遊客到訪丸龜城（Marugame Castle）通常以登上罕有的木造天守為目標，自己就想睇佢的超高石垣，最終焦點去咗完全陌生的飯田山，一座享有讚岐富士美譽的小山，今日對佢係一見鍾情。
離開 JR 丸龜站，穿過商店街，抬頭可見高高在上的丸龜城。第一次到訪建於山頂的日本城堡，有種雀躍感。城堡周邊種有櫻花樹，雖然花期已近尾聲，但賞花人多，最欣賞大家細細聲講嘢，冇人會邊行邊開大喇叭播歌，冇人會一字排開咁霸哂條步道嚟行。
要睇石垣同城堡，必須經由一段急升大斜路上山，好多長者都冇有怕，照上！行完，難免索哂氣，估唔到山上竟然有櫻花園區，更驚喜係喺可以遠眺「讚岐富士」飯田山的美景。
嚟到山頂，遊人十居其九會付費參觀城堡的木造天守，話哂全日本只有 12 座木天守咋。自問對天守興趣不大，都係繼續對住飯田山放空，隨心而行自得其樂。
原本冇打算嚟丸龜城，發現由高松坐 JR 過嚟，車程最快只要 26 分鐘，適合半日遊，嚟到之後慶幸有改變主意。
***
旅遊貼士：
🚆 從高松坐 JR 去丸龜可以揀坐快車（車程 26 分鐘）／慢車（55 分鐘），以為快車車資一定貴，咁就錯喇。今日坐 09:04 開出的快車，車資 630 蚊，同 09:25 開出的站站停慢車竟然係同價！
🚆 拍 IC 卡入閘坐 JR，進入自由席車廂，開車後應職員要求出示車票，佢會問你去邊個站。
🚆 出閘拍卡時發現唔夠錢俾，出唔到閘。閘口旁邊設有增值機，拿拿林攞張一千蚊紙出嚟自行增值後就出到閘。萬一銀包只有大額現金，就要揾職員幫手唱一千蚊紙。
🚆 離開 JR 丸龜站行到丸龜城，用咗 14 分鐘。
🚆 丸龜城觀光案內所唔單止係一處俾大家買手信的地方，入面有造扇師傅駐場，即席獻技。
