[粵] 最近 散彈二號 對於金融市場既二次文革既新聞似乎好感興趣，本來以為佢會寫文，但原來未寫。我對箇中緣起唔係知得太清楚，不過對於近日都有新聞話唔少學生甚至咩都唔識都拎成副身家黎炒，結果輸到一窮二白，都真係有啲感慨。
我地成日都話科技比好多年前先進，資訊依家非常流通，除左要睇甜片依家可能都係within fingertips 唔駛逐格逐格 load 之外，大家都覺得學野易左好多，因為網上面又有影片教學又有討論區，認真去研究總有人會分享到一大堆心得。例如話學瑜伽，或者係砌下模型同教人修理屋企既紕漏等等，好多野都可以Step by step DIY。既然係咁，我以為就算係理財，或者投資，理應都係同一個道理，因為其實套野發展左咁多年，都無咩變過。
之但係到有啲股票炒到天價然後開回塘甚至打回原形既時候，一大班本身贏唔少既突然輸突（當然有一堆係山頂先入，從來無贏過依家就輸身家依家唔知可以點算好），先如夢初醒，發表番一大類「唉其實大戶玩晒」、「應該真係理性啲要放番止賺止蝕」、「唔識玩 Option 真係唔應該學人亂玩」既言論，唔係話佢地既遭遇唔可憐，無啦啦辛苦賺返黎既錢一下子輸左，當然肉痛，但係食得鹹魚抵得渴，受到呢個教訓，我真係唔覺得應該比太多既同情佢地。
十幾廿年前亞洲金融風暴，唔少依家已經係阿爸阿爺級數既香港老散，只係香港金魚缸同樓市炒到飛天，一樣曾經出現日日賺十幾萬，今日又唔知去邊度魚翅撈飯既情景。結果當然一鋪清袋，零三年仲要搞到唔少人燒炭收場。監管機構都俾人鬧無好好教導老散正確既投資態度，於是先又出一大堆廣告（最記得就係果啲羊群廣告，叫人唔好盲目跟風），仲有財演節目推介槓桿產品一定要急口令念出既一大堆風險聲明，都係無非想往後既人唔好重蹈前者既覆轍。
但歷史仍然不斷反覆重演（「美國市場原來咁仆街？」君不見零八年金融海嘯邊到源起？梗係唔係Wuhan啦！）。更教我意外既，依家唔少中伏既甚至係可以走在information age 最前線既年青一代，佢地唔係只係用黎上網聽港人港地既廢老，或者處身於果陣寬頻上網都未有得上乜滯既年代。網上對於金融工具既描述同理論亦都俯拾皆是，但係點解仲有咁多人仍然都自投羅網？最後先問咩係 Gamma Beta 咩係 Nake Short 原來我咁玩贏係有限蝕係無限？我自己都唔係好明白點解。只能夠咁樣講，人既貪念有時真係可以無止境，尤其是當身處一處充滿瘋狂氣氛既場所，真係好容易失去理智。
錢太多，市一直會升。呢個講法，已經講左十幾年，好多人賺大錢。但係水尾先入果啲，往往就係最後被犧牲既一群。無人再願意聽 fundamentals，所以公司究竟盈利係點財務狀況係點，亦都無人想知。只係當人人都叫大家要團結果陣，50蚊又睇100，100就睇500，到500就開始睇10000, 30000。3萬美金即係20幾萬港紙，一張股票。大家都想升空既火箭會一直飛到去外太空，但無諗過原來狂歡既派對，始終都會有終結既一日。
聽聞朋友講一兩個月前，網上已經好多恥笑巴菲特既 Post。我都唔知講咩好，我諗巴菲特條底褲，應該仲係非常完好無缺既。我無咩忠告俾大家，不過對於世事，我都成日得呢幾個字：
有得食唔食，罪大惡極。
