俗語話「識人好過識字」，意思係你有人際關係，勝過有實質才幹，從搵工到喺職場打滾以至做生意都無往而不利。
因為咁樣，好多人都會目標為本，返工就「以人為本」，一心諗住氹得掂老細就衣食無憂。久而久之，揣摩上意變成習慣，辦公變成扮工。
呢種現象，又以冇數跑、不以數字論英雄嘅場地最為普遍。或者有人會諗，唔使跑數咪冇咁大壓力囉。但作為一個曾經滄海嘅人，我覺得有數跑，總好過冇。
曾幾何時我都覺得跑數係資本主義社會下，資本家欺壓剝削勞本階層嘅手段。畀個 sales target 你，到數就有花紅分、有人工加。但其實業務增長最大得益者都係股東同埋班高層，而年中捽數過程中，層壓式嘅催促、鞭策/鞭撻、蹂躪之苦，又不足為外人道。值得咩？
唔好以為淨係前線先要跑數。 Middle / Back office 嘅員工，喺現代管理學 performance management 框架中，註定有三五七個 key performance indicator (KPI) ，呢啲 KPI 仲要夠 “SMART” ──唔係薯嘜，係 Specific 、 Measurable 、 Achieveable 、 Relevant 同 Time-Bound 。呢啲人力資源管理嘅學問有時真係任得你吹。
由於冇 revenue / sales figure 可以追趕，唔使跑數嘅員工嘅 KPI 往往就變咗做妥幾多 project 、提出幾多改善服務或工作流程嘅建議、工作準確度 (負面講咪 error rate) 等等。至於 Big4 嘅 Auditors 有佢哋「篤鐘」計時數嘅習俗，我唔熟書就唔亂講。
到後來我離開萬邪嘅資本主義社會，去咗一個不食人間煙火嘅地方。喺嗰度基本上你曉飛就賞多啲啲，做到 pet 屎咁亦冇咩嚴重後果，除非你當面打柒老細。你或者會話，屌你正呀喂，人間仙境啦。
不過，呢個世界資源永遠有限，論功行賞亦多少有高低。如果因為工作性質而冇咩客觀嘅 KPI 可以講，可以點？
好簡單，唔客觀，咪主觀囉。
舉個年頭鬧哄哄嘅例子：「我最喜愛女歌手」嘅評審基準係乜嘢呀？我鍾意囉。點解鍾意呀？問十個人有十個答案。呢啲咪主觀。
同理，職場上有咩嘢最主觀？老細鍾唔鍾意你囉。 And that’s why 我哋返到去文章嘅起點：扮工。由於老細猶如上帝，係世間萬物嘅主宰，你除咗討好佢之外別無選擇。如果你有本事揣摸到佢嘅心意交出佢想要嘅功課，其餘時間種草放狗吹水上 Facebook 都唔會有問題。
當然，又由於大家目標一致地要討好老細，而印象分或形象嘅嘢，一係出自老細對眼，一係來自老細一雙耳，即係其他人對你嘅評價或閒言閒語，於是辦公室逐漸會變成扮工室，同溫層會形成小圈子圍爐 gossip ，入唔到圈嘅就喺外圍食西北風，最好著多兩件衫，背脊中箭都冇拮得咁痛。
鹹魚青菜，各有所愛。不過 for personal development 嚟講，我係覺得人應該辦公而非扮工嘅。畀你喺一個扮工場所如魚得水、春風得意，可能係你交際手段高明，但亦可能純粹係環境同時勢造就。除非你打算喺同一個地方踎一世，否則難保出到去需要辦公嘅時候，無法以虛應、假度、陪笑、 hea 做等伎倆招架。
如果你自問係一個辦公嘅人，而喺某個地方覺得鬱鬱不得志，唔好灰。除咗你能力可能未夠之外，亦有可能係環境唔適合。衡量過輕重得失之後， afford 得起咪東家唔打打西家，喺下一個地方由零開始，總好過喺個負數赤字世界度沉淪。
