烏溪沙沙灘的自然美，吸引大家嚟睇日落、望海放空或者玩堆沙。風景，始終係天然的最好，何必又搬大石喺度砌個心呢。
去沙灘前先快閃馬鞍山公園。坐巴士到海栢花園落車，經馬鞍山廣場的接駁行人天橋落馬鞍山公園。園內草地上有唔少即開帳篷，用家除咗一家大細，享受假期的外傭姐姐都唔少。
行向海邊，臨海步道上人來人往。望住烏溪沙碼頭前行，話咁快到達烏溪沙沙灘（Wu Kai Sha Beach）。若果想踩沙玩水，就要喺適當位置離開步道，走近海邊。
小朋友喺度堆沙踢水，vee 嘩鬼叫，睇見都開心埋一份，總好過成日對住部手機睇片／打機／做功課。過咗烏溪沙碼頭，前方仲有沙灘，但遊人冇開頭嗰邊咁多。
海風越吹越烈，太陽被厚雲層掩面，無緣欣賞黃昏幻影，原路返馬鞍山廣場嘆咖啡。
