元朗屏山文物徑串連的多座歷史建築中，最愛覲廷書室。佢的室內設計糅合中西文化，處處得見工匠的巧手佳作，華麗程度同大夫第有得揮。
馬會出資修繕覲廷書室清暑軒
穿過覲廷書室（Kun Ting Study Hall）正門，好快𥄫到中庭兩邊廂房的雕花摺門，個 Look 勁似大夫第。書室的雕花比大夫第用上更多顏色，甚至有彩色玻璃，靚！望吓呢度嗰度，讀埋展板內容，逗留喺書室的時間遠超預期。
咁啱得咁橋，覲廷書室、大夫第同屬由馬會出錢修繕，覲廷書室隔離的清暑軒都係。
覲廷書室喺 1870 年落成，有超過 150 年歷史，係鄧香泉起嚟記念佢阿爸鄧覲廷。同其他新界書室一樣，村民嚟書室讀書，希望將來考到個官位，出人頭地，光宗耀祖。
二戰結束後初期（二戰喺1945年結束），覲廷書室仲有辦學，幾時停辦就唔知。書室有條室內樓梯通往上層，樓上有通道連接隔離的清暑軒，但公眾喺唔准上樓㗎，條通道真係好神秘。
清暑軒浴室入口用流線型設計
以前當有貴賓或學者來訪書室，係可以入住清暑軒（Ching Shu Hin）。清暑軒屋主明顯用咗好多心思同錢去做裝修，最有趣喺設有特大廚房，浴室入口採用流線型設計，非常觸目，頓時增加咗間屋的趣味度。
***
交通：
巴士 53／ 276／港鐵接駁巴士 K65 到坑尾村落車，行一分鐘到覲廷書室。
