喜歡影相、逛公園細賞一花一草的人，嚟高松巿栗林公園必定滿載而歸。若然同至愛伴遊，園內一個打卡位絕不能錯過。
栗林公園（Ritsurin Garden）面積大，分為南庭、北庭兩大部份，有好多名勝要睇，預算逗留三小時。付費入園後先漫遊南庭部份，沿指路牌行，自然去到超級景點飛來峰。從飛來峰外望南湖，景色更勝網上所見。
戀愛杜鵑 情侶必到
飛來鋒的名氣太盛，南庭其他景點或被忽略，隨心而行，發現景點各有千秋，等待你細味，其中戀愛杜鵑屬情侶必到，影結緍相不二之選，單身一族喺度留影亦無妨，話唔定良緣火速降臨。
行到咁上下，坐喺指定區域的櫻花樹下休息，跟隨日本人習俗攞出餐盒，靜靜開飯，幾片粉紅花瓣輕輕飄落飯團，頓時添加浪漫情調。
北庭遊人數目銳減
移至景點數目較少的北庭，遊人數目銳減，雀仔聲份外動聽。大草地旁驚見櫻花街，花枝上雖已長出綠葉，觀賞值仍高企。遊人可隨意坐喺大草地放空／傾計，冇告示叫人唔准坐／唔准跑／唔准進食／勿亂拋垃圾／勿喧嘩／不得拍攝，呢啲香港日常的十萬個唔准，零發現。
園內設有長凳供遊人小息的位置，總有美景在眼前，好適合坐喺度睇餐飽影吓相，安排超窩心。
栗林庵網羅香川縣土產
三個鐘轉吓就過，出返去公園售票處，行埋隔離的紀念品商店栗林庵。店內集合咗香川縣多個地方的特式手工藝品及食物，喺度行一轉，等同去咗成個香川縣，兼且設有即場退稅服務，超爽。店內多數工藝品註明眼看手勿動，有需要可揾職員幫忙，唔好亂摸或隨意攞上手。
出售特色土產的商店喺 JR 高松站商場都有，不過種類比栗林庵少好多，亦不設退稅。
***
遊覽心得：
- 栗林公園名震全國，並非浪得虛名，非常慶幸在晴朗的一天來訪，相信秋天嚟的話，又有另一番美態。
- 宜早上入園，越晏越多人。做好防曬。
- 搭車／步行到栗林公園都方便容易。有日踩單車過嚟，感覺超正，公園售票處附近設有免費單車停泊區。
- 日本周街冇垃圾桶，公園入面都冇，自己垃圾自己帶返酒店掉棄。
- 栗林庵位處栗林公園外面，公眾嚟買嘢，唔使俾栗林公園入場費。
