講套作品究竟點解咁紅。本來，我都以為呢啲文都應該會有一定既參考價值，而值得開黎望左一望；但估唔到佢地既論點居然係話：
因為角色夠忠奸分明，因為啲絕招有晒好記既招式名，甚至話因為角色有實力排名，打鬥節奏夠晒明快同熱血等等。真係俾佢吹脹。
咁你不如直接話因為套作品夠晒『王道』——好聽啲講的話——
唔好聽既話，就係夠晒公式化同老土。呢度咁講，絕對無咩貶低既意思，因為有時受歡迎既野千篇一律起上黎，真係要幾例牌可以去到幾例牌。公式化亦都套左廣東話裡面一句俗語：橋唔怕舊，最緊要受。公式化起上黎但包裝得好，有時都真係可以吸引到好多人落坑同正評。
之但係，歸類左呢種所謂既成功因素之後，後人係咪又可以照抄然後爆紅坐低等收錢呢？我就覺得應該唔係，甚至可以話可能性非常低。尤其係我非常懷疑，寫出以上觀點既作者，可能未必對於日本動漫有好深入既研究。
講得出係王道，就必然係果幾十味野係百子櫃執藥咁執，等於輕小說界，之前好一輪（可能依家都仲係）大玩穿越，女角色一定要夠萌點夠香，男主角最好渣渣地。的確，係會有商業成功既作品浮面，但恐怕同時有99% 既同類型作品，石沉大海，永世不得超生。
始終爆紅既野，都有一種誤打誤撞既隨機成份。讀者既口味咁岩開邊範，細緻位方面全然無辦法預測。可能真係突然呢幾年啲人囚禁得耐，見到主角綠色黑色格仔件衫諗起大自然特別放鬆。亦都可能係因為彌豆子咬住碌竹覺得好有親切感（？）等等。
所以，作者都係諗到咩作啲咩就好。一有啲框框框死左，落筆打三更已經唔過癮，最後連自己都取悅唔到，更加都唔好講話其他人喇。
