大夫第，被喻為香港其中一座最省鏡的歷史建築。參觀後，真心感激馬會出錢復修，加埋本地達人的專業手藝，令大宅的絕代華美復活發光。
行程：
上水站 ＞新田東山古廟 ＞大夫第 ＞文天祥公園 ＞上水站
抵達大夫第前，先到巴士站旁邊的東山古廟望望。雖然叫做古廟，但外貌一滴古早味都冇，只有隔離茶餐廳廚房噴出嚟的油煙味。入廟後，塔香合力將小炒鑊氣成功軀散。
東山古廟外貌冇古早味
根據古物諮詢委員會資料，東山古廟屬新田文氏主廟，建築年份不詳，曾經喺 1893 年（清代光緒 19 年）做過翻新。現場所見，廟內有一塊立於 1970 年的碑文，記錄當時古廟 500 周年重修落成。
究竟有幾多年歷史唔係重點，今日用咗好多時間去睇 1970 年有份捐錢重修的善長記錄。佢哋係一班身在英國的文姓華橋，碑文寫明佢哋每人捐咗幾多鎊，當中有幾位的金額係用花碼寫成。
花碼呢種舊香港生活密碼，竟然以呢個方式留存，好特別呢。
至於另一次翻新，推前到 1893 年嗰次，亦有碑文記錄善長芳名同金額，最高金額 57 元，最低 5 毛。數值多少，心意都一樣。一個幾毛對大眾嚟講，可能已係天文數字。
網友提到，東山古廟喺 2015 年拆骨重建，導致好多古舊特式建築冇晒。唔怪得座廟外觀咁新淨，屋頂仲離奇地有同「穆」有關的彩繪雕飾。
大夫第屬法定古蹟
離開古廟，行幾分鐘就到達大夫第（Tai Fu Tai）。大夫第係法定古蹟，大宅外有大片草地，草地外圍有青磚築成的矮小圍牆，周邊起咗多座村屋。
睇見呢個大草地前院，就知屋主咩料啦。古蹟辦對前院咁樣講解：
大 夫 第 在 1865 年 建 造 ， 是 一 幢 傳 統 的 中 式 府 第 。 大 夫 第 前 院 亦 出 土 不 少 特 別 的 文 物 ， 例 如 一 座 大 型 建 築 的 地 基 、 大 量 瓷 器 碎 片 、 盛 載 鴉 片 的 小 瓶 、 錢 幣 、 一 個 八 角 型 水 井 ， 以 及 一 個 中 央 建 有 構 築 物 的 池 塘 。 這 些 發 現 為 研 究 這 座 清 代 大 宅 居 民 的 生 活 ， 提 供 了 新 資 料 。
大夫第貌似同其他青磚舊屋冇分別，細心睇，正門上方有好多人形陶塑，可惜好多都冇咗個頭。穿過大宅正門及前廳，眼前一亮。
強力建議親臨大夫第感受亮麗點
Ｎ年前參觀澳門盧家大屋，覺得佢的中西混合設計靚到不得了，特別對佢的彩窗同木雕留有深刻印象，冇諗過大夫第的室內設計更勝一籌。
文字同相片都唔足以形容大夫第的亮麗，強力建議你親身到現場感受。
有關大夫第及業主的故事，可以參考下方文章。前往大夫第，必定經過私人屋苑大夫第花園。按傳媒報道，政府當年為咗保留大夫第，採用以地換地方式同大夫第業主講掂數，業主隨後就起咗呢個大夫第屋苑。
***
留意：
1. 幾個景點相距唔遠，行一陣就到。
2. 路過村民居所時請保持安靜。
3. 巴士站旁有食肆。建議帶支水帶把傘。
4. 參觀大夫第要嘟安心出行同出示針卡。
5. 完成行程時間：2 小時 15 分
🚏 🚌 🚏 🚌 🚏 🚌 🚏 🚌 🚏 🚌
交通：
去程：上水站 A1 出口過天橋落彩園路巴士站，坐 76K 到新田站。落車前拍多次八達通，享分段收費。
回程：去返之前落車的巴士站，搭 76K 出上水。去程同回程都使用同一個巴士站，上車前一定要望清楚部巴士係去上水清河方向。
***
📑 深度閱讀：
大夫第、麟峯文公祠 Tai Fu Tai Mansion & Man Lun Fung Ancestral Hall (amo.gov.hk)
因為文氏曾參與1898年的新界抗英戰爭，所以文氏與鄧、廖、是早年港英政府認定為香港五大氏族 (cuhk.edu.hk)
10 Most Liked 十築香港 (10mostlikedarchitecture.hk)
