寫呢篇遊記時睇返網上資料，方知高松城遺址外面條護城河的水係海水！遺址所在地玉藻公園，初時冇打算去，路過見入面有櫻花樹後改變主意。
未試過去日本賞櫻，今次係四月份嚟高松，估計係花期水尾之時，現實又唔係咁差，甚至喜出望外。好記得飛抵高松時落住雨，搭巴士入巿區嗰陣見到一棵棵盛開的櫻花樹，自己同巴士上其他港人乘客都變哂做三眼仔，開心得嘩嘩叫。
翌日坐琴電電車去高松築港，途經高松城跡玉藻公園（Takamatsu Castle Tamamo Park ／たまもこうえん）時驚見園內有一堆粉紅色的櫻花樹，心想不得了，一定要抽時間入園。兩日後，目標達成。
護城河泛舟受遊客歡迎
撇除櫻花，玉藻公園本身美景處處，喺護城河泛舟係其中一項受遊客歡迎的活動。園內種咗好多松樹，每棵都得到悉心打理，外型獨特漂亮，管理員全情投入照顧，功不可抹，相信松樹亦住得開心，先會健康成長。
園方特設松果收集籃，歡迎遊人幫手拾起地上的松果，留待冬天時，用嚟製作成巨型松果樹。
免費登 29 樓鳥瞰玉藻公園
離開玉藻公園，行 2 分鐘去 JR 高松站附近的 Symbol Tower，坐升降機上 29樓的展望台（免費入場），鳥瞰玉藻公園、高松巿巿中心，仲有廣濶的瀨戶內海海景！幸運地因着大晴天，視野極佳，望到好遠。
遇啱時間，上嚟睇日落應該冇得輸。
🚏 🚌 🚏 🚌 🚏 🚌 🚏 🚌 🚏 🚌
交通：
坐琴電電車去高松築港站，行一分鐘到玉藻公園。由 JR 高松站行過去，只要 2 至 3 分鐘 。
***
