基隆:八斗子忘憂之旅

以前飛台北,冇諗過去八斗子。今次去八斗子遠足一日,為咗想知八斗子火車站有幾靚、望幽谷真係會令人忘憂,象鼻石周邊的石頭有幾古怪,然後去基隆巿中心食李鵠綠豆餅,再坐火車返台北。啊!差啲唔認得基隆火車站,改建後仲時尚過台北車站喎。

基隆一日遊行程:
八斗子火車站 >望海巷海灘 >長潭里漁港潮間帶 >潮鏡公園 (大掃帚) > 101高地 >望幽谷 >象鼻岩 >基隆火車站

由台北車站坐台鐵去八斗子車部,方便又容易(click 入呢度睇詳情)。喺瑞芳站轉車,列車風格典雅,咁啱遇到悉心打扮的女文青乘客,有佢做女模真係好彩。

八斗子車站限定 太平洋美景

八斗子車站係基隆一個臨海車站。到站後踏出車廂,180 度開揚太平洋海景立即撲埋嚟,感覺超正,所有乘客都忙住影相,或者挨住欄杆望海。網民提過,車站位處基隆巿同新北巿的分界線上面,月台有個打卡標記。不過,當時忘記咗呢件事,剩喺掛住睇風景。喺月台部讀卡機拍一拍張悠遊卡,離開月台範圍,正式展開行足一日之旅。

唔似平時行山,今次主要喺行海邊。離開火車站過對面馬路,就係望海巷海灘,凜凜海風瘋狂吹埋嚟,睇住來自太平洋的大浪持續拍打岩石。咦!離岸淺石上有個人在水中央釣緊魚!!!佢明顯自得其樂,旁人就俾佢嚇一跳囉,危險呀。

潮間海蝕平台打造山水畫

面向大海,沿左手邊一路行去八斗子觀景平台(平台的景觀非常一般,可略過),過咗碧海藍天塊大石碑、長潭里漁港潮間呢個打卡位,開始上斜進入潮鏡公園。留意返,長潭里漁港潮間有好嘢,佢個名係難記啲,不過呢度有好大面積的海蝕平台,夾埋個海同後遠方的山,成個景十足一幅水墨畫。

潮鏡公園最出名的打卡位,係哈利波特大掃帚陣,確實人見人愛。睇返現場簡介,呢度以前係海邊堆填區,加工後披塊草皮變身公園。哦,原來自己企緊喺將軍澳堆填區的垃圾山上……急急腳行去大海螺滑梯後面停車場旁的山徑入口,去下一個 check point ── 101 高地。

登 101 高地眺淒美基隆嶼

講明係高地,走唔甩要行樓梯登高,呢段上山樓梯舖得靚,用大約 15 分鐘就到頂。右手邊望到剛才由火車站一路行過嚟的海灣風光;前面有東海上淒美的基隆嶼;左邊係望幽谷對出海岸。如果假日上嚟 101 高地,可以喺海科館坐接駁車,閒日就要用腳骨力喇。

高地有一條路去 80 高地(今次冇去),另外就有馬路下行到望幽谷。講明係個谷,行上行落走唔甩。一開始條下行長樓梯都幾嚇人,之後仲要行返呢條樓梯走人。雖然遊谷要行上行落,不過慢慢行就冇問題。好彩今日遊人少,可以隨時喺任何位置停低影相,或者呆企望景放空。或者呢個就係望幽谷又叫忘憂谷的原因,咩都唔好諗,當下望海睇景就係一切。

望幽忘憂 幸福度爆燈

谷入面有個觀景亭,坐喺度既有萬里無雲藍天,一望無際東海,仲有基隆嶼陪住休息,食飯糰、嘆綠茶,幸福到爆(行咗咁耐,終於有個瓦遮頭可以大休,幾大都要坐夠本先起身)。之前喺陽明山冷擎步道見到好多人影婚紗相,估唔到望幽谷都有噃。呢度咁大風,睇怕佢哋係想要婚紗空中飄的視效。

唔經唔覺喺個谷留咗個幾鐘,行長樓梯返上去入口,沿馬路下行落山,穿過民居,由八斗街轉入大馬路北寧路,一路行去海科館大客車停車場,喺停車場外面巴士站等車。手機 app 「台北等公車」提醒去象鼻岩景觀區(又叫深澳岬角)的 791 號巴士最快到站。車程大約 5 分鐘,車費 15 蚊台幣。

赴象鼻岩殺出「泥鯭的」

等車期間,有「泥鯭的」女司機埋嚟問我去邊,開價 100 蚊台幣車去目的地,又話今日冇巴士開工(吓!唔係化),用超爛的國語求其答冇錢坐的士,佢就駛走咗 lu。

轉頭巴士埋站,坐到深澳發電廠站落車,過對面馬路後向左行,喺路口右轉入深澳道,一路前行,行咗約 25 分鐘,過晒海邊民居,再入去一個停車場,見到大石上有好可能的手繪象鼻岩指示牌。行多一段瘋狂石頭路,見到象鼻喇。

除咗選擇行上象鼻影相,亦可以行近海邊影侵蝕石地貌。一邊影相,一邊經歷天氣狀況快速變化,瞬間由晴轉陰,擔心會落雨,就行返去巴士站對面,坐巴士 791 調頭去基隆巿中心醫肚(車程約 40 分鐘)。食完綠豆餅、魚蛋湯再加啤酒補充體力,精神爽利咁行去基隆火車站,輕輕鬆鬆坐台鐵返台北,好充實的一日呀!

旅遊貼士:

●若果有長者同行,適宜揀假日出發,夾時間坐 海科館免費接駁車 去部份景點(唔知道喺望幽谷站落車後,喺咪都要行長樓梯落谷)。或者諗吓坐的士,大掃帚、101 高地都有上落客區,方便出入。坐的士去象鼻岩的話,只能夠停喺象鼻岩入口外的停車場,落車後要行一段崎嶇大石路先到象鼻岩,非常考驗長者的平衡力,要考量個人體力能否應付。

●文中提過的景點全部免費入場。

●記得做好防曬,會長時間在戶外曝曬。

●帶備足夠糧水。鏡湖公園外圍、北寧路同深澳發電站都有食肆或便利店。

●步程上上落落,有行山杖會行得舒服啲。

●緊記,台灣唔係周街有垃圾桶,所有垃圾必須自己帶返酒店處理。

●全程手機訊號接收良好(用咗遠傳電話卡)

搭巴士注意:

●用悠遊卡的話,上落車都要拍卡一次。

●巴士設有關愛座,要注意啊。

相關文章 台北行山:陽明山冷擎步道