基隆八斗子喺唔少台北人的心水郊遊地點，坐台鐵最快的列車「自強號」由台北車站出發，大約 80 分鐘就到達八斗子站。奇怪喎，朝早有一班快車「區間快」，唔使一個鐘就去到八斗子，車費平過自強號幾十蚊台幣添（下同）。咁吸引，當然要坐呢班車啦。
中途站瑞芳轉車好容易
記住！記住！記住！由台北火車站北上，坐台鐵 平溪／深澳線 去八斗子，必須喺中途站瑞芳轉車（轉車好容易的，放心）。
上台鐵官網 check 吓開車時間。登入官網，起程站選擇臺北／基隆地區（留意，官方喺用臺北），臺北車站；到達站揀平溪／深澳線，八斗子車站。輸入日期時間後按查詢，官網彈個窗出嚟提你要轉車，然後列晒所有適用列車的方案俾你慢慢揀，包括車種、車次編號、到站時間、發車時間、轉車站名等。
坐台鐵拍悠遊卡有九折
打算喺八斗子玩一日，自然越早出發越好，鎖定喺朝早八至九上車。對照返列車時間表，有三款車種可揀，包括站站停的區間車；停少啲站的區間快；停最少站的自強號。車費方面，區間車、區間快係同價；最快的自強號就貴啲。用悠遊卡坐台鐵有九折，抵過用現金買車票。
眼定定望住方案 4 ，呢班區間快 4022 車次好快喎，台北車站開 0838，到瑞芳喺 0915，有 3 分鐘時間轉車，0930 就到八斗子，全程唔使一個鐘，就坐呢班車，出發！
到咗台北車站，要落一層搭台鐵（唔好搞錯去咗搭高鐵）。入閘前，做齊兩件事：
１．確保悠遊卡入面夠錢
２．望望閘機外面的電子螢幕，搞清楚部車喺邊個月台開出。
台北站月台中間等車最穩陣
目標列車車次 4022，開車時間 0838。閘口附近一間擬似辦公室的外面，有個顯示乘車資訊的電腦芒，呢個芒易睇過閘機上方嗰部好多、好多。見到 4022 會喺 4B 月台準時開出，於是拍悠遊卡入閘落去月台。（簡單嚟講，去基隆、瑞芳、平溪、宜蘭，去 4 號月台就啱嫁啦，不過 4 號月台再細分 4A／4B，所以一定要搞清楚正確的上車月台）。
閒日早上的 4B 月台好繁忙，企滿好多候車乘客，月台同時提供俾唔同行車方向的火車共用，呢班車由右邊駛入，下班從左邊駛入，上車前一定要注意廣播，唔好上錯車。另外，唔同車種的列車，車廂數目會有分別，同日本的情況一樣。基本上企喺月台中間 4 至 8 號車廂位置等上車，係最穩陣。月台有水牌提醒你上車位置。
順利上車後，發現車廂設計同日本的非常相似。雖然喺台北站上車冇位坐，但大部份乘客會係隨後一、兩個站落車，之後可以揀個位隨便坐到瑞芳車站。
瑞芳轉車體驗得與失
列車原定 0915 到瑞芳，有 3 分鐘時間轉車，坐 0918 開出的 4711 車次抵達八斗子。人算不如天算，班車離開台北車站後曾經兩次短暫停喺路軌，導致遲咗幾分鐘先到瑞芳， 4711 一早已經走咗，焗住要等大半個鐘坐 4713 車次去八斗子。
若果冇 delay，究竟 3 分鐘夠唔夠轉車呢？答案係：足夠。到達瑞芳後，落樓梯離開月台，改去另一邊的 3 號月台坐車去八斗子，步程唔使 2 分鐘。
萬一有需要喺瑞芳車站上廁所，就麻煩少少，要出咗閘先有公廁。今日好好彩，車站職員容許免拍卡出閘去廁所，非常感謝佢呀。
要等超過半過鐘先有車，就喺月台周圍行、影吓相。 3 號月台除咗有去八斗子的遊客，去十分／坪溪的朋友都會喺度等車。月台上特別畫咗對應番當地名勝的卡通壁畫，加上有間懷舊風小店，影相 kill time 話咁易。
車廂設計復古獨特 八斗子另類打卡位
餘下前往八斗子的車程有驚喜。列車車廂設計特別，復古味濃，非常適合打卡。開車冇耐，車長現身查飛，用讀卡機掃瞄乘客的悠遊卡，坐咗 12 分鐘車，終於到達總站。由尾二站海科館駛去八斗子呢段，望出車窗就喺廣濶的太平洋，感覺超正。
所有乘客都喺八斗子站落車，聚集月台瘋狂留影，影海景、車頭同站牌。如果唔想喺八斗子出閘，可以坐返呢部車調頭走；如果好似我咁要出閘去行大運，就自動自覺用悠遊卡拍一拍月台部讀卡機，然後離開月台，做法同坐香港輕鐵出閘一樣，同輕鐵相同的地方仲有：冇職員當值，冇閘機，只靠乘客守法俾車錢。
交通貼士：
● 善用悠遊卡，坐台鐵有九折。
● 悠遊卡最多只可以負數 60 蚊。假設張卡結餘得3蚊，而坐車要俾40蚊車資，差額負數係 37 蚊，冇超出 60 蚊，咁你可以順利用呢張卡出到閘。如果負數超過 60 蚊，就會出唔到閘，要先去揾職員增值。
● 台鐵列車上可以飲食。今次喺上午繁忙時間搭車，見到有上班族食用三文治／飯糰，唔大味的食物。
● 下載悠遊卡手機程式 Easy Wallet （android/ios 都有），可以睇到張卡的餘額（不過唔係即時）、交易紀錄（都唔係即時）、有咩購物優惠。
● 回程由八斗子返台北，唔去基隆巿中心的話，可以喺台鐵八斗子或海科館坐火車返瑞芳轉車，不過班次非常疏落，夾時間都好頭痕。索性坐一程巴士去基隆巿中心／火車站，隨時有車落台北。
● 真實車費開支（悠遊卡價）：台鐵台北去八斗子，50 蚊；巴士由海科館去深澳發電廠站睇象鼻岩，15 蚊：巴士由深澳發電廠站去基隆巿政府站，30蚊；台鐵基隆返台北，37 蚊。
*** *** ***
