小豆島天使之路係個連島沙洲，以為佢同香港的連島沙洲差唔多，置身現場後，感覺出奇地良好，環境寧靜，舒服。
嚟到小豆島（Shodoshima Island）一日遊的尾站，好想快啲喺天使之路（エンジェルロード / Angel Road）影完相，就去附近餐廳好好坐低，正正經經食餐好。
戀人聖地有幾 Sweet
從巴士站國際酒店前站行去天使之路只要幾分鐘，基本上喺呢個站落車的乘客，都係去同一個目的地。天使之路起點旁邊有個小山丘，登頂到達展望台，拍攝連島沙洲最美麗面貌。
如果同另一半嚟，齊齊上展望台睇日落兼敲鐘，體驗呢個戀人聖地有幾 Sweet，開心㗎。
影吓相，隨意喺沙洲上行嚟行去，海藻喺清到見底的海水入面左搖右擺，長滿青苔的岩石上，有海鳥跳嚟跳去，就咁靜靜過咗一個鐘。
小豆島檸檬清新芳香
原路返去大馬路嗰頭揾食，有啲食肆已落場，難得有間 Café 營業中，立即入去，點選熱狗同檸檬梳打。檸檬係小豆島出品，味道非常清新芳香，外貌冇香港茶記所用的光滑飽滿，但有一股獨特香氣，有佢嚟為小豆島之旅作結，非常美好
***
🚢 交通：
🔸 去程：從巴士橄欖公園公園口站（オリーブ公園口）搭巴士田ノ浦映画村線，到國際酒店前站 （国際ホテル（エンジェルロード前）
🔸 回程：國際酒店前站 （国際ホテル（エンジェルロード前）坐巴士田ノ浦映画村線往土庄港，車程約十分鐘。持香川迷你鐵路及渡輪周遊券，免費喺土庄港坐船返高松港，船程一小時，如果想坐快船，要另外俾錢買飛。
🔸 有冇必要買呢張周遊券？點解今次買咗，可以睇呢篇文章。
🔸 有其他巴士線去／離開天使之路，可以按自己需要選乘，國際酒店前站呢個巴士站相比另一巴士站土庄本町站，距離天使之路近啲，但唔係好多巴士會停國際酒店前站。
🔸 必須留意，每條巴士線班次疏密各不同，有啲真係好疏，一定要睇清楚巴士時間表。
💁 旅遊貼士：
天使之路每日露面兩次，官網提供佢的現身時間以作參考。
天使之路無遮無掩，必須做好防曬。
***
