連環暢遊石梨貝水塘、德羅塘，觀賞咗多幅倒影水彩畫，心花怒放。德羅塘，即係九龍接收水塘。有幸同佢結緣，靠 Google 地圖牽線。
行山路線：
大埔公路石梨貝水塘巴士站 ＞長源路 ＞九龍副水塘水壩 ＞石梨貝水塘 2號燒烤場 ＞石梨貝水塘 ＞連接小徑 ＞九龍接收水塘（德羅塘） ＞長源路 ＞大埔公路石梨貝水塘巴士站
沿長源路下行，過咗九龍副水塘水壩後往燒烤場。燒烤場後方樹叢有明顯石級路，由此上山，直至到達平台地，選行右方小徑。踏泥濘窄路，彎身穿越植物群，6 分鐘後接入石梨貝水塘（Shek Lei Pui Reservoir）緩跑徑，藍色圍欄現身（位置 A）。
喺分岔口左轉，會去咗石梨貝水塘水壩。選擇唔轉左，繼續行緩跑徑。過咗終點路牌，沿小橋橫過引水道，冇耐見到起點牌及大地圖。
連接小徑串連兩水塘
地圖上面，有標示去九龍接收水塘的連接小徑（Link Path）位置。由呢度起步，過咗緩跑徑 1400 米標距柱後有分岔口，又再出現藍色圍欄。若果左轉行過水壩，會返到位置 A；如果繼續直行，就進入連接小徑。
小徑係一段下行梯級，大約5分鐘後接入九龍接收水塘（Kowloon Reception Reservoir）緩跑徑。
德羅塘名字存想像空間
設計行程時，睇見九龍接收水塘呢個名已覺得勁乏味，冇打算去。直至發現Google地圖標示水塘條緩跑徑叫德羅塘緩跑徑，先知九龍接收水塘原來叫德羅塘（Eption Reservoir）。呢嗰名太有想像空間，立即改變主意去探索。
德羅塘緩跑徑呢個名，地政總署同漁護處的地圖都冇嘅。通訊事務管理局的流動電話接收地圖就用中、英文寫住德羅塘緩跑徑、Reception Reservoir Jogging Trail。
講返連接小徑，去到佢同德羅塘緩跑徑的交滙口，向右行繞塘慢遊。隨水塘水壩過對面，行多一陣抵達緩跑徑終點。接回長源路，靠左走會見返燒烤場石級入口，循舊路出返去巴士站起點。
德羅塘環境更清幽
見人多過見馬騮，喺意料之外。
論風景，石梨貝水塘提供遠至西環及青洲的海景，亦容許同時睇到筆架山、獅子山，不過唔及德羅塘咁清幽。喺德羅塘，有多啲雀仔聲。
*** *** ***
行山貼士：
- 愛護郊野，勿吸煙，勿亂掉口罩。山野不設垃圾桶。
- 自己垃圾，自己帶走，包括水果皮、果芯。亂掉果皮只會吸引其他人堆放更多垃圾。
- 自備足夠糧水，沿途冇補給。
- 注意防曬、防蚊。提防可致命的中暑／熱衰竭。
- 遇到馬騮時要緊守勿挑釁、勿餵食、勿靠近、勿打開膠袋。
- 有小童、長者結伴，建議行德羅塘緩跑徑。喺巴士站沿長源路直行，過水壩後繼續走馬路，會發現緩跑徑入口，步程 10 分鐘。
- 完成行程時間：2 小時 20 分
🚏 🚌 🚏 🚌 🚏 🚌 🚏 🚌 🚏 🚌
交通貼士：
巴士 72／81 往返九龍／沙田／大埔至大埔公路石梨貝水塘站。巴士站公廁旁就係長源路
*** *** ***
後記
有放狗男故意喺馬騮面前，將抱喺手的狗仔放落地，叫隻狗行近馬騮，完全漠視竉物同其他遊人的安全。
另有阿叔特登快步走近獨行馬騮然後大叫，馬騮受驚速逃。阿叔面露得戚相，冇留意一群馬騮喺樹上睇住。佢冇被馬騮圍攻算好彩。
***
石梨貝水塘（1925年落成）周邊另有三個水塘，按年資計，佢排阿二。大佬九龍水塘1910年，阿三九龍接收水塘（德羅塘）1926年，阿四九龍副水塘1931年。計容量，大佬最大，阿三最細。
以為佢哋四個歸屬九龍水塘群組，好似大潭水塘群組咁，但水務署網頁只將九龍水塘、九龍副水塘、九龍接收水塘歸為一組，石梨貝水塘就獨立分開。更奇嘅係，官網話九龍水塘實情係新界第一個水塘。
😵 點解當初唔叫佢做新界水塘？
😵 究竟呢四個水塘身處九龍／新界？
***
最想知德羅塘嗰名點嚟，揾唔到資料。負責管理全港水塘的水務署，對所有水塘的歷史、用途冇詳細記述，網頁好趕客。
