溝通 101：請摒棄對「溝通」嘅迷信
由細到大，每當聽到有人有咩矛盾衝突，好多人嘅第一反應就係叫人溝通下，就好似溝通係咩靈丹妙藥咁有理冇理塞你食咗先：「下你同伴侶分手？不如試下同佢傾下先？」「你屋企唔讚成你讀呢科？你有冇同佢哋認真傾過啊？」但溝通從來都唔係咩萬能藥，佢只不過係幫助我哋去解決分歧嘅工具；而同所有工具一樣，佢都有佢嘅限制，要活用一樣工具就要認知到佢嘅限制。
首先我哋要明白，當有分歧嘅時候，通過溝通我哋可以知道大家嘅核心矛盾到底係乜從而再諗方法解決。換而言之，溝通只係體現分歧而唔係解決分歧，可唔可以解決到其實要視乎分歧本身：有啲分歧係可以消弭嘅，但有啲係無可能解決到。唔係所有嘅分歧都係「你想食賴尿蝦我想食牛丸咁就大家一齊食瀨尿牛丸啦」咁理想，總有啲分歧係牽涉到大家嘅核心價值觀而雙方都唔會退讓。喺咁嘅前提下唔理溝通幾多次都只不過係作無用功，甚至係互相折磨。
當然啦，認知到問題存在係解決問題嘅第一步，溝通的確係有其必要，而我亦唔係想否定呢樣嘢。有時冇溝通過真係唔知個分歧解唔解決到。我想針對嘅其實係文首講到嗰啲人。當你輕描淡寫咁叫人試吓溝通嘅時候，某程度上係反映緊你對對方嘅睇法：你要不就係覺得對方蠢到諗唔到呢個方法，再唔係就諗到但就鬥氣唔做。輕描淡寫咁叫人試吓溝通就好似人哋唔舒服你叫佢飲暖水咁：不如都係唔好講好過啦。
旁人所謂對溝通嘅迷信，換個角度睇不過係冇置身處地為對方考慮嘅傲慢同漫不經心嘅唔在乎。如果真係有切身處地咁為對方諗嘅，就應該諗到對方其實都諗到呢個方法，一係就有啲原因所以冇做到，一係就做咗唔得。後者其實都冇咩可以做，我哋必需要接受有啲分歧就係無法解決，如果唔係世界大同咗好耐啦；而前者嘅話我哋就可以了解下佢嘅顧慮盛再睇下點。又或者簡單啲，唔理點都直接用以佢哋已經溝通過為前提嘅 loaded question 問佢「你哋最後都係傾得掂？」「係咪傾得唔順利啊？」，咁可能會係一個好啲嘅表達方法。
講返轉頭，我上面咁講其實係有啲假設嘅，係假定咗對方係智力正常會諗到溝通呢啲咁簡單嘅方法而且會喺冇其他考量嘅情況下實行。不過咁講，如果對方唔係咁，可能你喺俾意見佢之前，更加應該審視下自己嘅交友上係咪有啲大愛，笑。
小結：
1. 有啲分歧係解決唔到，要接受現實，溝通反而會係折磨。
2. 隨意叫人試下溝通同叫人飲暖水一樣咁低能。
3. 識朋友要帶眼識人，唔好識啲連溝通都諗唔到嘅人，亦唔好識啲會覺得你連溝通都諗唔到嘅人，笑。
後話
一路想講下呢樣嘢，但草稿開咗個頭就擺咗喺度幾個月。撞啱呢排生產力極低，又唔係話冇睇書，但冇乜時間心力梳理寫讀後感，就正好寫下呢啲隨想啦。正所謂每一個奇怪告示牌背後都有一個故事，廢文背後都係有啲經歷造就嘅，笑。經歷本身就唔重要啦，寫下啲感想梳理下開心啲。其實應該舉多少少例子細講，但感覺呢啲咁行嘅嘢都係無謂贅述，寫完就好～
