港島:黃泥涌水塘去赤柱峽道

蘇菲 Sophie
Nov 4 · 6 min read

熱愛行樓梯操體能的話,呢段 M 字型上落山路徑適合不過。上落紫羅蘭山當熱身,緊接連走孖崗山兩個山峰,所踏梯級既高又斜,有機會踩平地已感恩萬分。

行山路線:

巴士黃泥涌水塘公園站 >黃泥涌水塘 >紫羅蘭山 >紫崗橋 >淺水灣坳 >孖崗山 >赤柱峽道

***
***
***
***

落車巴士站喺油站側邊,油站出口條樓梯有指路牌去水塘。上樓梯頂後轉左行一分鐘,過馬路去對面行人路個木製地圖展示架,黃泥涌水塘就在眼前。

黃泥涌水塘今年 120 歲

黃泥涌水塘喺 1899 年完工,今年(2019 年)剛好 120 歲,係香港第三個最古老水務建築,水壩及水掣房係水塘其中兩個歷史建築。靠右沿水壩走,經過一間四四方方的屋仔就係水掣房。

***

走到盡頭落樓級轉左,喺分岔口轉左,路邊有往紫羅蘭山(Violet Hill)木牌。過咗明渠石板,開始同長命樓梯玩遊戲,進入大潭郊遊徑。

紫羅蘭山西 vs 紫羅蘭山

過咗半個鐘,出現第一支標高柱(編號 237),代表嚟到海拔 438 米的紫羅蘭山西,清勁風勢正好幫忙降温。環顧四周,景觀開揚,港島、九龍半島、海洋公園、南丫島都清晰可見。

***
***
熨波洲(左)、南丫島(中後)、海洋公園(右)

喺大潭郊遊徑標距柱 C4103 分岔口,跟淺水灣坳(Tsin Shui Wan Au)指路牌前進,途中經過第二支標高柱(編號 204)。標高柱位於 433 米高的紫羅蘭山頂,山頂平平無奇,但隨後的風景,睇到嘩嘩聲。

一次過睇三個百年特色建築

嗰景係咁嘅,群山包圍大潭中水塘、大潭篤水塘,水塘遠處連接大潭港,大潭港有豪宅同遊艇,藍天綠林,畫面好寧靜,好似去咗外國咁。

大潭中水塘石壩、大潭篤水塘石橋呢兩個古蹟,同成個山水格局好夾,喺翠綠樹木包圍下份外亮麗突出,仲有後方的大潭道水壩,一次過睇到三個百年特色建築,即使要行咁多樓梯,都係超值。

體積細細的銀洲同「小石頭」構成港版伊勢夫婦石

水塘最右邊座山前後兩個峰,正前方有條明顯登頂路,又長又直,明顯佢就係孖崗山(The Twins),今日最吃力的山徑就喺前面。

淺水灣坳登孖崗山天梯

落山到分岔口,跟路牌轉行大潭篤水塘(經紫崗橋)。紫崗橋所在地,同時係衛奕信徑第一段的淺水灣坳、一處多條行山路線的樞紐,以及轉軚唔上孖崗山的最後機會。續走孖崗山的話,直接登上前方天梯去赤柱峽道(Stanley Gap Road)。

***

孖崗山兩個山峰分別高 363 米、 386 米,穿越佢哋就要化身 Mario ,喺 M 字型山上上落落,無可避免行到扯蝦,出動金魚嘴呼吸,更重要係適時休息,飲水回氣。

步道部份路段頗斜兼滑腳

除咗天梯,孖崗山步道包含爛地路、石頭地、泥石路,部份路段頗斜而且滑腳,認真行路要帶眼。特別惡劣的路段正進行築路工程,修路用木頭放喺路邊,希望唔會變成人工石屎路。

***

辛苦得來的最大回報,就係由第二峰落山,一路飽覽赤柱半島的海灣風光。嗰種心曠神怡的愉悅,極幸福。

發現港版日本伊勢夫婦石

由南區呢邊望去對岸南丫島,景觀靚過上次從南丫島望過嚟。面積細細的頭洲前方,有兩個無名小洲,勁似日本伊勢夫婦石。

海洋公園旁熨波洲(Tong Po Chau)係香港遊艇會所在地。維基話熨波洲以前叫銀洲,咁後來點解要改名呢?而家舂坎灣隔離都有個銀洲(Ngan Chau),莫非改名同呢個銀洲有關?

赤柱正灘對岸鶴咀山,山頭有接收器的物體,估唔到佢係行山熱點之一,咁要將佢放入等待探索名單。

***
赤柱半島與螺洲

冇囚犯馬坑監獄曾爆種菜奇聞

近山腳的馬坑監獄頗接近民居。監獄喺 1974 年啟用,收押成年及年老男囚犯,2015 年開始將囚犯遷離,轉做懲教訓練場。2017 年爆出有保安員喺馬坑監獄範圍,私建菜田種菜的奇聞

孖崗山落赤柱峽道條長樓梯,石屎打造,都係鍾意自然風味梯級多啲。到達終點過對面馬路,就係去中環的巴士站,超方便喔。

*** *** ***

行山貼士:

  1. 自己垃圾,自己帶走,包括水果皮、果芯。
  2. 愛護郊野,請勿吸煙及亂掉煙頭。
  3. 冇補給站,心須帶備足夠糧水。
  4. 全程需持續行梯級上落山,樓梯又長又斜,由淺水坳上孖崗山一段天梯最吃力,行山者需具一定體能。
  5. 強烈建議着行山鞋及帶行山杖;曝曬時間長,防曬工夫要做足。
  6. 部份爛地路段斜度大,雨後怕會出現小型泥石流。
  7. 完成行程時間: 3 小時 20 分

🚏 🚌 🚏 🚌 🚏 🚌 🚏 🚌 🚏 🚌

交通貼士:

去程:城巴 6 / 41A / 63 / 66 / 76 抵黃泥涌水塘公園站

回程:赤柱峽道城巴衛奕信經站有多部巴士往中環

*** *** ***

🌞 🏃 相關文章

生活遊樂場

行山有時.旅遊有時

蘇菲 Sophie

Written by

鍾意行山、外遊的香港人

生活遊樂場

行山有時.旅遊有時

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade