理論上去高屋神社唔難，由 JR 觀音寺站坐巴士到稻住山山腳，沿步道不斷上斜就會到達山頂的高屋神社，問題係巴士班次少，度行程時好花心神。
行程：
JR 高松站 ＞JR 觀音寺站 ＞巴士五郷高室線 ＞特別停靠高屋神社登山口附近馬路邊 ＞下宮停車場 ＞登山步道 ＞本宮（高屋神社天空鳥居） ＞原路返回登山口附近馬路邊
今日到訪兩個景點高屋神社（Takaya Shrine）及父母濱，靠巴士代步。由 JR 觀音寺站開去高屋神社登山口附近的巴士五郷高室線，全日只得四班車！度行程時，幾點上落車、上落山，統統用紅色筆 highlight 哂 。路途中，不斷提自己要係睇實時間，按規劃行動，否則返唔到高松的酒店。
規劃是咁的：
0930 / 到達 JR 高松站
0942 / 坐特急，1030 到 JR 觀音寺站（車資 2440 日元）
1123 / 乘巴士五鄉高室線（車資 100 日元），上車時告訴車長往高屋神社，車長會特別停靠高屋神社登山口附近，車程約 15 分鐘。
1400 / 到達巴士室本站
1415 / 上巴士去父母濱，車程 15 分鐘（車資 100 日元）
1524 / 父母濱巴士站上車（車資 100 日元）
1543 / 到 JR 觀音寺站
1609 / 坐特急，1654 抵高松站（車資 2440 日元）
坐特急由高松（Takamatsu）去觀音寺（Kanoji， 日本漢字寫法：観音寺），開車後 JR 職員嚟查飛，問你去邊個站。食住飯糰邊睇窗外風景，間中喺一戶建的花園／山頭見有粉紅櫻花樹。
觀音寺站地方細細，車站出入口左行往巴士站，右行有七仔。仲有差唔多成個鐘先有巴士，索性喺車站附近探索，失驚無神係河邊發現一條盛開中的櫻花街，開心到飛起。
巴士特別停靠登山口附近
轉至七仔，買定乾糧帶上山開餐。返去車站旁巴士站，放咗幾個唔同路線的站牌，最遠嗰個係五郷高室線。等車其間善用手機翻譯鴨士，將一段說話譯成日文，一陣俾車長睇。
根據 五郷高室線 的路線圖，唔存在高屋神社站，但 觀音寺巿官網 教路坐呢部巴士去就啱㗎啦，只要上車時同車長講你去高屋神社，車長就會喺最接近登山口的位置停車落客（地點介乎室本及高屋明下呢兩個站之間），係一項非常特別又貼心的服務。
依話照做，多得翻譯鴨士傳話，車長帶着微笑以英語回應 OK。十多分鐘後，巴士停喺登山口附近的馬路邊，離遠已見前面有個高屋神社指路牌。以有限的日文再三向車長道謝，揮手送別。
按指路牌上紅色箭咀提示，循石屎車路急上斜往下宮停車場。車場周邊櫻花綻放，令人超開心。隨後轉走明顯步道一路上斜住山頂本宮（即高屋神社），官方估計需時 40-50 分鐘。
行山竹供遊人免費借用
喺禁止車輛駛入路牌旁邊，放有行山竹供遊人免費借用，建議攞支旁身，落山好有用，離開時原地交還便可。以為閒日冇咩人上山，出乎意料遇到近十名遊人，包括幾位講住廣東話落山的香港人！
步道路面千變萬化，石屎地、沙石、亂石、泥溝及石級等，若然平日少做運動，不停上斜會幾攰，停吓唞吓慢慢行囉。路邊有標距石，起步時同十二丁留影，三丁後冇記錄，一定係自己大意錯過咗。
攻頂石級加建扶手欄杆
攻頂前必經的長長石級，畫面同網友之前影底的明顯有別，就係石級加建咗扶手欄杆。
感恩遇上好天氣，得以理解高屋神社又叫天空鳥居的原因。同鳥居合照係到此一遊的重點，遊人自律地在最佳影相位置前守候，務求影一張身後無人的美照。
坐涼亭欣賞瀨戶內海風景
坐喺涼亭大休，欣賞瀨戶內海風景，舒服到不得了，身心大滿足。望吓手錶，夠鐘落山趕巴士。不停落斜冇上山咁攰，不過條路崎嶇不平始終易扭親，要打醒精神，呢個時候有支竹揸手係穩陣啲。
今朝一直享有藍天白雲，返到下宮停車場變成多雲天陰，猶疑仲去唔去父母濱。一場嚟到，都係繼續按計劃行事吧。
***
行山貼士：
- 着行山鞋，建議在現場免費借用行山竹。
- 自己垃圾，自己帶走。
- 山路越上越崎嶇，雨後不宜。
- 帶備足夠糧水，下宮停車場有飲品售賣機及公廁。
- 有指路牌可循，迷路指數低。
- 天空鳥居旁涼亭內自動販賣機，發售之物滿有驚喜。
- 用 JOYTEL 電話卡（日本全網通 Softbank + Docomo +KDDI )喺山上山下接收訊號冇問題，上網流暢。
- 完成行程時間：2 小時
👺 巴士落客點至高屋神社：1 小時
👺 高屋社神返回下宮停車場：38 分鐘
***
步道路況：
***
