坐 JR 特急從高松站去觀音寺站,賺咗時間,不過收費貴。買張香川迷你鐵路及渡輪周遊券,可以cover 呢筆開支,仲包埋翌日坐指定航線渡輪去小豆島,任搭島上橄欖巴士。咁係咪買周遊券一定有着數呢?
飛日本前,花咗好長時間度行程同計條車馬數。周遊券承惠六千日元,有效使用期得兩日,一日用嚟去觀音寺巿遊覽高屋神社及父母濱,另一日就去小豆島。
來回觀音寺並非必坐 JR 特急,仲有其他車種可以揀,但要配合埋觀音寺巿/三豐巿的巴士時間表,特急就成為今次旅程首選。
加上由酒店去 JR 高松站/渡輪碼頭,最方便係坐高松琴電電車到高松築港站,然後行 2–3 分鐘過去 JR 站/碼頭,涉及的電車車資,周遊券係包埋的,咁計埋入大數,買周遊券就真係物有所值。
總之,首要攪清楚去邊度玩及所需車費,然後先決定有冇必要買周遊券。抱住人買我買,唔埋三七廿一買咗先,可能會蝕本㗎。
有用交通網站:
⭐️ 高松琴平電氣鐵道
⭐️ 香川迷你鐵路及渡輪周遊券
***
留意:
🚌 香川迷你鐵路及渡輪周遊券設於 JR 高松站的售賣處,就喺站內中央大廳旁邊,火車便當舖頭對面,非常易揾。售票處同時出售各式 JR 車票,條人龍係幾長,買飛要預留時間。
🚌 周六、周日或公眾假期去高屋神社,有接駁車直達山頂,唔使行山路,詳情睇官網。
🚌 JR 觀音寺站巴士線五郷高室線的站頭,位於三越觀音寺旁邊:
🚌巴士同香港的一樣設前門及中門,留意上車用中門,落車經前門。落車時支付車資。
***