麥理浩徑第五段上每個山頭高位，都係睇九龍全景的最佳位置。未應付到一次過行晒全段，選擇斬件式登高。矮過獅子山少少的筆架山，對腳力要求更高。
行山路線：
黃大仙獅子山公園 ＞回歸亭 ＞筆架山觀景台 ＞民航處雷達站 ＞鷹巢山自然教育徑 ＞大埔公路石梨貝水塘巴士站
燒烤區封咗冇緣上八仙廟
計劃經獅子山公園燒烤區上八仙廟，接入登山步道往回歸亭。到咗燒烤區後先知因應疫情封場唔入得，要返出去公園門口，行返上次登獅子山條步道上回歸亭。
依家行山可以免戴口罩，不過呢度人多，都係戴住安心啲。喺回歸亭聚集咗十幾人，大部份冇戴口罩。快快飲水，速速抹汗，跟路牌沿麥理浩徑第五段（Maclehose Trail Section 5）走向約高 460 米的筆架山（Beacon Hill）。
路面既有平緩地段，亦有上落梯級，途經香港保衛戰軍事遺跡第 16 號地洞（Tunnel）及第 17 號全港最大型軍事座標（Marker Stone）。索晒氣咁行埋座標旁一段長梯級，抵達最靚風景位──筆架山觀景台（Beacon Hill Viewing Point）。
好喜歡雲團遮掩飛鵝山
呢度遊人數目大減，可以小休片刻喇。花 20 分鐘由回歸亭上嚟，見到只有獅頭、冇咗獅身的獅子山，超趣。原本喺佢後遠方的飛鵝山剛被雲團遮住，畫面充滿詩意，好喜歡呢。
回看香港保衛戰
筆架山的中英文名稱按字面睇完全冇關係，中文名點嚟更加係估佢唔到，自問冇咁豐富的想像力，英文名就同香港的歷史相關。位處香港保衛戰其中一條重要戰線上，當年的義勇軍喺呢處山頭頑抗日本仔，講緊嘅只不過喺 1941 年的事。
離開觀景台後繼續行梯級登高，但比頭先上嚟仲辛苦，有啲石級好高呀，捱過咗之後就輕輕鬆鬆到龍欣道。過對面接入上行梯級，山崗上的民航處雷達站等緊被打卡。
民航處喺筆架上設有兩個雷達站，其中一個喺 2018 年超級颱風山竹襲港時受損甩皮，民航處話甩皮雷達站當時正準備做裝修，所以入面喺冇雷達。家陣眼前呢個雷達站，並唔係甩皮嗰個。
落山一小時抵大埔公路
沿雷達站後方的明顯梯級路落山去大埔公路，足足行咗成個鐘。其間先後兩次橫過龍欣道，每次只需要過對面，接回麥理浩徑繼續落山就 OK。交接路口附近有麥徑的背包人路標指路，唔使擔心行錯。
當過咗大涼亭，出現教育徑路牌，選右路走，此後麥徑同鷹巢山自然教育徑（Eagles Nest Nature Trail）重疊。教育徑藏身林木區內，冇亮麗風景，勝在易行唔怕曬襯，不時聽到來自大埔公路的飛車聲。
教育徑出口外轉右落斜，冇耐已見公路上車來車往，唔少得有馬騮在慢步。雖然想打開背包攞水樽，都係離開馬騮遠啲先攞更安全。
*** *** ***
行山貼士：
- 愛護郊野，勿吸煙，勿亂掉口罩。山野不設垃圾桶。
- 自己垃圾，自己帶走，包括水果皮、果芯。亂掉果皮只會吸引其他人堆放更多垃圾。
- 自備足夠糧水，沿途冇補給。
- 注意防曬、防蚊。必須時刻留意天氣變化，提防中暑／熱衰竭。
- 起點同終點都有馬騮，緊記勿挑釁、勿餵食、勿靠近、勿打開膠袋。
- 完成行程時間：2 小時 20 分（途徑麥理浩徑標距柱 M107-M115）
🚏 🚌 🚏 🚌 🚏 🚌 🚏 🚌 🚏 🚌
交通貼士：
起程：天馬苑行上獅子山公園（參考其他路線）
回程：大埔公路巴士 72／81 往九龍／沙田／大埔
*** *** ***
