上獅子山行一圈，沿乾隆古道經紅梅谷出大圍，直搗茶記歎凍檸茶炸魚沙律，剛消失的卡路里火速復活，痛快至極。
路線：
橫頭磡邨 ＞天馬苑 ＞馬仔坑閘口後方步道 ＞獅子山回歸亭 ＞獅頭 ＞獅尾 ＞麥徑 ＞獅子山回歸亭 ＞乾隆古道 ＞紅梅谷自然教育徑 ＞紅梅谷路 ＞大圍站
登獅山並非是日主角，乾隆古道先係，但齋行古道會好快收隊，不如上埋獅山。以往踩過獅尾幾次，從未立足獅頭，今日嚟個真攻頂。
驚訝有人喺獅頭紮營
每次上回歸亭，總會發覺步道又少咗啲舊物，冇變的，係路旁一定有紙巾等垃圾。手腳並用爬到獅子頭，驚訝有人喺度紮營。望清楚，係當值中的執法人員。
獅頭可供休息的位置唔多，友善的山友主動唧出少少空間，俾索哂氣的我挨住石頭唞唞，飲啖水，感恩喔。
一步之外係懸崖，大媽勇字當頭企到最出，叫嗰 friend 企上石頂擺舖士影相，阿 friend 話危險唔願上，大媽當聽唔到不斷叫佢企上去，有山友忍唔住好言勸止，成功幫阿 friend 解圍。
獅尾落山接麥徑返回歸亭
大媽應該自己搶先企上舊石影張相，咁至說服到阿 friend 照做嘛。
唞順氣，行去獅尾，沿長石級路落山，至麥理浩徑交接點轉左。返抵回歸亭，按路牌指示進入乾隆古道（Qianlong Ancient Trail）。
夏天行乾隆古道一定唔曬
乾隆古道幾乎全程以石頭築路，唔似其他混合現代原素的古道。路旁樹林成蔭，夏天行一定唔會曬。條路不見天，環境濕氣重，石頭上自然長有青苔，落山唔急得。雨後或濕度高的日子嚟行怕會易跣腳。
古道出口連接衛奕信徑的石屎步道，右轉挨住引水道往紅梅谷，至分岔口可選經紅梅谷自然教育徑至紅梅谷燒烤區，或者繼續前行至望夫石分岔口先下行到燒烤區。
未行過紅梅谷自然教育徑，就揀咗呢條路落燒烤區。行落有啲悶，獅子山公路傳嚟的飛車聲好響亮。條路左轉右轉，行上行落，攰呀。將來再嚟的話，都係行去望夫石分岔口嗰條路落燒烤區舒服啲。
***
留意：
- 自己垃圾，自己帶走，實踐行山禮儀，做到山野無痕。
- 備足夠糧水。
- 越近獅子山山頂，路況越加崎嶇，尾段需手腳並用，應與前行者保持距離。路窄人多時，禮讓上山者先行。
- 喺山頂影相必須注意安全，勿害己累人。
- 避免着普通波鞋行乾隆古道，跣腳跌倒指數高。怕熱者最好帶定把扇。
- 紅梅谷燒烤場偶有馬騮出現，勿挑釁，勿餵食，避免喺佢哋面前打開膠袋攞嘢出嚟食。
- 完成行程時間：3 小時
⛳️ 橫頭磡邨至登山步道入口：11 分鐘
⛳️ 入口至回歸亭：30 分鐘
⛳️ 回歸亭至獅頭：20 分鐘
⛳️ 獅尾至回歸亭：35 分鐘
⛳️ 乾隆古道：21 分鐘
⛳️ 古道口至紅梅谷燒烤區：25 分鐘
⛳️ 燒烤區至大圍站：17 分鐘
***
