離開寒霞溪轉到橄欖公園（オリーブ公園 ，Olive Park），預先知道有櫻花睇，但花樹數目之多，遠超想像，場面勁繽紛。食住初榨橄欖油軟雪糕賞櫻，成為美味又美好的體驗。
原本計劃喺橄欖公園的餐廳食晏，但揾唔到間餐廳，幸好公園有軟雪糕賣，實行小食當正餐。買杯期間限定的初榨橄欖油軟雪糕，佢選用自家種橄欖製造，橄欖油入口清香、輕盈、新鮮，完勝屋企食緊個支。
頭先喺巴士站橄欖公園口落車，上斜路進入公園冇耐，已經見到唔少橄欖樹。樹上一粒果實都冇，碰吓運氣會否喺地面發現心形橄欖葉，結果得個桔，行吓行吓，咁就入咗櫻花園區。
櫻花樹數目屬高松遊之冠
呢度所見的櫻花樹數目，係今次高松遊之冠，群花綻放，遊人穿梭花間，笑逐顏開，不斷留影。行到攰，坐喺小吃店外面食住雪糕賞櫻，好爽。
通常入嚟橄欖公園的，都會免費借支掃把，帶去風車屋影飛天女巫相。由於睇櫻花太開心，情願對住花海多過去做女巫。逗留咗個零鐘，出發搭巴士去下一站天使之路（エンジェルロード / Angel Road）。
旅遊貼士：
- 橄欖公園係免費入場。
- 公園有唔少打卡位，如果有時間，喺度玩大半日係零難度。
- 園內手信店出售好多橄欖產品，大開眼界，亦有小豆島特色手信，值得花時間慢慢尋找心頭好。
- 香川縣觀光官網
🚏 🚌 🚏 🚌 🚏 🚌 🚏 🚌 🚏 🚌
交通：
喺寒霞溪纜車站附近的紅雲亭巴士站，搭寒霞溪急行線到橄欖公園公園口站（オリーブ公園口），車程約 17 分鐘。
＊＊＊
