溝通 101 ：為自己言行負責 向刻板印象說不
好耐冇寫嘢，啲稿放到就嚟唔記得自己想講乜。但喺 Wright Fu. 個 Discord 谷見到啲文友都好勤力清存稿，就覺得應該的起心肝寫返。特別係今日俾 謝一了 tag 我提起我啲文，睇嚟係時候趁聖誕得閒去清下稿。
話說講起刻板印象，唔少人嘅第一印象應該都係諗起用嚟標籤其他人。標籤人唔可取就唔洗點講㗎啦，但竊以為最得人驚係有啲人竟然係會用呢樣嘢嚟放喺自己度，不知不覺咁合理化自己嘅行為。
有次我喺啲群同人吹水，講咩唔係好記得了，淨係記得有位仁兄都幾冇禮貌同串嘴。但就咁樣我都未必會入腦，畢竟冇禮貌同串嘅人周街都係啦。最令我印象深刻嘅係佢一句答句：
「啊你都幾串㗎喎」
「梗係，你當天蠍座流㗎？」
見到嗰下我立刻呆咗一呆唔知俾咩反應好。乜你好自豪於自己串／冇禮貌咩？乜天蠍座就係要咁㗎咩？我嗰下先驚覺原來會有啲咁嘅人存在。先此聲明，我一向尊重各人信念系統差異，相信星座我覺得係完全冇問題㗎。對於冇宗教背景嘅我嚟講，信星座、信塔羅、信紫微斗數同信主流宗教係沒有誰比誰高尚；再者我自己都有遇事不決求神問卜嘅時候，冇咩資格去睇唔起人啦。（但陰謀論另計 I’m sorry）
但咁嘅表達係極有問題㗎，因為佢係完全將自己行為嘅責任外判咗去一個刻板印象度。先戴頭盔，我對星座唔係好了解，但我理解中你係乜嘢星座唔應該全然決定哂你係一個點嘅人嚟；而我亦唔係針對星座，而係所有類似嘅做法：將自己嘅行為舉動全然歸因於一個身份／標籤。
舉個反例就更加清晰：
「咦你數學成績幾好喎」
「洗乜講，我 Asian嚟㗎嘛」
唔理個行為舉止係正面定係負面，咁樣歸因都係一個好差嘅做法：因為你完全放棄咗對自己嘅行動負責，你否定咗自己嘅意志思想喺呢件事上嘅作用；而同時，你進一步 reinforce 咗一啲刻板印象「原來天蠍座就係臭串冇禮貌嘅」、「原來亞洲人就係數學好嘅」。咁樣絕非好事。
刻板印象嘅形成固然有其原因，無可否認刻板印象係簡化咗好多人類嘅思考，幫我哋慳返好多時間。留意重點字眼：簡化。刻板印象個優點同缺點正正都係圍繞住呢樣嘢。正正因為佢簡化咗啲嘢所以先慳到時間；亦正正因為佢簡化咗啲嘢所以我哋對件事嘅理解／判斷係更大機會出錯。用返第二個例子嚟睇，亞裔 數學成績好啲可能係亞洲國家數學科個課程就係深啲；又或者係亞洲家庭比美國／歐洲家庭更重視成績，會催谷仔女。咁如果你喺一個唔重視成績嘅美國本土亞洲家庭出世，就冇咗以上條件㗎啦喎。可能咁啱你數學成績都好嘅，因為你有天份又勤力。而上面個刻板印象就會抹殺哂你所有努力，將件事簡化做因為你係亞裔所以數學成績好。咁樣當然就唔公平啦。
我都明白有時啲人未必真係覺得所有擁有某某標籤嘅人都係咁，只不過係拎咗個典型形象嚟形容其他。就係好似「港女」同「處女座」，講嘅人未必真係覺得所有香港女仔都係巴渣拜金，亦未必覺得所有處女座嘅人都係麻煩完美主義者。喺呢個情況，呢兩個字詞所指涉嘅並唔係實質「所有香港女仔」同「所有 8月23日 — 9月22日之間出世嘅人」而係「巴渣拜金」同「龜毛麻煩完美主義者」呢兩個刻板印象。佢哋係一個專有名詞而唔係就咁字面意思咁解。但說者無心聽者有意，咁講嘢好易就變咗地圖炮，引起人誤會，最好都係避免咁做啦。
講返正題，文題所講嘅「為自己言行負責」，唔單係針對負面嘅嘢，而係講緊所有嘢：你係做得衰嘅，孭返起責任去改進；你係做得好嘅，照直 take credit。唯有咁樣我哋先真係對自己人生負責。唔理做得好定差，都係我哋嘅人生，而唔係一個標籤、一個身份、一個刻板印象嘅人生。Be a 3D person，唔好俾啲咁平面嘅嘢框住自己。用呢啲嘢嚟睇人本身都唔係好事，不過有時興趣有限、時間有限冇得揀，唯有折衷用啲咁嘅方法；但連對自己都咁樣就點都講唔通啦。總之，正視返自己主觀意志決定自己行為呢件事並且對其負責，做得好嘅保持，做得差嘅改進，咁先係正道。
講返一開始個 case，我淨係想回返佢一句，「It’s not you being Scorpio but you being a jerk」
後記：
寫嘢果然係要一氣呵成。清咗一篇舊稿之後就開始寫呢篇，寫寫下就不知不覺寫完咗，如果中途擺低又唔知要寫到猴年馬月啦。話說我發覺自己好似都幾常用到「／」，感覺係自己偷懶唔去諗點樣表達得精準啲咁，想盡量用返少啲。希望可以有進步啦！
