離開高屋神社轉抵父母濱，巴士車程只要十幾分鐘。父母濱呢個長長的沙灘能夠成為打卡熱點，得來不易，成件事可以用嚟改編拍劇。
行程：
巴士室本站 ＞巴士仁尾線（往詫間站方向）＞父母濱＞巴士仁尾線（往三豊総合病院方向）> JR 觀音寺站
三豐巿觀光交流局職員用心拍攝的父母濱（父母ヶ浜，Chichibugahama）靚相，有藍天白雲，又有黃昏 magic moment，睇到心心眼。當真身嚟到現場，天氣不似預期，影相意慾大大減低。隨遇而安，周圍行吓，買杯咖啡望海，同貓貓玩咗陣，一個鐘頭話咁快就過，夠鐘搭巴士去觀音寺站坐 JR 返高松。
***
旅遊貼士：
- 沙灘周邊有 food truck（未必日日開）、食肆及便利店。
- Youtube 父母濱實時影像。
- 三豐巿觀光交流局官網提供高度實用旅遊資訊，包括拍攝天空之鏡教學，另詳細講解父母濱由垃圾場變身著名旅遊景點的經過。
- 設有免費洗腳區 👇，除鞋落沙灘踩到成腳沙泥都唔怕。
🚏 🚌 🚏 🚌 🚏 🚌 🚏 🚌 🚏 🚌
交通：
參觀完高屋神社，原路折返之前巴士特別停靠的落客位置，過馬路去對面行人路，向右一路前行 10 分鐘，到達室本巴士站，14:15 搭巴士仁尾線（往詫間站方向）去父母濱。（三豐巿巴士仁尾線時間表）
坐巴士去／離開父母濱的站頭都係同一個。搭巴士仁尾線（往三豐総合病院方向）離開父母濱去觀音寺，15:24 到站，15:43 到觀音寺，16:09 有 JR特急返高松。
特急列車上，職員查飛時知道我去高松，善意以英語提醒需轉去另一個車廂坐，因為班車稍後會分體，只有前面嗰幾卡車會停高松。細心聽，車上有多國語言廣播，提醒乘客班車稍後會分體前行，欲知詳情要問職員。
列車職員係今日所遇第二位天使，第一位當然係巴士五郷高室線的車長！
同車長先生喺高屋神社山腳附近講再見，估唔到喺室本站等車去父母濱其間，佢揸巴士經過，停車問我去邊，提我去父母濱班車即將到達，然後再一次笑住話別。
說了再見，定會再見。
