香港唯一一個海岸保護區喺港島東南端的鶴咀。佢嘅珍貴之處，睇得見甚至聽得到。
行山路線：
鶴咀巴士站 ＞鶴咀道 ＞鶴咀海岸保護區 ＞鶴咀道 ＞鶴咀巴士站
漁護署設立鶴咀海岸保護區（Cape D’Aguilar Marine Reserve）為咗保育海洋資源兼做科學研究，唔鼓勵巿民走去參觀。
出發前先睇保護區守則
現實係，呢度早已被海量遊人攻陷。即使網頁寫明保護區內冇公廁、冇垃圾桶，提醒埋有咩唔做得，依然阻止唔到遊人擅自進入區內港大太古海洋科學研究所，甚至破壞研究所設施。
參觀保護區要守規矩，係公民責任囉。正如去郊遊，愛護花草同帶走自己垃圾呢啲基本嘢，係每個遊人需要做好的本份。
行一個鐘抵海岸保護區
坐巴士到鶴咀站，沿鶴咀道行大約一個鐘落海岸保護區。邊行邊認建築物，一海之隔對岸有紅山半島、赤柱泳灘、赤柱監獄、白沙灣懲教所、解放軍軍事地區、黃麻角衛星鑊。鶴咀呢邊有石澳石礦場、機槍堡遺址。
石澳石礦場喺 2011 年停用後，做過港鐵沙中線沉管隧道預製組件工場，還原後交俾地政總署，現時屬於未決定用途土地。
德己立角燈塔全港最古老
鶴咀保護區有一座全港最古老、今年（2020年） 145 歲的燈塔──德己立角燈塔（Cape D’Aguilar Lighthouse），紀念香港首任副總督及駐港英軍總司令德己立少將（Sir George Charles D’Aguilar）。
燈塔喺 1875 年啟用，曾經停用過，1975 年改為自動化運作又重新開工。佢喺香港法定古蹟，到訪時做緊工程圍封咗。其餘兩個保護區地標雷音洞（Cape D’Aguilar Cave）、蟹洞 （Crab Cave）就如常可以隨意參觀。
地貌千奇百趣 海浪聚成牛奶池
保護區海岸地貌千奇百趣，每款影一張相嘅話都要影好耐。行吓坐吓，望住鶴咀灣吹風，海浪唔停咁拍打狗脾洲（Kau Pei Chau），產生的澎湃浪花似大煙花綻放。
海浪唔一定要激烈展現先引人注意，靜落嚟嗰陣聚埋喺低窪位置整咗個牛奶池出嚟，估佢唔到。
用耳仔參觀保護區
港大科研人員喺鶴咀研究珊瑚同岩石。佢哋的努力成果被香港電台用聲音記錄，製作成節目 大自然之聲 其中一集，當中仲錄底咗保護區的獨特聲音。
有幸遇上晴朗天氣兼且能見度高，輕易認出老遠的將軍澳、釣魚翁、東龍島，亦新認識咗狗脾洲後方的蒲台群島（Po Toi Islands）、橫瀾島（Waglan Island）。
收獲豐富的一天。
***
行山貼士：
- 行山禮儀，你我都要識。
- 全程曝曬，行鶴咀道落海岸，沿路折返。
- 鶴咀道不時有車輛出入，小心睇車。
- 沿路有唔少紙巾、口罩。自己垃圾，自己帶走真係咁難？
- 漁護署規定喺鶴咀海岸保護區內，不得進行水上活動及採集野生動植物。
- 爬石拍照，必須考慮風險，注意安全。
- 完成行程時間：3 小時 10 分
🚏 🚌 🚏 🚌 🚏 🚌 🚏 🚌 🚏 🚌
交通貼士：
筲箕灣巴士總站坐 9 號到鶴咀站。回程時，喺同一巴士站坐 9 號／小巴返筲箕灣。
