只得一日時間遊覽小豆島,嚴選三處景點到訪:寒霞溪、橄欖公園及天使之路。寒霞溪係瀨戶內海國立公園,兼全日本三大溪谷之一,點可以錯過呢。
行程:
高松港渡輪碼頭 >小豆島池田港 >巴士寒霞溪急行線 >紅雲亭 >纜車 >寒霞溪 >纜車 >紅雲亭
初初度行程時,去唔去寒霞溪 (Kankakei )都諗咗好耐。去寒霞溪,要先喺小豆島(Shodoshima)的池田港(Ikeda Port)搭一程巴士去紅雲亭,然後轉坐登山纜車。車程短短五分鐘,一張來回飛承惠二千幾日元。
之但係,巧想知呢個國立公園有幾靚,加上透過旅遊網站,買到平咗十幾蚊港紙的來回纜車飛(有得平,好喎),於是決心上山去。
揸住香川迷你鐵路及渡輪周遊券去小豆島(點解會買周遊券,可以睇返呢篇文章),免費坐渡輪來往高松港至小豆島的土庄港,又可以任搭小豆島上的橄欖巴士 ,留意有啲巴士線的班次係勁疏,去寒霞溪的寒霞溪急行線就係其中之一,全日只得五班車。
周遊券唔適用去池田港
刨哂巴士同渡輪時間表,發現最方便搭寒霞溪急行線的地方,係小豆島的池田港。周遊券唔適用去池田港的船,所以要另外花 700 日元買單程船飛。
經過不斷修改後,小豆島一日遊的日程表終於出爐。同去高屋神社一樣,要跟實日程表行動,否則好頭痕。
***
日程表:
08:32 喺高松港坐國際兩備營運的渡輪去小豆島池田港,船程一小時
09:32 抵達池田港
10:10 池田港碼頭附近巴士站池田港ターミナル前搭寒霞溪急行線到總站紅雲亭
10:30 總站落車,按路牌指示往纜車站。纜車每十二分鐘開出一班,車程五分鐘。
13:00 搭巴士寒霞溪急行線到橄欖公園公園口站(オリーブ公園口),車程約 17 分鐘
14:51 橄欖公園公園口站搭巴士田ノ浦映画村線,到國際酒店前站 (国際ホテル(エンジェルロード前)
15:13 到站落車,跟路牌行幾分鐘到天使之路 (エンジェルロード)
16:48 喺剛才的巴士站國際酒店前,坐巴士田ノ浦映画村線往土庄港,車程約十分鐘
17:30 土庄港渡輪返高松港,航程一小時
***
坐船去池田港呢一個鐘,完全唔悶,望住瀨戶內海的靚景,時間過得好快,行出船艙上甲板,大人可以打鞦韆打卡,豆丁有小火車同瀡滑梯。(不過今朝兒童樂園部份冇開)。
池田港產直巿場有驚喜
落船行一分鐘,已到寒霞溪急行線巴士站,續前行,進入產直巿場,好似入咗小豆島農家超巿,有好多新鮮蔬果同食材發售,最驚喜喺有炊飯便當,對肚皮打緊鼓的我嚟講,如獲至寶。
順利到達寒霞溪纜車站,職員熱心提醒遊人若果下一站去橄欖公園,記得坐12:36 開出的纜車落山,返嚟巴士站搭一點班車過去,否則要等到差唔多三點先再有巴士。職員超細心,將坐車時間表貼喺牆俾大家參考,抵讚!
寒霞溪空中之旅值回票價
可能正值閒日加上時間尚早,一齊坐纜車的遊人只得四位,因為咁,大家喺呢五分鐘車程得以喺車廂內隨意移動影相。過程中,大家都保持安靜,聽住風聲同雀仔歌聲,喺石林上空慢慢飄過,感覺超正。
就係呢短短幾分鐘的空中之旅,真心認為值回票價。
離開纜車車廂後,急急腳到食店買碗熱辣辣的牛肉烏冬麵。四月初的高松涼涼地,着住薄羽絨都唔覺暖,可能同未食早餐有關。全靠呢碗麵加一盒炊飯,打爆能量值,有氣有力行哂寒霞溪幾個展望台。
唔坐纜車行上山要一個鐘
除咗有觀光客上山睇風景,亦有山友嚟行山。按現場地圖,步道數目都唔少。頭先如果唔搭纜車上山,喺紅雲亭巴士站可以沿步道行上嚟,估計需時一個鐘。選擇喺小豆島玩幾日的話,嚟寒霞溪行山真係唔錯。
天然美態越睇越鍾意
雖然當刻並非滿山紅葉的最佳觀光時節,但藍天白雲下的寒霞溪山谷配搭瀨戶內海,賞心悅目。景色全部真材實料,冇整色整水,天然美態越睇越鍾意,越望個人越放鬆。
搭纜車落山前,順路到土產店行一圈,最大亮點竟然係部扭蛋機。
***
旅遊貼士:
- 喺高松港搭船去小豆島可揀慢船或快船(只限土庄港),兩者的售票處設於唔同位置。喺慢船碼頭的建築物買咗去池田港的船飛,要離開建築物,行多幾步登船。
- 大安旨意上船後幫襯小食部買早餐,點知小食部冇開!頭先個售票處只有飲品售賣機,冇便利店及食肆。
- 四月初,天氣有啲涼甚至凍凍地,不過一出太陽又會熱,早晚温差大,帶件薄羽絨好有用,特別係晨早上山嗰陣。
- 揸住香川迷你鐵路及渡輪周遊券去小豆島,可免費坐慢船往來高松港至土庄港。今日自費坐船去池田港,回程時用周遊券由土庄港返高松港,排隊上船時向職員展示周遊券,就係咁簡單。
- 周遊券包埋任搭小豆島橄欖巴士,落車時必須向車長出示周遊券。記住上車用巴士中門,落車經前門向車長出示周遊券/出示巴士一日乘車券/付款。一日乘車券票價一千日元,可以即場同車長購買。
- 一定要留意島上的巴士班次,有啲車,班次好疏。
***