返工，見到隔離 team 有個座位無之啦啦吉咗。一問，先知原來有個同事已經「起咗身」。起身同過身，相同之處係你唔會再喺呢個時空同場合見到佢，不同之處係通常冇咩儀式悼念往者。 There is just no time to mourn.
諗返起呢位已經「唔喺度 (做) 」嘅故人，置記第一印象同最後印象都係 “He’s a nice guy” 。 And you see the reason why.
喂，唔係存心玩押韻，但係如果一個人喺職場上嘅優點只剩下「與人為善」呢四隻大字，咁樣同求戀期間接連收到「好人咭」有乜分別？
訴諸根本，係 workplace 根本唔需要好人。公司請你返嚟係 deliver ，跑數嘅交數，掃地嘅掃乾淨個地，做老細嘅管好班𡃁。 Deliver 同做好人之間，基本上互不相干。雖則話你份人好，可以係潤滑劑促進同事關係，但呢個唔係必要嘅條件。
老闆遇著老好人，最多於心不忍，但要狠下心腸時總會手起刀落。如果唔係，點樣同其他冇咁好人但係交到成績嘅人交代？點會叫呢班冇咁林善隨和嘅人同我賣命？係論功行賞，亦係殺一警百。
同事遇著好人，可以搵佢幫手或者佔佢便宜。但係純粹好人，幫到啲咩手？自己做好似仲快啲喎。咁剩返有咩便宜可佔，就係好人對於同僚嘅剩餘價值。如果答案係所餘無幾，敬而遠之基本上係必然嘅結果。
以好人見稱嘅同事通常有個特質：好勤力同刻苦耐勞。我見過有個出名好幫得手嘅 Business Analyst ，經驗超級豐富，有事相求永冇托手肘。但老細永遠唔會升佢職。外人估計，原因不外乎冇乜得解、十分主觀嘅「唔鍾意」，以及客觀地睇到嘅唔識 manage 人──乜都逆來順受，畀佢當家作主仲得了？ Stakeholder Management 總唔可以靠自己硬食一切、靠抵得諗而撐過去。咁樣對於班細嘅，更加唔公平。
係呀，如果你老闆係個好人，咁我就真係恭喜你喇。靠佢出去同人拆、傾 budget 爭 resources 推莊？為顧念關係或以做好人為先嘅老細，喺一眾唔係人咁品嘅洪水猛獸之中，除咗任人魚肉，我諗唔到第二個下場。
咁你或者會問，咁上、中、下三路都死，推個好人對外人、做親善大使或者形象大使咪得囉？問題又返嚟喇──你想間公司畀人嘅印象係點樣樣？係幫到你解決問題嘅好幫手、幫到你交朋結友嘅媒人 (唔好講「扯皮條」咁衰) 定係純粹 feel good hi and bye 、面目模糊嘅泛泛之交？如果你行家、業界之間聽到人講起，阿邊個邊個好好人，可能唔使追問都知道，佢哋對於呢個阿邊個邊個冇咩其他好講，而佢所代表嘅呢間公司，亦實在不值多提。
呢個時候，唔好扮《無間道》入面嘅劉德華 / 劉建明，唔好爆句對白「我想做好人」。而家冇人制止你返工做好人，只係，真係唔好畀自己剩返「好人」作為唯一僅有嘅優點。我都試過唔止一次，收到 performance appraisal 嘅第一句係「態度好好」，感覺就好似 “You are such a lovely man. BUT…” (下刪三千字)
凡事總有例外，就係當你 fresh graduate 懵盛盛見工嘅時候。如果你遇著相信 hire on character 嘅 interviewer ， being nice may be just enough 。因為一張白紙嚟講，平滑柔軟，總比起三尖八角硬繃繃嘅容易調教。但如果你已經唔再新鮮，請至少提供另一樣長處，好等大家有多一個理由和睦共處。
